ព័ត៌មានជាតិ

ចំណតផែ LM១៧ នៅស្រុកកៀនស្វាយ ទីតាំងយុទ្ធសាស្រ្តច្រកដឹកជញ្ជូនទំនិញពីទន្លេទៅសមុទ្ររបស់កម្ពុជា

បានផុស

៩ ខែ មុន

នៅ

ថ្ងៃចន្ទ ៤ សីហា ២០២៥

ដោយ

ស្ថិតនៅតាមដងទន្លេមេគង្គក្រោម ក្នុងភូមិសាស្រ្តភូមិកណ្តាលលើ ឃុំបន្ទាយដែក ស្រុកកៀនស្វាយ ខេត្តកណ្តាល មានចម្ងាយប្រហែល ៣០ គីឡូម៉ែត្រពីរាជធានីភ្នំពេញ ចំណតផែកុងតឺន័រ LM១៧ ដើរតួនាទីជាតំណភ្ជាប់ដ៏សំខាន់នៅក្នុងបណ្តាញពាណិជ្ជកម្មអន្តរជាតិរបស់កម្ពុជា។

ទីតាំងយុទ្ធសាស្ត្រនេះ ជាកន្លែងការបង្រួបបង្រួមទំនិញ និងការដឹកជញ្ជូនទៅនិងមកពីប្រទេសវៀតណាម។ ការចូលទៅកាន់ចំណតផែកុងតឺន័រ LM១៧ តាមរយៈជម្រើសផ្សេងៗគ្នារួមមានផ្លូវជាតិលេខ ១ ផ្លូវក្រវ៉ាត់ក្រុងទី២ និងទី៣ ពីតំបន់ឧស្សាហកម្មក្នុងរាជធានីភ្នំពេញ។

ចំណតផែកុងតឺន័រ LM១៧ គឺជាចំណតផែស្នូល ដែលមានសមត្ថភាពលើកដាក់ និងផ្តល់ចំណតដល់ទំនិញជាច្រើនប្រភេទ រួមទាំងទំនិញកុងតឺន័រ ទំនិញដុល ទំនិញចាក់ធារ និងទំនិញរាយ។

សេវាកម្មសំខាន់ៗនៅចំណតផែកុងតឺន័រ LM១៧ រួមមាន៖

-ការលើកដាក់ជញ្ជូនទំនិញ៖ ការគ្រប់គ្រងប្រកបដោយប្រសិទ្ធភាពនៃប្រភេទទំនិញផ្សេងៗ។
-ការផ្ទុក និងឃ្លាំង៖ ដំណោះស្រាយស្តុកទុកប្រកបដោយសុវត្ថិភាព សម្រាប់ទំនិញគ្រប់ប្រភេទ។
-ការរៀបចំឯកសារពន្ធគយ៖ ដំណើរការរៀបចំឯកសារពន្ធគយកាន់តែមានភាពប្រសើរឡើង ដើម្បីកាត់បន្ថយការពន្យារពេល។
-ការដឹកជញ្ជូន និងភស្តុភារកម្ម៖ ដំណោះស្រាយការដឹកជញ្ជូន និងភស្តុភារឱ្យកាន់តែប្រសើរ។

លក្ខណៈពិសេស

-ប្រភេទទំនិញ៖ ទំនិញកុងតឺន័រ ទំនិញចាក់ធារ ទំនិញទូទៅ
-ជម្រៅទឹក៖ ៤,៥ ម៉ែត្រក្នុងរដូវប្រាំង អនុញ្ញាតឱ្យកប៉ាល់ដែលមានចំណុះពី ២ ០០០តោន – ៣ ០០០តោន ចូលចត
-ចម្ងាយ៖ ៣៧០- ៤៤៥ Km ឬ ២៨-៣៥ ម៉ោង សម្រាប់ការធ្វើនាវាចរណ៍រវាងចំណតផែកុងតឺន័រ LM១៧ ទៅប្រទេសវៀតណាម

-ហេដ្ឋារចនាសម្ព័ន្ធ និងគ្រឿងបរិក្ខារ៖

-ទំហំដី៖ ៣០ហិចតា
-ចំណត៖ ៩ នាវា
-សមត្ថភាពដងយោង (FCC): ២០-២៥ MPH
-សមត្ថភាពផ្ទុក: ៥០០ ០០០ TEUs ក្នុងមួយឆ្នាំ
-ឃ្លាំង៖ ១ ឃ្លាំង LCL មានទំហំ ១ ៤៦៤ម៉ែត្រការ៉េ

ការតភ្ជាប់៖

ចំណតផែកុងតឺន័រ LM១៧ ជាចំណតផែដែលមានការតភ្ជាប់ជាមួយតំបន់ឧស្សាហកម្មក្នុងរាជធានីភ្នំពេញ តាមរយៈផ្លូវដឹកជញ្ជូនផ្សេងៗរួមមាន ផ្លូវជាតិលេខ១ ផ្លូវក្រវ៉ាត់ក្រុងលេខ២ និងផ្លូវក្រវ៉ាត់ក្រុងលេខ៣។ ការតភ្ជាប់នេះ អនុញ្ញាតឱ្យដឹកជញ្ជូនទំនិញទៅនិងមកពីចំណតផែកុងតឺន័រ LM១៧ ដោយរលូន។

គុណសម្បត្តិប្រកួតប្រជែង

តាមរយៈការប្រើប្រាស់ទីតាំងយុទ្ធសាស្ត្រ ហេដ្ឋារចនាសម្ព័ន្ធទំនើប និងប្រតិបត្តិការប្រកបដោយប្រសិទ្ធភាព ចំណតផែកុងតឺន័រ LM១៧ ផ្តល់នូវអត្ថប្រយោជន៍ប្រកួតប្រជែងដល់អាជីវកម្ម ដែលកំពុងប្រតិបត្តិការក្នុងប្រទេសកម្ពុជា។ តម្លៃប្រកួតប្រជែងរបស់ចំណតផែកុងតឺន័រ LM7 និងកញ្ចប់សេវាកម្មដែលអាចបត់បែន ក្លាយជាជម្រើសសម្រាប់ក្រុមហ៊ុនដែលស្វែងរកដំណោះស្រាយដឹកជញ្ជូនប្រកបដោយប្រសិទ្ធភាព និងគួរឱ្យទុកចិត្ត។

នៅពេលដែលកម្ពុជាបន្តធ្វើសមាហរណកម្មទៅក្នុងសេដ្ឋកិច្ចពិភពលោក ចំណតផែកុងតឺន័រ LM១៧ ត្រៀមនឹងដើរតួនាទីយ៉ាងសំខាន់ ក្នុងការជំរុញកំណើនសេដ្ឋកិច្ច និងការអភិវឌ្ឍន៍របស់ប្រទេសជាតិ៕