កម្ពុជាកំពុងបន្តចរចាកិច្ចព្រមព្រៀង DTA ជាមួយប្រទេស៦បន្ថែមទៀត

លោកឧបនាយករដ្ឋមន្រ្តី និងជារដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានលើកឡើងថាគិតត្រឹមចុងខែវិច្ឆកាឆ្នាំ២០២៤ រដ្ឋាភិបាលកម្ពុជាកំពុងធ្វើការចរចាលើកិច្ចព្រមព្រៀងពន្ធត្រួតគ្នា (DTA)  ជាមួយប្រទេស៦ទៀតទាំងនៅក្នុងតំបន់ និងអឺរ៉ុបដើម្បីបង្ក​របរិយាកាសវិនិយោគ និងធុរកិច្ចនៅកម្ពុជាឱ្យកាន់តែមានភាពទាក់ទាញ។

ថ្លែងក្នុងកម្មវិធីមួយកាលពីចុងខែវិច្ឆិកា លោក អូន ព័ន្ធមុនីរ័ត្នថា​រាជរដ្ឋាភិបាល​បន្តខិតខំប្រឹងប្រែងយ៉ាងសកម្ម​ដើម្បីបង្កើតបរិយាកាសអំណោយផលសម្រាប់ធុរកិច្ច និងការវិនិយោគអន្តរជាតិតាមរយៈការចរចាជាបន្ត​បន្ទាប់លើកិច្ចព្រមព្រៀង​DTA​ជាមួយប្រទេសជាច្រើនក្នុងតំបន់ និងសកលលោក។

លោកថា៖«គិតត្រឹមពេលនេះ (ខែវិច្ឆិកា) កម្ពុជាបានបញ្ចប់ការចរចា DTAs ជាមួយប្រទេសចិន រួមមានហុងកុង និងម៉ាកាវ សិង្ហបុរី ប្រ៊ុយណេ ថៃ ឥណ្ឌូនេស៊ី វៀតណាម ម៉ាឡេស៊ី កូរ៉េ តួគី ហ្វីលីពីន (នឹងអនុវត្តន៍ឆាប់ៗ) និងឡាវ។ ហើយកិច្ច​ព្រមព្រៀង​ទាំង​អស់នោះគឺកំពុង​ត្រូវបាន​អនុវត្តន៍នាពេលបច្ចុប្បន្ន ​ ​។ លើសពីនោះទៅទៀត កម្ពុជាក៏​កំពុង​​ចរចា​​ជាមួយប្រទេស​មី​យ៉ាន់​ម៉ា អារ៉ាប់​រួម ជប៉ុន ម៉ារ៉ុក កាតា និង​បារាំងផងដែរ»​។

លោក លឹម ហេង អនុប្រធានសភាពាណិជ្ជកម្មកម្ពុជាមានប្រសាសន៍ថា DTA ត្រូវបានរៀបចំឡើងដើម្បីការពារអ្នកវិនិយោគពីការយកពន្ធទ្វេរដង ហើយនឹងអនុញ្ញាតឱ្យបង់ពន្ធលើប្រាក់ចំណូលនៅពេលណាដែលបុគ្គល ឬក្រុមហ៊ុនរកប្រាក់ចំណេញ។

លោកបាននិយាយថា ការបង់ប្រាក់លើសនៅក្នុងប្រទេសកំណើតរបស់អ្នកជាប់ពន្ធនឹងត្រូវកាត់ជាទម្រង់នៃការ លើកលែង ។

លោកបាននិយាយថា៖« កិច្ចព្រមព្រៀងនេះនឹងផ្តល់អត្ថប្រយោជន៍ដល់ពាណិជ្ជករហ្វីលីពីនដោយមិនឱ្យពួកគេបង់ពន្ធទ្វេរដងលើប្រាក់ចំណេញ ហើយនឹងជំរុញពាណិជ្ជកម្មទ្វេភាគីរវាងប្រទេសទាំងពីរទៀតផង» ។

​ក្នុងដំណើរទស្សនកិច្ចផ្លូវការនៅកម្ពុជាក្នុងពេលដែលនាយករដ្ឋមន្ត្រីឡាវ លោក សន សៃស៊ីផាន់ដន ​កាលពីថ្ងៃទី០៤ ​កម្ពុជា និងឡាវ បានចុះអនុស្សរណៈនៃការយោគយល់គ្នា លើកិច្ចព្រមព្រៀងស្តីពីការលុបបំបាត់ការយកពន្ធត្រួតគ្នា ពាក់ព័ន្ធនឹងពន្ធលើប្រាក់ចំណូល និងការបង្ការ ការគេចវេះពន្ធ និងការចៀសវាងពន្ធ។ ការចុះព្រមព្រៀងនេះ ធ្វើឡើងក្រោមអធិបតីភាព សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោក សនសៃ ស៊ីផាន់ដន (Sonexay SIPHANDONE) នាយករដ្ឋមន្ត្រីឡាវ។

ជាមួយគ្នានេះដែរ ការចរចាស្តីពី DTA កម្ពុជា-ហ្វីលីពីន ក៏គ្រោងនឹងចុះហត្ថលេខា​និង​អនុវត្តន៍នាឆ្នាំ២០២៥ខាងមុខនេះផងដែរ៕