ព័ត៌មានអន្ដរជាតិ

ការសិក្សា៖ ប្រាក់ខែជាមធ្យមនៅថៃ នឹងកើនឡើង ៥ ភាគរយ នៅឆ្នាំ ២០២៥

បានផុស

២ years មុន

នៅ

ថ្ងៃសុក្រ ១៣ ធ្នូ ២០២៤

ដោយ

ការសិក្សារបស់ក្រុមហ៊ុនប្រឹក្សាធនធានមនុស្ស និងសេវាកម្មវិជ្ជាជីវៈ Mercer បានឱ្យដឹងថា ប្រាក់បៀវត្សរ៍ជាមធ្យមរបស់និយោជិតនៅក្នុងប្រទេសថៃ រំពឹងថានឹងកើនឡើង ៥ ភាគរយ ក្នុងឆ្នាំ ២០២៥ ដែលស្មើនឹងអត្រាកំណើននៅឆ្នាំនេះ។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍ស្ទង់មតិប្រាក់ឈ្នួលសរុបរបស់ក្រុមហ៊ុន Mercer ឆ្នាំ ២០២៤ បានវិភាគពីនិន្នាការ និងគោលនយោបាយនៃប្រាក់ឈ្នួលនៅលើតួនាទីការងារជាង ៥ ០០០ កន្លែង ក្នុងក្រុមហ៊ុនជាង ៧០០ ទូទាំងប្រទេសថៃ។ ការវិភាគបានរកឃើញថា ប្រាក់បៀវត្សរ៍ត្រូវបានកំណត់ឱ្យកើនឡើងក្នុងអត្រាដូចគ្នានឹងឆ្នាំ ២០២៤ ដោយក្រុមហ៊ុនទាំងអស់ដែលត្រូវបានស្ទង់មតិបានកំណត់ថា នឹងបង្កើនប្រាក់ឈ្នួលនៅឆ្នាំ ២០២៥។

ការសិក្សារបស់ Mercer បានបន្តថា កត្តាសំខាន់ៗដែលជះឥទ្ធិពលលើការដំឡើងប្រាក់បៀវត្សរ៍ក្នុងឆ្នាំ ២០២៥ គឺការអនុវត្តការងាររបស់បុគ្គលម្នាក់ៗ អត្រាប្រាក់បៀវត្សរ៍ ដំណើរការរបស់ក្រុមហ៊ុន និងការប្រកួតប្រជែងរបស់ក្រុមហ៊ុននៅក្នុងទីផ្សារការងារ។

ចំនួន ៩១ ភាគរយ នៃក្រុមហ៊ុនដែលត្រូវបានស្ទង់មតិ បានឱ្យដឹងថា ខ្លួនមានផែនការលើកទឹកចិត្តរយៈពេលខ្លីដូចជាប្រាក់រង្វាន់ ខណៈភាគរយនៃក្រុមហ៊ុនដែលផ្តល់ការលើកទឹកចិត្តរយៈពេលវែងវិញ ក៏បានកើនឡើងផងដែរ ពី ៧៨,៩ ភាគរយ នៅឆ្នាំ ២០២៣ ដល់ ៨០,៧ ភាគរយ ក្នុងឆ្នាំ ២០២៤។

ឧស្សាហកម្មទំនិញប្រើប្រាស់ផ្ដោតលើប្រាក់ខែគោល រួមចំណែក ៧៥ ភាគរយ នៃប្រាក់ឈ្នួលសរុប។ ឧស្សាហកម្មរថយន្តវិញ ផ្តល់នូវការលើកទឹកចិត្តរយៈពេលខ្លីខ្ពស់បំផុត ដោយរួមចំណែក ២៣ ភាគរយ នៃប្រាក់ឈ្នួលសរុប។ វិស័យវិទ្យាសាស្ត្រជីវិត បន្តទទួលបានប្រាក់ឈ្នួលខ្ពស់បំផុតនៅក្នុងប្រទេសថៃ ដោយផ្ដល់ប្រាក់ខែ ២០ ភាគរយ ខ្ពស់ជាងប្រាក់ខែគោលជាតិប្រចាំឆ្នាំ។

នាយកផ្នែកការងារនៅក្រុមហ៊ុន Mercer ប្រចាំប្រទេសថៃ លោក Thira Laulathaphol បាននិយាយថា៖ «ការដំឡើងប្រាក់ខែជាមធ្យម ៥ ភាគរយ នៅឆ្នាំ ២០២៥ ឆ្លុះបញ្ចាំងពីការប្តេជ្ញាចិត្តជាបន្តបន្ទាប់របស់ក្រុមហ៊ុនថៃក្នុងការវិនិយោគលើកម្លាំងពលកម្មរបស់ខ្លួន»។ លោកបន្តថា ច្បាស់ណាស់ថា ប្រទេសថៃមានទីផ្សារការងារប្រកួតប្រជែង ដែលឆ្លុះបញ្ជាំងតាមរយៈការណ៍ដែលថា ក្រុមហ៊ុនទាំងអស់មានគោលនយោបាយដំឡើងប្រាក់ខែ៕