មន្ត្រីកសិកម្ម ប្រតិកម្មមតិលើកឡើងថា «ស្រូវមួយគីឡូ មិនស្មើស្រាបៀរមួយកំប៉ុង»

លោក ឃឹម ហ្វីណង់ អនុរដ្ឋលេខាធិការ នៅថ្ងៃទី ១៩ ខែវិច្ឆិកា ឆ្នាំ ២០២៤​បានថ្លែង​ប្រតិកម្ម​នឹង​ការបញ្ចេញ​មតិមួយដែល​លើក​ឡើងថា ស្រូវមួយគីឡូមិនស្មើនឹងស្រាមួយកំប៉ុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃឹម ហ្វីណង់ លើកឡើងនៅលើបណ្ដាញសង្គមហ្វេសប៊ុកថា៖ «បើពិតជាអញ្ចឹងមែន អាចសាកល្បងគណនាតួលេខជាមួយខ្ញុំបាន។ កម្ពុជាមានផ្ទៃដីអាចធ្វើស្រែបានជាង ៣លានហិកតា និងផលិតស្រូវបានប្រហែល ១៣លានតោន ថ្លៃស្មើនឹងស្រា ១៣ពាន់លានកំប៉ុង។ ទោះបីថ្លៃស្រូវត្រឹមតែ ១គីឡូ១០០០៛ ក៏កសិករអាចចំណេញដែរ មិនចាំបាច់ថ្លៃស្មើស្រា១កំប៉ុងទេ គិតលេងៗក៏គង់បាន ៣-៤ពាន់លានដុល្លារ»។

បើតាមលោក ឃឹម ហ្វីណង់​អ្វីដែលយើងគួរប្រឹងធ្វើបន្ថែមទៀត​នោះគឺរិះរកវិធីកាត់បន្ថ​យថ្លៃដើមឱ្យកាន់តែទាប មិនមែនប្រឹងតម្លើងថ្លៃនោះទេ។ ថ្លៃស្រូវរាល់ថ្ងៃនេះធ្វើឱ្យអង្ករយើងពិបាក​ប្រកួតប្រជែងជាមួយអង្ករថៃនិងអង្ករវៀតណាមបាត់ទៅហើយ កុំថាឡើយតម្លើងថ្លៃខ្ពស់ជាងនេះ។

លោក ឃឹម ហ្វីណង់ ណែនាំថា កុំមើលងាយការចូលរួមនៃតម្លៃស្រូវចំពោះសេដ្ឋកិច្ចជាតិឱ្យសោះ មុខរបរនេះបានផ្តល់ប្រាក់ចំណូលដល់បងប្អូនកសិករជាង ២លានគ្រួសារ និងបានផ្គត់ផ្គង់អង្ករឱ្យ​ខ្មែរហូប​ពេញមួយប្រទេស ហើយនៅសល់សម្រាប់នាំចេញទៀតផង។

រហូតមកដល់ពេលនេះមិនទាន់មានដំណាំណាមួយធំជាងស្រូវនៅឡើយទេ ហើយក៏គេមិនដែល​លក់​ស្រូវម្តង១គីឡូ ឬធ្វើស្រែម្តង១០ម៉ែត្រការ៉េ ដូចផឹកស្រាម្តងមួយកំប៉ុងដែរ៕