ព័ត៌មានអន្ដរជាតិ

ហុងកុងគ្រោងប្ដឹងទៅ WTO អំពីពន្ធរបស់សហរដ្ឋអាមេរិក

បានផុស

១ year មុន

នៅ

ថ្ងៃអង្គារ ១១ កុម្ភៈ ២០២៥

ដោយ

លោក Eric Chan អគ្គលេខាធិការរដ្ឋបាលក្រុងហុងកុង បានឱ្យដឹងនៅថ្ងៃអង្គារនេះថា ក្រុងហុងកុងគ្រោងនឹងដាក់ពាក្យបណ្តឹងទៅកាន់អង្គការពាណិជ្ជកម្មពិភពលោក (WTO) ចំពោះវិធានការពន្ធគយថ្មីរបស់សហរដ្ឋអាមេរិកមកលើខ្លួន ដោយអះអាងថា សហរដ្ឋអាមេរិកព្រងើយកន្តើយទាំងស្រុងចំពោះងាររបស់ទីក្រុងថាជាទឹកដីមានប្រព័ន្ធពន្ធគយដាច់ដោយឡែងពីចិនដីគោក។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Chan ដែលមន្ត្រីជាន់ខ្ពស់ទី ២ របស់ក្រុងហុងកុង ដែលគ្រប់គ្រងដោយចិន បានប្រាប់អ្នកយកព័ត៌មានថា៖ «នេះពិតជាមិនស្របនឹងច្បាប់របស់ WTO ទេ។ ជាការពិត ពួកគេ (អាមេរិក)បានបដិសេធទាំងស្រុងថា ហុងកុងគឺជាទឹកដីគយដាច់ដោយឡែក»។

លោកបានថ្លែងបន្តដោយមិនបានផ្តល់ព័ត៌មានជាក់លាក់ថា៖ «យើងនឹងដាក់ពាក្យបណ្តឹងទៅ WTO ទាក់ទងនឹងការរៀបចំមិនសមហេតុផលនេះ»។

គួរបញ្ជាក់ថា ជាងមួយសប្ដាហ៍មុន ប្រធានាធិបតីសហរដ្ឋអាមេរិក លោក ដូណាល់ ត្រាំ បានប្រកាសដាក់ពន្ធ ១០ ភាគរយ លើទំនិញនាំចូលពីចិន ដោយវិធានការដែលចូលជាធរមានកាលពីថ្ងៃអង្គារមុន មួយនេះ ក៏មានវិសាលភាពលើក្រុងហុងកុង។

ហុងកុងត្រូវបានគេស្គាល់ថាជាមជ្ឈមណ្ឌលពាណិជ្ជកម្មសេរី ប៉ុន្តែច្បាប់សន្តិសុខជាតិឆ្នាំ ២០២០ របស់ប្រទេសចិន បាននាំឱ្យសហរដ្ឋអាមេរិកបញ្ចប់ងារពិសេសរបស់ហុងកុង ដោយបង្កើនភាពតានតឹង។ បន្ទាប់មក សហរដ្ឋអាមេរិកបានតម្រូវឱ្យទំនិញដែលផលិតនៅហុងកុង ត្រូវបានដាក់ស្លាកថា «ផលិតនៅក្នុងប្រទេសចិន» ដោយដកចេញនូវគុណសម្បត្តិដ៏សំខាន់មួយរបស់ហុងកុង ដែលជាមជ្ឈមណ្ឌលពាណិជ្ជកម្ម៕