កម្ពុជាចំណេញអ្វីខ្លះពីសង្គ្រាមពន្ធ របស់លោក ដូណាល់ ត្រាំ ជាមួយចិន

បន្ទាប់ពីលោក ដូណាល់ ត្រាំ ទទួលបានជ័យជម្នះក្នុងការបោះឆ្នោតនៅសហរដ្ឋអាមេរិក លោកបាន​គម្រាម​ដំឡើងពន្ធលើទំនិញរបស់ចិនរហូតដល់៦០% ឬច្រើនជាងនេះ។ ប្រសិនបើសហរដ្ឋអាមេរិកនឹងអនុវត្តគោលនយោបាយនេះ នឹងធ្វើឱ្យកម្ពុជាចំណេញ ឬខាតយ៉ាងណា?

អ្នកឧកញា លឹម ហេង អនុប្រធានសភាពាណិជ្ជកម្មកម្ពុជា បានលើកឡើងថា បច្ចុប្បន្ន រូបលោកមិនទាន់អាចវាយតម្លៃបានពីជំហររបស់សហរដ្ឋអាមេរិកបាននៅឡើយទេ ជួនកាលអាចល្អ ហើយក៏អាចមិនល្អដែរ។

លោកប្រាប់ថា កន្លងមក ការដំឡើងពន្ធអាមេរិក ជាមួយចិន កើតឡើង ដែលវាជា​ឱកាស​របស់កម្ពុជា ដែលធ្វើឱ្យអ្នកវិនិយោគចិន គាត់ងាកមក​វិនិ​យោគនៅកម្ពុជា នាំចេញទៅ​អាមេរិក ដែលជាសញ្ញាល្អ។

អ្នកឧកញា លឹម ហេងថ្លែងថា៖ «ការបញ្ចប់សង្គ្រាមរុស្ស៊ី-អ៊ុយក្រែន (យើងមិនមែន​ថាយើង​ចង់ឱ្យគេបន្តសង្គ្រៀមទេ យើងចង់ឱ្យគេចប់សង្គ្រាមដែរ) កន្លងមក ទំនិញកសិផលរបស់​កម្ពុជាជាច្រើន មានតម្លៃល្អ ហើយបើចប់សង្គ្រាម នោះក៏​អាចនឹងប៉ះពាលដល់ស្រូវ អង្កររបស់​កម្ពុជាដែរ ដូច្នេះ យើងមិនទាន់ដឹងច្បាប់សថា សេដ្ឋកិច្ចល្អ ឬមិនល្អទេ ចាំមើលសិន»។

បើតាមអ្នកឧកញា លឹម ហេង កម្ពុជាកំពុងពឹងផ្អែកលើកិច្ចព្រមព្រៀងពាណិជ្ជកម្មសរី ដែលកំពុង​អនុវត្តជាមួយចិន ប្រទេសកូរ៉ និងថ្នាក់តំបន់សេដ្ឋកិច្ចពិសេស។

អ្នកឧកញា លឹម ហេង បញ្ជាក់ថា៖ «អ្នកផលិតនៅប្រទេសចិន ដែលនាំទៅសហគមអឺរ៉ុប​ក៏ដោយដែលដំឡើងពន្ធដាក់គ្នា ក្រុមហ៊ុនមួយចំនួន កន្លងមក យើងឃើញមកច្រើនហើយ បើសិនមានការដំឡើងពន្ធដាក់គ្នាទៀត ខ្ញុំជឿថា ក្រុមហ៊ុនចិនដែលកំពុងផលិតនាំ​ចេញទៅ​អាមេរិក នឹងមកស្រុកខ្មែរកាន់តែច្រើន»។

លោកបណ្ឌិត ហុង វណ្ណៈ អ្នកជំនាញ​សេដ្ឋកិច្ច​នៃ​រាជបណ្ឌិត្យសភាកម្ពុជា យល់ឃើញថា លោក ដូណាល់ ត្រាំ ជាពាណិជ្ជករធំ ហើយរាជរដ្ឋាភិបាលកម្ពុជាមានទំនាក់ទំនងល្អជាមួយអាមេរិក ខណៈការបញ្ជាទិញរបស់អាមេរិកពីកម្ពុជាមានកំណើនរាល់ឆ្នាំ។

លោកបណ្ឌិត ហុង វណ្ណៈ លើកឡើងថា៖ «អាមេរិកជាប្រទេសដែលមានតម្រូវការ ហើយគោលនយោបាយអាមេរិកនឹងបន្ត ពីលោក ចូ បៃឌិន ដែលមានតម្រូវការទំនិញមួយចំនួន ពីតំបន់អានស៊ាន និងការលើកទឹកចិត្ត អាស៊ានផង»។

លោកបណ្ឌិត ហុង វណ្ណៈយល់ឃើញថា៖ «ខ្ញុំគិតថា គោលនយោបាយការបរទេសរបស់អាមេរិក នឹងនៅតែបន្តការផ្ដល់ការអនុគ្រោះក្នុងការនាំចូលទំនិញពីកម្ពុជា ខ្ញុំគិតថាមិនមានប៉ះពាល់អ្វីទេ ហើយបើលោក ដូណាល់ ត្រាំ អនុវត្តតាមអ្វីដូចគាត់ឃោសនាបោះឆ្នោត ខ្ញុំគិតថា ពិភពលោកនេះ នឹងមានភាពល្អប្រសើរ»៕

អត្ថបទ៖ ឡេង ដេត