ព័ត៌មានអន្ដរជាតិ

ប្រជាជនវៀតណាមបាត់បង់ប្រាក់ជាង ៧០០ លានដុល្លារ ដោយសារការឆបោកអនឡាញ នៅឆ្នាំនេះ

បានផុស

១ year មុន

នៅ

ថ្ងៃពុធ ១៨ ធ្នូ ២០២៤

ដោយ

សមាគមសន្តិសុខអ៊ិនធឺណិតជាតិវៀតណាម បានឱ្យដឹងថា ប្រជាជនវៀតណាមម្នាក់ក្នុងចំណោម ២២០ នាក់ ដែលប្រើប្រាស់ស្មាតហ្វូន គឺជាជនរងគ្រោះនៃការបោកប្រាស់តាមអនឡាញ ដែលធ្វើឱ្យពួកគេបាត់បង់សរុបជាទឹកប្រាក់ប្រមាណ ៧៤៤ លានដុល្លារ គិតតែក្នុងឆ្នាំ ២០២៤។ នេះបើតាមការចុះផ្សាយរបស់កាសែត VnExpress។

សមាគមបានឱ្យដឹងយ៉ាងដូច្នេះ ក្រោយចេញផ្សាយនូវរបាយការណ៍ស្ទង់មតិលើអ្នកប្រើប្រាស់អ៊ិនធឺណិតប្រមាណជាង ៥៩ ០០០ នាក់ ទូទាំងប្រទេស។ លទ្ធផលនៃការស្ទង់មតិបានបង្ហាញថា ការឆបោកពាក់ព័ន្ធនឹងការវិនិយោគ គឺជារឿងដែលបានកើតឡើងច្រើនជាងគេបំផុត ហើយបន្ទាប់មកទៀតគឺការក្លែងធ្វើជាមន្ត្រីរដ្ឋាភិបាល ឬអង្គការ និងការផ្តល់ជូនរង្វាន់ និងការផ្សព្វផ្សាយក្លែងក្លាយជាដើម។

លទ្ធផលបង្ហាញទៀតថាប្រហែល ៧០ ភាគរយ នៃអ្នកប្រើប្រាស់ស្មាតហ្វូន បានជួបប្រទះការឆបោកពាក់ព័ន្ធនឹងហិរញ្ញវត្ថុ ដោយឧក្រិដ្ឋជនសន្យាផ្តល់ផលចំណេញខ្ពស់ដោយគ្មានហានិភ័យ។ ជាមួយគ្នានោះ មានតែ ៤៥,៦៩ ភាគរយ នៃជនរងគ្រោះប៉ុណ្ណោះ ដែលបានរាយការណ៍ពីការឆបោកទៅអាជ្ញាធរ ខណៈដែល ៨៨,៩៨ ភាគរយ បាននិយាយប្រាប់មិត្តភក្តិ និងក្រុមគ្រួសារអំពីបទពិសោធន៍របស់ខ្លួន។

ជារឿយៗ អ្នកបោកប្រាស់បានបង្ខិតបង្ខំជនរងគ្រោះឱ្យផ្ទេរប្រាក់ ឬដំឡើងកម្មវិធីទូរស័ព្ទដែលផ្ទុកមេរោគជាដើម។ ជនរងគ្រោះខ្លះ បានទទួលសារចម្លែកៗអំពីការឈ្នះរង្វាន់ធំៗផ្សេងៗ។ លើសពីនេះ អ្នកបោកប្រាស់បានបង្កើនការប្រើប្រាស់បច្ចេកវិជ្ជាទំនើបៗដូចជា AI ក្លែងក្លាយ ដើម្បីបង្កើតវីដេអូ សារជាសំឡេង ឬកិច្ចសន្ទនាក្លែងក្លាយជាដើម៕