ទូរថភ្លើងដឹកទំនិញរបស់ក្រុមហ៊ុន Royal Railway ចំនួន ៤៤ គ្រឿងទៀត បានដឹកមកដល់កម្ពុជា

ទូរថភ្លើងដឹកទំនិញថ្មីដែលក្រុមហ៊ុន Royal Railway បានបញ្ជាទិញពីប្រទេសចិនចំនួន ៤៤ គ្រឿងបន្ថែមទៀត បានដឹកមកដល់កម្ពុជានៅថ្ងៃទី ១៤ ខែមករា ឆ្នាំ ២០២៥។

នេះជាការមកដល់លើកទី៣ នៃទូរថភ្លើង ដែលក្រុមហ៊ុន Royal Railway បានបញ្ជាទិញពីប្រទេសចិនសរុបចំនួន ២២១ គ្រឿង ដែលលើកទី១ បានមកដល់កាលពីថ្ងៃទី ០១ ខែធ្នូ ចំនួន ៦០ គ្រឿង ជើងទី២ចំនួន ៣៦ គ្រឿង និងជើង​ទី៣នេះ ៤៤ គ្រឿង។

ទូរថភ្លើងដែលផលិតនៅប្រទេសចិននេះមានសមត្ថភាពសម្រាប់ការផ្គត់ផ្គង់ការដឹកជញ្ជូនដូចជាកុងតឺន័រ គ្រឿងចក្រ ឬសម្ភារៈសំណង់ ខ្សាច់ ឬទំនិញផ្សេងៗ រថភ្លើងដឹកទំនិញទាំងនេះនឹងជាការឆ្លើយតបល្អប្រសើរទៅនឹងតម្រូវការដឹកជញ្ជូនតាមរយៈផ្លូវដែកក្នុងប្រទេសកម្ពុជា។

នេះជាការបោះជំហានទៅមុខដ៏សំខាន់មួយនៅក្នុងការប្តេជ្ញាចិត្តរបស់ ក្រុមហ៊ុនរ៉ូយ៉ាល់រេលវេ ក្នុងការផ្តល់ជូននូវសេវាកម្មដឹកជញ្ជូនទំនិញតាមរយៈផ្លូវដែក ប្រកបដោយប្រសិទ្ធភាព និងគួរឱ្យទុកចិត្តនៅទូទាំងប្រទេសកម្ពុជា។

ការបញ្ជាទិញនេះក៏ជាផ្នែកមួយនៃផែនការវិនិយោគរបស់ អ្នកឧកញ៉ា គិត ម៉េង ក្នុងការបង្កើនទូរថភ្លើងដឹកទំនិញសរុបចំនួន ២២១ គ្រឿង ដែលបានមកដល់ដោយជោគជ័យសរុប ១៤០ គ្រឿងហើយគិតត្រឹមថ្ងៃនេះ។ នេះបានបង្ហាញពីការប្តេជ្ញាចិត្តយ៉ាងសំខាន់ក្នុងការអភិវឌ្ឍហេដ្ឋារចនាសម្ព័ន្ធផ្លូវដែករបស់កម្ពុជា ជាមួយនឹងការពង្រីកយុទ្ធសាស្ត្រ ក្រោមគោលបំណងពង្រឹងសមត្ថភាព និងប្រសិទ្ធភាពបន្ថែមទៀត ដោយពង្រឹងជំហររបស់ខ្លួនជាដែលផ្នែកមួយដ៏សំខាន់ក្នុងវិស័យដឹកជញ្ជូនរបស់ប្រទេសកម្ពុជា៕