ក្រុមហ៊ុនរ៉ូយ៉ាល់ រ៉េលវេ បញ្ជាទិញទូរថភ្លើង ១៥ គ្រឿង បន្ថែមទៀត

ក្រុមហ៊ុន Royal Railway ដែលជាផ្នែកមួយនៃ Royal Group បានបញ្ជាទិញនូវទូរថភ្លើងដឹក​ទំនិញចំនួន១៥​គ្រឿង កង់រថភ្លើងចំនួន ១៥០ឈុត គ្រឿងបន្លាស់ និងគ្រឿងបរិក្ខា​ជាច្រើន​ដើម្បីពង្រឹងនូវសេវាកម្មឱ្យកាន់តែមានប្រសិទ្ធភាព មានសុវត្ថិភាព ទាន់ពេលវេលា ជូនដល់អតិថិជន។

រថភ្លើងដឹកទំនិញទាំងនេះត្រូវបានដឹកមកដោយកប៉ាល់ ហើយបច្ចុប្បន្នកំពុងស្ថិត​ក្រោមដំណើរការត្រួតពិនិត្យយ៉ាងហ្មត់​ចត់លើប្រព័ន្ធហ្រ្វាំង និងប្រព័ន្ធសុវត្ថិភាពផ្សេងៗ ដើម្បីធានាបាននូវស្តង់ដារខ្ពស់បំផុត មុនពេលដាក់អោយដំណើរការអាជីវកម្មជាផ្លូវការ​នៅថ្ងៃទី២១ ខែឧសភា ឆ្នាំ២០២៥។

ការវិនិយោគនេះបង្ហាញពីភាពខិតខំប្រឹងប្រែងរបស់ ក្រុមហ៊ុនរ៉ូយ៉ាល់ រ៉េលវេ ក្នុងការពង្រឹងសមត្ថភាព​ដឹកជញ្ជូន និងកែលម្អគុណភាពសេវាកម្មឱ្យកាន់តែមានប្រសិទ្ធភាព​កាន់តែខ្ពស់។ រថភ្លើងប្រភេទ Flat Top Wagon នេះត្រូវបានរចនាឡើងដោយមាន​លក្ខណៈពិសេសសម្រាប់ដឹកទំនិញប្រភេទចម្រុះមិនថាជាប្រភេទទូកុងទ័ន័រ ទំនិញដាក់ផ្ទាល់​លើទូរថភ្លើង ឬស៊ីទែនប្រេងសាំង ហ្គាស ខ្សាច់ និងទំនិញផ្សេងៗទៀត។

លោក John Guiry ប្រធាននាយកដ្ឋានប្រតិបត្តិការរបស់ Royal Railway បានមាន​ប្រសាសន៍ថា៖ «ការណែនាំរថភ្លើងថ្មីនេះគឺជាផ្នែកមួយនៃយុទ្ធសាស្ត្រ​របស់យើងក្នុង​ការពង្រឹងសមត្ថភាពដឹកជញ្ជូន និងឆ្លើយតបទៅនឹងតម្រូវការដែលកំពុងកើន​ឡើងរបស់អតិថិជន។ យើងរំពឹងថា វានឹងជួយកាត់បន្ថយពេលវេលាដឹកជញ្ជូន និងបង្កើន​ប្រសិទ្ធភាពដំណើរការរបស់យើងឱ្យកាន់តែប្រសើរ»។

កាលពីដំណាច់ឆ្នាំ២០២៤ និងដើមឆ្នាំ២០២៥នេះ ក្រុមហ៊ុន រ៉ូយ៉ាល់ រ៉េលវេ បាននាំចូលនូវ​ទូរថ​ភ្លើងដឹកចំនួន ១៤០​គ្រឿង​រួចមកហើយពីប្រទេសចិន ហើយបច្ចុប្បន្នកំពុងដាក់ដំណើរការយ៉ាង​សកម្មជូនដល់អតិថិជនដែលប្រើប្រាស់សេវាកម្មដឹកជញ្ជូនតាមរយៈផ្លូវដែក។

ក្រុមហ៊ុន រ៉ូយ៉ាល់ រ៉េលវេ បានប្តេជ្ញាចិត្តក្នុងការបន្តផ្តល់នូវសេវាកម្មអោយ​កាន់តែល្អជូនដល់​អតិថិជនទាំងអស់ និងចូលរួមចំណែកក្នុងការអភិវឌ្ឍន៍ហេដ្ឋារចនាសម្ព័ន្ធ និងសេដ្ឋកិច្ចរបស់​ប្រទេសកម្ពុជា៕