ព័ត៌មានជាតិ

រដ្ឋាភិបាល ជំរុញបើកការដ្ឋានស្ថាបនាផ្លូវជាតិលេខ ៦៧ និង លេខ ៦៨ ឱ្យបានលឿន

បានផុស

១ year មុន

នៅ

ថ្ងៃសៅរ៍ ២៥ មករា ២០២៥

ដោយ

មន្រ្តីក្រសួងសាធារណការនិងដឹកជញ្ចូន បានបើកកិច្ចប្រជុំស្តីពីគម្រោងធ្វើឱ្យប្រសើរឡើងវិញផ្លូវជាតិលេខ ៦៧ និងផ្លូវជាតិលេខ ៦៨ ដើម្បីជំរុញការអនុវត្តគម្រោងឱ្យបានលឿន និងប្រកបដោយគុណភាព។

កិច្ចប្រជុំទ្វេភាគីមួយបានធ្វើឡើងកាលពីម្សិលមិញនេះ ដោយមានការចូលរួមពីលោក តូច ចាន់កុសល រដ្ឋលេខាធិការ ក្រសួងសាធារណការ និងដឹកជញ្ជូន និងលោក Perames Vudthitornetiraks នាយកទីភ្នាក់ងារសហប្រតិបត្តិការដើម្បីអភិវឌ្ឍន៍សេដ្ឋកិច្ចប្រទេសជិតខាង នៃព្រះរាជាណាចក្រថៃ (NEDA)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងធ្វើឱ្យប្រសើរឡើងវិញផ្លូវជាតិលេខ ៦៧ និងផ្លូវជាតិលេខ ៦៨ ផ្តល់ឥណទានដោយទីភ្នាក់ងារសហប្រតិបត្តិការដើម្បីអភិវឌ្ឍន៍សេដ្ឋកិច្ចប្រទេសជិតខាង នៃព្រះរាជាណាចក្រថៃ (NEDA)។

ក្នុងជំនួបរវាង លោក តូច ចាន់កុសល រដ្ឋលេខាធិការ ក្រសួងសាធារណការ និងដឹកជញ្ជូន និងតំណាងមកពីទីភ្នាក់ងារសហប្រតិបត្តិការដើម្បីអភិវឌ្ឍន៍សេដ្ឋកិច្ចប្រទេសជិតខាងនៃព្រះរាជាណាចក្រថៃកាលពីម្សិលមិញនេះ ក៏មានពិធីចុះកិច្ចសន្យាត្រួតពិនិត្យ និងសិក្សាជាមួយក្រុមហ៊ុនទីប្រឹក្សាបច្ចេកទេស Asian Engineering Consultants.Crop.,Ltd សម្រាប់គម្រោងធ្វើឲ្យប្រសើរឡើងវិញផ្លូវជាតិលេខ ៦៧ ផងដែរ។

បើតាមលោក តូច ចាន់កុសល រដ្ឋលេខាធិការ ក្រសួងសាធារណការ និងដឹកជញ្ជូន បន្ទាប់ពីជ្រើសរើសក្រុមហ៊ុនទីប្រឹក្សាបច្ចេកទេស ក្រុមការងារបច្ចេកទេសនៃក្រសួងសាធារណការ និងដឹកជញ្ជូន នឹងបន្តនីតិវិធីជាមួយក្រុមហ៊ុនទីប្រឹក្សាបច្ចេកទេស ដើម្បីរៀបចំជ្រើសរើសក្រុមហ៊ុនសាងសង់ឱ្យបានឆាប់។

លោក ស៊ុន ចាន់ថុល ឧបនាយករដ្ឋមន្រ្តីដែលទទួលបន្ទុកការងារគមនាគមន៍ដឹកជញ្ជូន និងភស្តុភារកម្មក្នុងពិធីបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងសាធារណការ និងដឹកជញ្ជូន កាលពីខែកុម្ភៈ ឆ្នាំ២០២៤ បានជំរុញឲ្យក្រសួងសាធារណការនិងដឹកញ្ជូន ខិតខំពន្លឿននិងជំរុញនីតិវិធីក្នុងការអនុវត្តគម្រោងហេដ្ឋារចនាសម្ព័ន្ធផ្លូវ-ស្ពានសំខាន់ៗដែលជាឥណទានសម្បទាន និងហិរញ្ញប្បទានឥតសំណងរបស់បណ្ដាប្រទេសជាមិត្ត និងដៃគូអភិវឌ្ឍន៍នានា ក្នុងនោះក៏មានគម្រោងផ្លូវជាតិចំនួន ២ ខ្សែ ដែលផ្តល់ឥណទានពីរដ្ឋាភិបាលថៃគឺផ្លូវជាតិលេខ៦៧ (សៀមរាប-អន្លង់វែង-ជាំ/សាង៉ាំ) និង ផ្លូវជាតិលេខ៦៨ (ក្រឡាញ់-អូរស្មាច់)៕