គ្រាប់ស្វាយចន្ទីទទួលបានតម្លៃល្អ តែកសិករបារម្ភរឿងទិន្នផលធ្លាក់ចុះ

ការប្រមូលផលគ្រាប់ស្វាយចន្ទីបានចាប់ផ្ដើមបណ្ដើរៗនៅរដូវកាលថ្មី ឆ្នាំ ២០២៥ នេះ ខណៈអ្នក​ជំនាញ​បានលើកឡើងថា តម្លៃគ្រាប់ស្វាយចន្ទីមានភាពល្អប្រសើរ តែបារម្ភបញ្ហាទិន្នផលដោយសារតែអាកាសធាតុធ្លាក់ភ្លៀងច្រើន។

លោក អួន ស៊ីឡុត ប្រធានសមាគមស្វាយចន្ទីកម្ពុជាបានឱ្យដឹងនៅថ្ងៃទី ២៤ ខែកុម្ភៈ ឆ្នាំ បច្ចុប្បន្ន​ក្រុមហ៊ុនមកពីប្រទេសវៀតណាមចាប់ផ្ដើមចុះប្រមូលទិញគ្រាប់ស្វាយចន្ទីកម្ពុជា ដោយឱ្យតម្លៃល្អ ចាប់ពី ៦ ៤៥០ រៀល ក្នុងមួយគីឡូក្រាម។

បើតាមលោក ស៊ីឡុត បច្ចុប្បន្នកសិករកំពុងព្រួយបារម្ភពីអាកាសធាតុ ខណៈមានភ្លៀងធ្លាក់​ច្រើន ធ្វើឱ្យកើតមានសត្វល្អិត និងជំងឺច្រើន ហើយធ្វើឱ្យគ្រាប់ចន្ទីខូច ដែលប៉ះពាល់​ទៅដល់​ទិន្ន​ផល។

យោងតាមសមាគមស្វាយចន្ទីកម្ពុជា នៅក្នុងឆ្នាំ ២០២៤ កម្ពុជា​សម្រេច​​បានការ​ប្រមូលទិន្នផល​គ្រាប់​ស្វាយចន្ទីចំនួន ៨៥ ម៉ឺនតោន ក្នុង​នោះ​នាំចេញ​គ្រាប់ឆៅ​បាន​ចំនួន ៨១ ម៉ឺន ៥ ពាន់តោន កើនឡើង ២១ ភាគរយ ធៀបនឹងឆ្នាំ ២០២៣ គិត​ជា​ទឹក​ប្រាក់​​ ១,១៥០ ពាន់លាន​ដុល្លារ កើន ២៦,១៥ ភាគរយ។ ក្នុងនោះនាំចេញទៅវៀតណាម មានចំនួន ៧៩ ម៉ឺន ៥ ពាន់​តោន៕

អត្ថបទ៖ ឡេង ដេត