សហគ្រិនជាស្រ្ដីខ្មែរម្នាក់ដាក់ផែនការបង្កើតប្រេនសាប៊ូ​ខ្លួនឯងដាក់លក់លើទីផ្សារ​

ជាសហគ្រិនខ្មែរម្នាក់ ដែលផ្ដើមចេញពីកម្មកររោងចក្រនៅប្រទេសថៃ អ្នកស្រី ផល រតនា ចង់បង្កើតយីហោសាប៊ូដុសខ្លួន និងសាប៊ូកក់សក់ ដែលផលិតចេញពីឱសថបូរាណ និងសំបុកដង្កូវនាង ដាក់លក់ក្នុងទីផ្សារប្រទេសកម្ពុជា។

ស្ថិតនៅក្នុង​វ័យ ៤២ឆ្នាំ អ្នកស្រី ផល រតនា ជាស្រ្ដីខ្មែរដំបូងគេបង្អស់ ដែលមានក្ដីស្រមៃខ្ពស់ ដោយដំបូងឡើយត្រឹមតែជាកម្មកររោងចក្រ និងជាស្រ្ដីមេផ្ទះមើលថែទាំកូនតែប៉ុណ្ណោះ។ តែអ្វីដែលនឹកស្មានមិនដល់នោះគឺ អ្នកស្រី ជាស្រ្ដីម្នាក់ដែលមានជំនាញផលិតសាប៊ូដុសខ្លួន និងសាប៊ូកក់សក់ ចេញពីឱសថបូរាណ ដូចជា៖ ឈើអែម កន្ទួតព្រៃ និងសំបុកដង្កូវនាង បង្កើតបានជាសាប៊ូដែលមានគុណភាពដាក់លក់នៅទីផ្សារប្រទេសថៃ និងគ្រោងនាំចូលមកប្រទេសកម្ពុជា ផងដែរ។

អ្នកស្រី ផល រតនា ម្ចាស់សិប្បកម្មផលិតសាប៊ូ AVIYA COSMETICS CO.,LTD បានប្រាប់ឱ្យ កម្ពុជាថ្មី ដឹងថា មូលហេតុដែលអ្នកស្រី ចង់នាំយកសាប៊ូដុសខ្លួន និងសាប៊ូកក់សក់ មកដាក់លក់នៅលើទីផ្សារប្រទេសកម្ពុជា ដោយសារតែអ្នកស្រី ចង់ឱ្យប្រជាជនខ្មែរបានប្រើប្រាស់ផលិតផលដែលមានគុណភាព ពិសេសគឺផលិតផលដែលចម្រាញ់ចេញពីឱសថបូរាណ និងដើមរុក្ខជាតិ ដែលប្រើប្រាស់ទៅមិនប៉ះពល់ដល់សុខភាពស្បែកក្បាល។

អ្នកស្រី បន្តថា​ មូលហេតុដែលខ្លួនមានជំនាញចេះកែច្នៃ និងផលិតសាប៊ូដុះខ្លួន ដោយសារតែអំឡុងពេលការផ្ទុះឡើងនូវជំងឺកូវីដ-១៩ នៅប្រទេសថៃ មានអង្គការស្រ្ដីមួយដែលមានទីតាំងនៅប្រទេសថៃ បានចុះមកបង្រៀន និងបណ្ដុះបណ្ដាលជំនាញផលិតសាប៊ូដុសខ្លួន ដល់ស្ដ្រីមេផ្ទះ ដែលប្រឈមនឹងការបាត់បង់ការងារ និងការស្វែងរកប្រាក់ចំណូលប្រចាំថ្ងៃ។

ចំពោះទីផ្សារនាពេលបច្ចុប្បន្ន ផលិតផលសាប៊ូ របស់អ្នកស្រី កំពុងទទួលបានការគាំទ្រខ្លាំងនៅក្នុងប្រទេសថៃ និងប្រទេសឡាវ ជាងនេះទៅទៀត អ្នកស្រីក៏មានបំណងចង់នាំយកផលិតផលទាំងនេះ មកដាក់លក់ក្នុងទីផ្សារប្រទេសកម្ពុជា ផងដែរ៕

អត្ថបទ ៖ សួស សិត