ជេអេស លែនទទួលកម្ចីរយៈពេលវែង​ជាង ២,៥៧ លានដុល្លារពីធនាគារក្នុងស្រុក​

ក្រុមហ៊ុន ជេអេស លែន​ ភីអិលស៊ី (JS Land Plc)  ជា​ក្រុមហ៊ុន​អភិវឌ្ឍន៍​អចលនទ្រព្យ និងបាន​ចុះបញ្ជី​នៅផ្សារមូលបត្រ​កម្ពុជា​(CSX) បានទទួលកម្ចីចំនួនជាង ២,៥៧ លានដុល្លារ ពីធនាគារ​ ពាណិជ្ជ ឈីហ្វ (ខេមបូឌា) ​យកទៅគាំទ្រដល់ការពង្រីកគម្រោងអាជីវកម្មរបស់ខ្លួន។

យោងតាមសេចក្តីជូនដំណឹងរបស់ក្រុមហ៊ុនផ្ញើរទៅកាន់ CSX កាលពីដើមសប្តាហ៍នេះ ក្រុមហ៊ុន ជេអេស លែន​ ភីអិលស៊ី​ បានចុះកិច្ចសន្យាប្រាក់កម្ចីចំនួន ២,៣ លានដុល្លារអាមេរិក និង ១​,១២០ លានរៀល ជាមួយ​ ធនាគារ​ ពាណិជ្ជ ឈីហ្វ (ខេមបូឌា) ជាមួយអត្រាការប្រាក់នៃកម្ចី១១%សម្រាប់រយៈពេល១៥ឆ្នាំ​គិតចាប់ពីថ្ងៃទី១៩ ខែវិច្ឆិកា ឆ្នាំ២០២៤ ដល់ថ្ងៃទី ២១ ខែវិច្ឆិកា ឆ្នាំ២០២៣៩ពីធនាគារ ពាណិជ្ជ ឈីហ្វ។

ក្រុមហ៊ុនបានបញ្ជាក់ថា៖«កម្ចីប្រាក់ជាមួយ ធនាគារ​ ពាណិជ្ជ ឈីហ្វ (ខេមបូឌា) ម.ក. គឺក្នុងគោលបំណងប្រើប្រាស់សម្រាប់គ្រប់គ្រងលើតម្រូវការប្រាក់ចំណូលអាជីវកម្ម។ កម្ចីប្រាក់នេះ ក៏មានគោលបំណងដើម្បីធានាបានការបន្តកិច្ចប្រតិបត្ដិការ និងការគាំទ្រយុទ្ធសាស្ត្ររបស់ក្រុមហ៊ុនដើម្បីបន្តការអភិវឌ្ឍ»។

ក្រុមហ៊ុន JS Land Plc គឺជា​​ក្រុមហ៊ុន​ទី​២ ដែល​បាន​ចុះបញ្ជី​លើ​ទីផ្សារ​កំណើន របស់​ផ្សា​រមូល​ប​ត្រ​កម្ពុជា (CSX) កាលពី​ថ្ងៃទី​១០ ខែកុម្ភៈ ឆ្នាំ​២០២២ ដោយ​ប្រមូល​មូលនិធិ​បាន ៤៨,៨៤៩ ពាន់​លាន​រៀល (១២ លាន​ដុល្លារ​)​៕