សិង្ហបុរី៖ ប្រាក់ខែនិស្សិតបញ្ចប់ការសិក្សា ដែល​មាន​ការងារធ្វើ កើនលើស ៣ ៣០០ ដុល្លារ/ខែ ​

ប្រាក់ខែ​ប្រចាំខែជាមធ្យមសម្រាប់និស្សិតបញ្ចប់ការសិក្សានៅ​សិង្ហបុរី ដែល​មាន​ការងារធ្វើពេញម៉ោង ក្នុងឆ្នាំ ២០២៤ បានកើនឡើង ៤,២៤ ភាគរយ ​ដល់ ៤​ ៥០០ ដុល្លារសិង្ហបុរី (៣ ៣៤០ ដុល្លារអាមេរិក) ក្នុងឆ្នាំ ២០២៤។

តួលេខនេះបាន​មក​ពីការស្ទង់មតិការងារបញ្ចប់ការសិក្សារបស់សាកលវិទ្យាល័យ​ធំៗចំនួន​ ៥ រួមគ្នា​ សម្រាប់​​ឆ្នាំ ២០២៤ ដែលចេញ​ផ្សាយ​​កាលពីពេល​ថ្មី។ សាកលវិទ្យាល័យទាំងនោះរួមមាន​ សាកលវិទ្យាល័យជាតិសិង្ហបុរី សាកលវិទ្យាល័យបច្ចេកវិទ្យា Nanyang សាកលវិទ្យាល័យគ្រប់គ្រងសិង្ហបុរី សាកលវិទ្យាល័យវិទ្យាសាស្ត្រសង្គមសិង្ហបុរី និងសាកលវិទ្យាល័យបច្ចេកវិទ្យា និងរចនាសិង្ហបុរី។

ការស្ទង់មតិ​បានប្រមូលផ្តុំការឆ្លើយតបពីនិស្សិត​ចំនួន ១២ ៥០០ នាក់ ដែលបាន​បញ្ចប់ការសិក្សាកាលពីឆ្នាំមុន ​ហើយ​មាន​ការងារធ្វើ​គិតត្រឹមថ្ងៃទី ១ វិច្ឆិកា ២០២៤ ពោលគឺប្រហែល ៦ ខែ​ក្រោយ​ការបញ្ចប់​ការសិក្សា។​

ក្រៅតែពីកំណើន​នៃ​ប្រាក់ខែជាមធ្យម លទ្ធផល​នៃការស្ទង់មតិ​បាន​បង្ហាញផងដែរ​ថា​ និស្សិត​បញ្ចប់​ការសិក្សា​ផ្នែក​បច្ចេកវិទ្យាព័ត៌មាន និងឌីជីថល ទទួលបាន​ប្រាក់ខែ​ជាមធ្យមខ្ពស់បំផុត​ប្រមាណ ៥ ៦០០ ដុល្លារសិង្ហបុរី/ខែ ដោយ​កើន​ឡើងពី ៥ ៥០០ ដុល្លារសិង្ហបុរី/ខែ នៅឆ្នាំ ២០២៣។ ​

​ចំណែក​ឯ​និស្សិត​បញ្ចប់ការសិក្សាពីផ្នែក​ធុរកិច្ច បានឃើញកំណើនប្រាក់​ខែ​ដ៏ធំបំផុត ដោយកើនឡើងពី ៤​១៥០ ដុល្លារសិង្ហបុរី/ខែ នៅឆ្នាំ ២០២៣ ដល់ ៤ ៤០០​ ដុល្លារសិង្ហបុរី/ខែ កាលពីឆ្នាំមុន​។ ​​ផ្ទុយទៅវិញ ប្រាក់​ខែ​សម្រាប់និស្សិតបញ្ចប់ការសិក្សាផ្នែកសិល្បៈ រចនា និងប្រព័ន្ធផ្សព្វផ្សាយ ​មាន​កំណើន​តិចតួចបំផុត ដោយកើនឡើងពី ៣ ៧៤០ ដុល្លារសិង្ហបុរី/ខែ នៅឆ្នាំ ២០២៣ ទៅដល់ ៣ ៨០០ ដុល្លារសិង្ហបុរី/ខែ​ នៅឆ្នាំ ២០២៤។

ទោះបីជា​ប្រាក់ខែជាមធ្យម​នេះកើន​ឡើង​ក៏ដោយ​ ការស្ទង់មតិ​បាន​បង្ហាញ​ផងដែរ​ថា​ ភាគរយ​នៃ​និស្សិត​បញ្ចប់ការសិក្សាដែល​មាន​ការងារ​ពេញម៉ោង បានធ្លាក់ចុះដល់ ៧៩,៥ ភាគរយ​ ពី ៨៤,១ ភាគរយ នៅឆ្នាំ ២០២៣។ ​ជាមួយ​គ្នា​នោះ អត្រា​មាន​ការងារធ្វើ​ ​បាន​ធ្លាក់​ចុះ​នៅ​គ្រប់​​មុខ​របរ​ផ្សេង​ៗ​កាល​ពី​ឆ្នាំ​មុន ចំ​ពេល​មាន​ភាព​មិន​ប្រាកដ​ប្រជា​នៃ​សេដ្ឋកិច្ច​ពិភពលោក និង​តម្រូវ​ការ​ជួល​ចុះ​ខ្សោយ៕