ព័ត៌មានអន្ដរជាតិ

ក្រុមហ៊ុនសិង្ហបុរី និងវៀតណាម ចរចាគ្នាពីការដាក់ខ្សែកាបក្រោមសមុទ្រថ្មី ដើម្បីជំរុញវិស័យទិន្នន័យ

បានផុស

៦ ខែ មុន

នៅ

ថ្ងៃសុក្រ ១៣ ធ្នូ ២០២៤

ដោយ

ក្រុមហ៊ុនគ្រប់គ្រងទ្រព្យសម្បត្តិសិង្ហបុរី Keppel និងក្រុមហ៊ុនពហុវិស័យវៀតណាម Sovico Group កំពុងពិភាក្សាគ្នាអំពីផែនការដាក់បណ្ដាញខ្សែកាបអុបទិកក្រោមបាតសមុទ្រថ្មី ដើម្បីជួយជំរុញឧស្សាហកម្មមជ្ឈមណ្ឌលទិន្នន័យក្នុងតំបន់។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ដែលស្រង់សម្ដីប្រភពដឹកពីបញ្ហានេះជាអនាមិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បណ្តាប្រទេសនៅអាស៊ីអាគ្នេយ៍ទាំង២ កំពុងស្វែងរកការពង្រីកបណ្តាញខ្សែកាបរបស់ខ្លួន ដើម្បីបំពេញតម្រូវការដែលកំពុងកើនឡើងសម្រាប់សេវាបញ្ញាសិប្បនិម្មិត (AI) និងមជ្ឈមណ្ឌលទិន្នន័យ។ វៀតណាមផ្ទាល់ គ្រោងនឹងមានខ្សែកាបក្រោមទឹកថ្មីចំនួន ១០ ត្រឹមឆ្នាំ២០៣០។

ប្រភព ៥ រូប ដែលពាក់ព័ន្ធដោយផ្ទាល់នឹងការចរចា បាននិយាយថា នៅក្រោមផែនការទី១ដែលកំពុងពិភាក្សាគ្នា ខ្សែមួយខ្សែនឹងត្រូវដាក់ដើម្បីភ្ជាប់ប្រទេសវៀតណាមដោយផ្ទាល់ ជាមួយសិង្ហបុរី ក្នុងតម្លៃប្រមាណ ១៥០ លានដុល្លារ។ ប្រភព២រូបនិយាយថា ក្រុមហ៊ុន Sovico បានពេញចិត្តនឹងជម្រើសនេះ យ៉ាងណាមិញ មិនទាន់មានកិច្ចព្រមព្រៀងណាមួយត្រូវបានសម្រេចឡើងនៅឡើយទេ ខណៈក្រុមហ៊ុន Keppel ចង់បានជម្រើសដែលធំជាងនេះ ដោយពាក់ព័ន្ធនឹងក្រុមវិនិយោគិនច្រើន។

ប្រភព៣រូប បាននិយាយថា ក្រោមផែនការទី២ ការតភ្ជាប់ខ្សែកាបទៅកាន់ប្រទេសវៀតណាមដែលធ្វើដោយក្រុមហ៊ុន Sovico នឹងក្លាយជាផ្នែកមួយនៃខ្សែកាបវែងដែលតភ្ជាប់ពីសិង្ហបុរី ទៅជប៉ុន ហើយភ្ជាប់ជាមួយប្រទេសនានាតាមបណ្ដោយផ្លូវ។

ក្រុមហ៊ុន Sovico ដែលមានក្រុមហ៊ុនបុត្រសម្ព័ន្ធផ្នែកអាកាសចរណ៍ និងធនាគារ ថ្មីៗនេះ បានប្រកាសពីផែនការលើការអភិវឌ្ឍន៍មជ្ឈមណ្ឌលទិន្នន័យ។ ចំណែកឯក្រុមហ៊ុន Keppel វិញ បានយល់ព្រមក្នុងខែវិច្ឆិកា ដើម្បីទិញមជ្ឈមណ្ឌលទិន្នន័យ AI ក្នុងប្រទេសជប៉ុន។ សិង្ហបុរី ត្រូវបានគេស្គាល់ថាជាមជ្ឈមណ្ឌលដ៏សំខាន់សម្រាប់មជ្ឈមណ្ឌលទិន្នន័យ និងខ្សែកាបក្រោមសមុទ្រ។

គួរបញ្ជាក់ថា ខ្សែកាបក្រោមសមុទ្រគឺជាស្នូលនៃសង្រ្គាមបច្ចេកវិទ្យាចិន-អាមេរិក ដោយមហាអំណាចទាំង២ កំពុងប្រជែងគ្នាដើម្បីឈ្នះកិច្ចសន្យា ជាពិសេសនៅអាស៊ី ដើម្បីបង្កើត និងថែរក្សាហេដ្ឋារចនាសម្ព័ន្ធយុទ្ធសាស្ត្រដែលផ្ទុកទិន្នន័យអ៊ិនធឺណិតភាគច្រើន រួមទាំងព័ត៌មានរសើបផងដែរ។

ក្រោមផែនការបឋម មិនមានការសម្រេចចិត្តណាមួយត្រូវបានធ្វើឡើងអំពីក្រុមហ៊ុនប្រទេសណានឹងសាងសង់គម្រោងខ្សែកាបថ្មីនោះទេ ប៉ុន្តែប្រភព២រូបអះអាងថា ក្រុមហ៊ុនម៉ៅការចិន នឹងមិនពាក់ព័ន្ធនឹងការតភ្ជាប់ខ្សែកាបក្រោមបាតសមុទ្រផ្ទាល់រវាងប្រទេសវៀតណាម និងសិង្ហបុរីនោះទេ៕