ទូរថភ្លើងថ្មី ៦០ គ្រឿង ក្នុងចំណោម ២២១ គ្រឿងដែលក្រុមហ៊ុន Royal Railway បញ្ជាទិញ​ពីចិន ​បាន​ដឹក​មក​ដល់កំពង់ផែព្រះសីហនុ

ទូរថភ្លើងថ្មីចំនួន ៦០ គ្រឿង ក្នុងចំណោម ២២១ គ្រឿងដែលក្រុមហ៊ុន Royal Railway ដែល​បញ្ជាទិញពីប្រទេសចិនបានដឹកមកដល់កំពង់ផែខេត្តព្រះសីហនុនៅយប់ថ្ងៃទី ០១ ខែធ្នូ ឆ្នាំ ២០២៤។

ការនាំចូលបន្ថែមនៃទូរថភ្លើងដឹកទំនិញថ្មីនេះនឹងជួយជំរុញបន្ថែមនូវសមត្ថភាពសេវាកម្មរបស់ក្រុមហ៊ុន រ៉ូយ៉ាល់រេលវេ ក្នុងការបំពេញតម្រូវការសេវាកម្មផ្នែកដឹកជញ្ជូនដែលកំពុងកើនឡើង ក៏ដូច​ជា​សម្រួលដល់ការដឹកជញ្ជូនទំនិញ និងមានប្រសិទ្ធភាពសម្រាប់អាជីវកម្មទូទាំងប្រទេស។ ទូរថភ្លើងនឹងដាក់ឱ្យដំណើរការភ្លាមៗ បន្ទាប់ពីធ្វើការត្រួតពិនិត្យទៅលើប្រព័ន្ធហ្រ្វាំង និងប្រព័ន្ធ​សុវត្ថិភាពផ្សេងៗ។

សូមបញ្ជាក់ថា ការមកដល់នៃទូរថភ្លើងដឹកទំនិញទាំង ៦០ គ្រឿងនេះជាការចាប់ផ្តើមប៉ុណ្ណោះនៃការ​អភិវឌ្ឍបន្ថែមតាមចក្ខុវ័ស័យរបស់ក្រុមហ៊ុន រ៉ូយ៉ាល់ រេលវេ។ ទូរថភ្លើងដឹកទំនិញ ៦០ គ្រឿងគឺជាផ្នែកទីមួយនៃការបញ្ជាទិញសរុប ២២១​គ្រឿង។

ការមកដល់នៃផ្នែកទីពីរដែលមានចំនួន ៣៥ គ្រឿងរំពឹងថានឹងមកដល់ក្នុងសប្តាហ៍ទី២-៣ ខែធ្នូ ឆ្នាំ ២០២៤ បន្ទាប់មកការដឹកជញ្ជូន ៤៥ គ្រឿងទៀតដែលគ្រោងនឹងដាក់ក្នុងខែមករា ឆ្នាំ ២០២៥ និងបន្តមកដល់ជាបន្តបន្ទាប់ទៀតនៅប៉ុន្មាន​ខែបន្ទាប់៕