តម្លៃសាច់ជ្រូកនឹងកើនឡើងបន្ដិច ក្នុងឪកាសនៃចូលឆ្នាំចិនខាងមុខនេះ

ប្រធានសមាគមអ្នកចិញ្ចឹមសត្វកម្ពុជា បានឱ្យដឹងថា នាពេលបុណ្យចូលឆ្នាំចិនខាងមុខនេះ តម្លៃសាច់ជ្រូក អាចនឹងឡើងថ្លៃខុសពីថ្ងៃធម្មតាបន្ដិច ខណៈដែលបរិមាណនៃការផ្គត់ផ្គង់សាច់ជ្រូកនៅឆ្នាំនេះ ក៏គ្រប់គ្រាន់។

លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានប្រាប់ កម្ពុជាថ្មី នៅថ្ងៃទី១៥ ខែមករា ឆ្នាំ២០២៥នេះ ថា សម្រាប់ពេលបុណ្យចូលឆ្នាំចិន ដែលនឹងឈានចូលមកដល់នាពេលខាងមុខនេះ តម្រូវការសាច់ជ្រូក នឹងមានកំណើនច្រើនជាងថ្ងៃធម្មតាបន្ដិច ចំណែកតម្លៃអាចថ្លៃជាងថ្ងៃធម្មតាបន្ដិចទៅតាមអាជីវករ នៅតាមផ្សារនានា។

លោក បន្តថា ចំពោះថ្ងៃនេះផ្ទាល់ តម្លៃជ្រូករស់ រក្សាតម្លៃនៅត្រឹម ៨៥០០រៀល ទៅ ៩៥០០រៀល ក្នុងមួយគីឡូ រីឯតម្រូវការក្នុងមួយថ្ងៃ ៨០០០ក្បាល​ ទៅ៩០០០ក្បាល ក្នុងមួយថ្ងៃ។ ចំណែកតម្រូវការសាច់មាន់វិញ អាចមានតម្រូវការចន្លោះពី ១០០០០០ក្បាល ទៅ ២០០០០០ក្បាល ក្នុងនោះ មាន់បីសាសន៍ និងមាន់នៅតាមកសិដ្ឋាន មានតម្លៃខុសគ្នាបន្ដិចបន្ដួច អាចមានតម្លៃត្រឹម ៦០០០រៀល ទៅ៩០០០រៀល ក្នុងមួយគីឡូ។ ដោយឡែកមាន់ស្រែ អាចមានតម្លៃថ្លៃជាងគេបន្ដិច។

លោក ស្រ៊ុន ពៅ បានឱ្យដឹងទៀតថា បច្ចុប្បន្នការចិញ្ចឹមសត្វនៅកម្ពុជា មិនសូវមានបញ្ហាប្រឈមខ្លាំងនោះទេ មានតែការចិញ្ចឹមជ្រូកមួយគត់ ដែលមានបញ្ហាប្រឈម នេះក៏ព្រោះតែបរិមាណនៃការស្រូបទាញទៅកាន់ទីផ្សារប្រចាំថ្ងៃ ហាក់នៅសល់ ដែលនាំឱ្យអ្នកចិញ្ចឹមជ្រូកមិនសូវចំណេញច្រើន៕

អត្ថបទ ៖ សួស សិត