តម្លៃទីផ្សារម្រេចកើនឡើងខ្ពស់ ធ្វើឱ្យកម្ពុជារក​ចំណូល​បានជាង ៣៤ លានដុល្លារ ពីការនាំចេញ

គិតត្រឹមរយៈពេល ១១ ខែ ឆ្នាំ ២០២៤ កម្ពុជារកចំណូលបានជាង ៣៤ លានដុល្លារ ពីការនាំ​ចេញ​ម្រេច កើនឡើងជិត ១៥០% បើធៀបនឹងរយៈពេលដូចគ្នាកាលពីឆ្នាំមុន។ នេះបើយោង​តាមរបាយការណ៍របស់​ក្រសួង​ពាណិជ្ជកម្ម។

លោក ម៉ាក់ នី ប្រធានសហព័ន្ធម្រេច និងគ្រឿងទេសកម្ពុជា ប្រាប់កម្ពុជាថ្មីនៅថ្ងៃទី ២៥ ខែធ្នូ ឆ្នាំ ២០២៤ នេះថា កត្តាដែលធ្វើឱ្យទឹកប្រាក់នាំចេញម្រេចកើនឡើងខ្ពស់ ដោយសារតែតម្លៃ​ម្រេច​បាន​កើនឡើងជាង ១០០% បើធៀបនឹងឆ្នាំមុន ខណៈកសិករមួយចំនួនបានស្ដុកម្រេចទុក នៅចំ​ពេល​​ដែលតម្លៃធ្លាក់ចុះនៅក្នុងឆ្នាំនេះ។

បើតាមលោក ម៉ាក់ នី ការនាំចេញម្រេចកម្ពុជាជាផ្លូវការសម្រេចបានប្រមាណ ៦ ពាន់តោន នៅ​ក្នុងឆ្នាំ ២០២៤ ខណៈនៅមានការនាំចេញក្រៅផ្លូវការមួយចំនួនទៀត។

លោក ងិន ឆាយ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋាន​កសិកម្ម មាន​ប្រសាសន៍ថា ផលិតកម្មដំណាំកសិកម្ម និងការនាំចេញក្នុងឆ្នាំ ២០២៤ ដំណើរការបានល្អ ទទួលបានលើសផែនការ។

តម្លៃម្រេចធម្មតានៅ​កម្ពុជា​​បានហក់ឡើងទ្វេដងរហូតដល់ជិត ៣ ម៉ឺនរៀលក្នុងមួយគីឡូក្រាម បើធៀបនឹង​តម្លៃ​ក្នុង​ឆ្នាំ ២០២៣ ដែលលក់បានត្រឹមជាង ១ ម៉ឺនរៀលក្នុងមួយគីឡូក្រាម។ នៅក្នុងមួយឆ្នាំកម្ពុជាប្រមូលផលម្រេច​បានក្នុងរង្វង់ ១,៧​-២ ម៉ឺនតោន​លើផ្ទៃ​ដី​ជាង ៦ ពាន់​ហិកតា​។

ទីផ្សារម្រេចកម្ពុជា ត្រូវបាននាំទៅកាន់ប្រទេសវៀតណាមប្រមាណ ៨០ ភាគរយ និងប្រទេស​បន្ទាប់បន្សំដូចជា ចិន តៃវ៉ាន់ ថៃ ជប៉ុន កូរ៉េ និងសហគមនអឺរ៉ុបជាដើម៕

អត្ថបទ៖ ឡេង ដេត