ព័ត៌មានអន្ដរជាតិ

អ្នកប្រើប្រាស់ OpenAI កើនដល់ជាង ៤០០ លាននាក់

បានផុស

១ year មុន

នៅ

ថ្ងៃសុក្រ ២១ កុម្ភៈ ២០២៥

ដោយ

ក្រុមហ៊ុនបញ្ញាសិប្បនិម្មិត OpenAI ដែលជាម្ចាស់កម្មវិធីឆ្លើយឆ្លងសារដោយស្វ័យប្រវត្តិ ChatGPT បានកត់ត្រាពីកំណើនអ្នកប្រើប្រាស់សកម្មប្រចាំសប្ដាហ៍ជាង ១០០ លាន រាប់តាំងពីខែធ្នូមក ទោះបីជាមានការប្រកួតប្រជែងកាន់តែខ្លាំងឡើងពីក្រុមហ៊ុន AI ផ្សេងទៀតក៏ដោយ។ នេះបើតាមការចុះផ្សាយរបស់បណ្ដាញទូរទស្សន៍ CNBC។

នាយកផ្នែកប្រតិបត្តិការរបស់ក្រុមហ៊ុន លោក Brad Lightcap បានប្រាប់ CNBC ថា ចំនួនអ្នកប្រើប្រាស់សកម្មប្រចាំសប្ដាហ៍របស់ OpenAI បានកើនដល់ ៤០០ លាននាក់ គិតត្រឹមខែកុម្ភៈនេះ ដោយកើនឡើង ៣៣ ភាគរយ ពីត្រឹម ៣០០ លាននាក់ នៅខែធ្នូ។

លោក Lightcap បានគូសបញ្ជាក់ពីរបៀបដែល ChatGPT កាន់តែមានប្រយោជន៍ និងជិតស្និទ្ធជាមួយអ្នកប្រើប្រាស់។ លោកបន្តថា អ្នកប្រើប្រាស់រៀនអំពី ChatGPT តាមរយៈពាក្យសម្ដី មើលឃើញតម្លៃរបស់វា និងកត់សម្គាល់មិត្តភ័ក្តិរបស់ពួកគេប្រើប្រាស់វាដែរ។

OpenAI បានកត់សម្គាល់ថា អាជីវកម្មសហគ្រាសរបស់ក្រុមហ៊ុនក៏កំពុងរីកចម្រើនផងដែរ ដោយបច្ចុប្បន្នមានសហគ្រាសបង់ប្រាក់សម្រាប់ការប្រើប្រាស់ចំនួន ២ លាន ដែលកើនឡើងជិតទ្វេដង ធៀបនឹងខែកញ្ញា។ ក្រុមហ៊ុនសហគ្រាសមួយចំនួន បានប្រើប្រាស់បច្ចេកវិទ្យារបស់ OpenAI ដោយច្របាច់បញ្ចូលវាទៅក្នុងកម្មវិធីផ្ទាល់ខ្លួនរបស់ខ្លួន ដូចជា Uber, Morgan Stanley, Moderna និង T-Mobile ជាដើម។

ការរីកចម្រើនរបស់ OpenAI កើតឡើងចំពេលមានការប្រកួតប្រជែងថ្មីពីដៃគូប្រកួតប្រជែងរបស់ចិន DeepSeek ដែលបានធ្វើឱ្យទីផ្សារបច្ចេកវិទ្យាមានសន្ទុះខ្លាំងនៅក្នុងខែមករា ខណៈអ្នកវិនិយោគភ័យខ្លាចថា វានឹងរារាំងដល់ប្រាក់ចំណេញនាពេលអនាគតរបស់ក្រុមហ៊ុនបញ្ញាសិប្បនិមិត្តរបស់សហរដ្ឋអាមេរិក និងអំណាចរបស់ពួកគេ៕