ព័ត៌មានជាតិ

ក្រុមហ៊ុនវៀតណាមមួយ នៅស្រុកស្នួល ត្រូវការពលករប្រមាណ ៣ ពាន់ នាក់បន្ថែម

បានផុស

១ year មុន

នៅ

ថ្ងៃចន្ទ ១៦ មិថុនា ២០២៥

ដោយ

លោក លៃ លីន តំណាងក្រុមហ៊ុន THACO AGRI បានឲ្យដឹងថា បច្ចុប្បន្ន ខាងក្រុមហ៊ុន THACO AGRI កំពុងត្រូវការកម្លាំងពលកម្មជាច្រើនពាន់នាក់បន្ថែមទៀត ខណៈដែលក្រុមហ៊ុនមានកម្លាំងកម្មករស្រាប់ ប្រមាណជា ៧ពាន់នាក់ ហើយត្រូវការជ្រើសរើសពលករប្រមាណជា ៣ ពាន់ នាក់បន្ថែមទៀត ដើម្បីបំពេញតាមតម្រូវការក្រុមហ៊ុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាម លោក លៃ លីន បានឲ្យដឹងថា ក្រុមហ៊ុន THACO AGRI មានទីតាំងនៅភូមិស្រែថ្មី ឃុំឃ្សឹម ស្រុកស្នួល ខេត្តក្រចេះ ដោយបច្ចុប្បន្នក្រុមហ៊ុន THACO AGRI បានវិនិយោគទុនលើផ្ទៃដីកសិកម្មទំហំ ប្រមាណជាង ១ម៉ឺនហិកតា និងវិនិយោគលើវិស័យកសិកម្ម មានដូចជា ការដាំចេក ចិញ្ចឹមគោ មាន់ ត្រី ជ្រូក ដាំទុរេន និងផ្ទះត្រចៀកកាំ ជាដើម ដែលបាននឹងកំពុងដំណើរការសព្វថ្ងៃនេះ ។

«តាមរយៈកិច្ចសហការជាមួយមន្ទីរការងារបណ្តុះបណ្តាលវិជ្ជាជីវៈខេត្ត ក៏ដូចជា នៅវិទ្យាស្ថានពហុបច្ចេកទេសភូមិភាគតេជោសែនឦសាន ខេត្តក្រចេះ ក្រុមហ៊ុន THACO AGRI បានផ្តល់ការងារដល់ប្អូនៗរៀនចេះជាប់ជំនាញវិជ្ជាជីវៈ ប្រមាណជាង ២០ នាក់មកហើយ មកដល់ពេលនេះ អ្នកកំពុងហាត់ការ ក៏មានដូចគ្នា។» លោក លៃ លីន បន្ថែមបែបនេះ។

លោកបានបញ្ជាក់ថា ក្រុមហ៊ុន THACO AGRI ចាំទទួលយកយុវជនដែលរៀនជំនាញចំណេះវិជ្ជាជីវៈជាប់ និងទើបចុះហាត់ការ ទោះជាប៉ុន្មាននាក់ក៏ដោយ ជាពិសេសជំនាញ ពេទ្យសត្វ មេកានិច និងជាងផ្សារដែក គឺក្រុមហ៊ុនចាំទទួលជានិច្ច បានកាន់តែច្រើនកាន់តែល្អ។

គួរបញ្ជាក់ថា ក្រុមហ៊ុន THACO AGRI ជាក្រុមហ៊ុនរបស់វៀតណាម ទទួលបានដីសម្រាប់វិនិយោគ ជាង ១ម៉ឺន ហិកតា។ ក្នុងនោះ ដំណាំចេក មានផ្ទៃចំនួន ៤៨០០ ហិកតា។ ជារៀងរាល់ឆ្នាំ ចេក ជាង ១០ម៉ឺន តោន ត្រូវបាននាំចេញជារៀងរាល់ឆ្នាំ ត្រូវបាននាំចេញទៅទីផ្សារចិន និងជប៉ុន។