ព័ត៌មានអន្ដរជាតិ

BYD គ្រោងបញ្ចប់ការសាងសងរោងចក្រផលិតរថយន្តអគ្គិសនី ១ ប៊ីលានដុល្លារ នៅឥណ្ឌូណេស៊ី ចុងឆ្នាំនេះ

បានផុស

៥ ខែ មុន

នៅ

ថ្ងៃអង្គារ ២១ មករា ២០២៥

ដោយ

ក្រុមហ៊ុនផលិតរថយន្តអគ្គិសនីចិន BYD គ្រោងនឹងបញ្ចប់ការសាងសង់រោងចក្រផលិតរថយន្តអគ្គិសនីតម្លៃ ១ ប៊ីលានដុល្លាររបស់ខ្លួន ក្នុងប្រទេសឥណ្ឌូណេស៊ី នាចុងឆ្នាំ ២០២៥ នេះ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ដែលស្រង់សម្ដីរបស់ប្រធានក្រុមហ៊ុនប្រចាំប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានក្រុមហ៊ុន BYD ប្រចាំប្រទេសឥណ្ឌូណេស៊ី លោក Eagle Zhao បានថ្លែងប្រាប់កាលពីថ្ងៃចន្ទថា ផែនការរយៈពេលវែងសម្រាប់រោងចក្រនេះ គឺសម្រាប់ទីផ្សារនាំចេញ។ លោកបន្តថា៖ «រាល់ការវិវឌ្ឍនៃរោងចក្រនៅក្នុងតំបន់របស់ពួកយើង ប្រព្រឹត្តទៅដោយរលូនខ្លាំង និងឆ្ពោះទៅមុខ។ យើងនឹងរក្សាការប្ដេជ្ញាចិត្តរបស់យើង ដោយបញ្ចប់ការងារសាងសង់នៅចុងឆ្នាំ ២០២៥»។

គួរគូសបញ្ជាក់ថា រោងចក្រផលិតរថយន្តអគ្គិសនី BYD ឥណ្ឌូណេស៊ី មានទីតាំងនៅខេត្ត ជ្វាខាងលិច និងមានសមត្ថភាពផលិតរថយន្តអគ្គិសនីប្រមាណ ១៥០ ០០០ គ្រឿង/ឆ្នាំ។

ជាមួយនឹងការវិនិយោគនេះ ក្រុមហ៊ុន BYD ទទួលបានការអនុញ្ញាតឱ្យនាំចូលរថយន្តរបស់ខ្លួនទៅកាន់ប្រទេសឥណ្ឌូណេស៊ីជាបណ្ដោះអាសន្ន ដោយមិនជាប់ពន្ធនាំចូល ដែលជាគោលនយោបាយមានគោលបំណងជំរុញតម្រូវការរថយន្តអគ្គិសនី ខណៈទាក់ទាញការវិនិយោគដោយក្រុមហ៊ុនផលិតរថយន្តផ្សេងៗទៀត។ រដ្ឋាភិបាលមានគោលដៅផលិតរថយន្តអគ្គិសនីប្រមាណ ៦០០ ០០០ គ្រឿងក្នុងស្រុក ត្រឹមឆ្នាំ ២០៣០។

BYD ដែលសម្រេចបានលើសគោលដៅលក់រថយន្តរបស់ខ្លួនជាសាកលរហូតដល់ជាង ៤ លានគ្រឿងកាលពីឆ្នាំមុននោះ បាននិងកំពុងបង្កើនវត្តមានរបស់ខ្លួននៅក្នុងតំបន់អាស៊ីអាគ្នេយ៍ ដោយប្រកួតប្រជែងទីផ្សាររថយន្តជាមួយនឹងក្រុមហ៊ុនជប៉ុន និងកូរ៉េ។

កាលពីឆ្នាំមុន BYD បានបើករោងចក្រអគ្គិសនីដំបូងរបស់ខ្លួនប្រចាំតំបន់ ក្នុងប្រទេសថៃ ដែលមានតម្លៃ ៤៩០ លានដុល្លារអាមេរិក ហើយមានសមត្ថភាពផលិតរថយន្ត ១៥០ ០០០ គ្រឿង/ឆ្នាំ រួមទាំងរថយន្តកូនកាត់ផងដែរ៕