ព័ត៌មានអន្ដរជាតិ

អតិផរណាសិង្ហបុរីកើនតិចបំផុតក្នុងរយៈពេល ៤ ឆ្នាំ

បានផុស

១ year មុន

នៅ

ថ្ងៃចន្ទ ២៤ កុម្ភៈ ២០២៥

ដោយ

អតិផរណារបស់ប្រទេសសិង្ហបុរី បានកើនឡើងតិចបំផុតចាប់តាំងពីខែកុម្ភៈឆ្នាំ ២០២១ ត្រឹម ១,២ ភាគរយ នៅខែមករា ដោយធ្លាក់ចុះពីកំណើន ១,៥ ភាគរយ នៅខែធ្នូ និងទាបជាងខ្លាំងធៀបនឹងការរំពឹងទុក ២,៤ ភាគរយ របស់សេដ្ឋវិទូ។ នេះបើតាមទិន្នន័យចុងក្រោយរបស់នាយកដ្ឋានស្ថិតិនៃក្រសួងឧស្សាហកម្ម និងពាណិជ្ជកម្ម (MTI) ដែលចេញផ្សាយនៅថ្ងៃចន្ទនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានោះ អតិផរណាស្នូល ដែលមិនរាប់បញ្ចូលការដឹកជញ្ជូនឯកជន និងការស្នាក់នៅ បានកើនឡើងត្រឹម ០,៨ ភាគរយ ឆ្នាំលើឆ្នាំ ធៀបនឹងកំណើន ១,៧ ភាគរយ ភាគរយ នៅខែធ្នូ និងទាបជាងការំពឹងទុក ១,៥ ភាគរយ។

ក្រសួងពាណិជ្ជកម្ម និងឧស្សាហកម្មរបស់សិង្ហបុរីបានពន្យល់ថា ការធ្លាក់ចុះនៃកំណើនអតិផរណានេះ គឺដោយសារតែអតិផរណាទាបនៅគ្រប់សន្ទស្សន៍តម្លៃអ្នកប្រើប្រាស់ស្នូលទាំងអស់។

ទិន្នន័យដដែលចេញផ្សាយក្រោយពេលដែលរដ្ឋាភិបាលសិង្ហបុរីបង្ហាញពីគោលនយោបាយផ្សេងៗក្នុងការជួយគាំទ្រអាជីវកម្ម និងពលរដ្ឋសិង្ហបុរី ក្នុងការប្រយុទ្ធប្រឆាំងនឹងការកើនឡើងខ្ពស់នៃការចំណាយប្រចាំសម្រាប់ការរស់នៅប្រចាំថ្ងៃ ឬតម្លៃនៃការរស់នៅ។

ថ្លែងក្នុងអំឡុងសុន្ទរកថាប្រកាសថវិកាជាតិសម្រាប់ឆ្នាំ ២០២៥ នាយករដ្ឋមន្ត្រីសិង្ហបុរី លោក Lawrence Wong បាននិយាយថា៖ «ខណៈអតិផរណាត្រូវបានគេរំពឹងថានឹងថយចុះបន្ថែមទៀតនៅឆ្នាំនេះ តម្លៃទំនិញនៅតែខ្ពស់ដដែល»។

យ៉ាងណាមិញ ទោះបីជាកំណើនអតិផរណាធ្លាក់ចុះក៏ដោយ អាជ្ញាធររូបិយវត្ថុសិង្ហបុរី (MAS) និង MTI បានរក្សាការព្យាកររបស់ពួកគេសម្រាប់អតិផរណាស្នូលជាមធ្យមចន្លោះពី ១-២ ភាគរយ និងអតិផរណាចន្លោះពី ១,៥-២,៥ ភាគរយ នៅឆ្នាំ ២០២៥៕