ធនាគារកណ្តាលកម្ពុជាសហការជាមួស្ថាប័នហិរញ្ញវត្ថុកូរ៉េសហការលើគ្រប់គ្រង NPL

ធនាគារជាតិនៃកម្ពុជា (NBC) និង សាជីវកម្មគ្រប់គ្រងទ្រព្យសកម្មកូរ៉េ (KAMCO) បានសម្រេចបានកិច្ចសហការលើការគ្រប់គ្រង​បញ្ហាឥណទានមិនដំណើរការ​ (NPL) និងការជួយចូលរួមអភិវឌ្ឍន៍ធនធានមនុស្ស​ដល់កម្ពុជាលើវិស័យហិរញ្ញវត្ថុផងដែរ។

កិច្ច​សហការនេះត្រូវបានធ្វើឡើងកាលពីថ្ងៃទី ៤ខែមីនា តាមរយៈការចុះអនុស្សរណៈយោគយល់ (MoU) ​រវាងលោក យឹម លាត ទេសភិបាលរងនៃ NBC  ជាមួយលោក ​​Nam Ju Kwon ប្រធាន និងជានាយកប្រតិបត្តិ KAMCO ​ នៅធនាគារជាតិនៃកម្ពុជា អគារសែនសុខ។ ក្នុងពិធីចុះហត្ថលេខានោះដែរក៏មានចូលរួមពីថ្នាក់ដឹកនាំជាន់ខ្ពស់របស់ធនាគារជាតិនៃកម្ពុជា ថា្នក់ដឹកនាំ KAMCO គណៈកម្មការសេវាហិរញ្ញវត្ថុកូរ៉េ (FSC) និងសាជីវកម្មធានាប្រាក់បញ្ញើកូរ៉េ (KDIC) ផងដែរ។

យោងតាមសេចក្តីប្រកាសព័ត៌មានរបស់ NBC អនុស្សរណៈយោគយល់នេះមានគោលបំណងជំរុញកិច្ចសហប្រតិបត្តិការ និងកិច្ចសម្របសម្រួលរវាងស្ថាប័នទាំងពីរ តាមរយៈការផ្លាស់ប្តូរបទពិសោធន៍អនុវត្តន៍ជាក់ស្តែង និងចំណេះដឹងទាក់ទងនឹងការគ្រប់គ្រងបញ្ហាឥណទានមិនដំណើរការ។

បើតាម NBC ៖« ឯកសារនេះក៏គ្របដណ្តប់រាល់ចំណុចសំខាន់ៗ ដូចជា យន្តការនៃកិច្ចសហប្រតិបត្តិការតាមរយៈការផ្តល់ព័ត៌មានផ្នែកសេដ្ឋកិច្ច ក្របខ័ណ្ឌច្បាប់ដែលបានប្រកាសជាសាធារណៈ ការផ្លាស់ប្តូរឯកសារស្រាវជ្រាវនិងការពង្រឹងសមត្ថភាពមន្ត្រី-បុគ្គលិក និងចែករំលែកបទពិសោធន៍ ជាដើម»។

​លោក យឹម លាតបានមានប្រសាសន៍ថា​ ការសហការនេះគឺសារៈសំខាន់​វាងស្ថាប័នទាំងពីរ ក្នុងគោលដៅលើកកម្ពស់ស្ថិរភាពហិរញ្ញវត្ថុ និងពង្រឹងសំណាញ់សុវត្ថិភាពហិរញ្ញវត្ថុនៅក្នុងប្រទេសកម្ពុជា និងកូរ៉េឱ្យកាន់តែរឹងមាំថែមទៀត។

លោកថា៖«ភាគី KAMCO ក៏បានបង្ហាញឆន្ទៈក្នុងការពង្រឹងកិច្ចសហប្រតិបត្តិនេះឱ្យកាន់តែល្អប្រសើរ សំដៅលើកកម្ពស់ផលប្រយោជន៍រួម»។

ជាមួយគ្នានោះដែរ លោកយឹម លាតក៏បានជួបពិភាក្សាការងារជាមួយគណៈកម្មការសេវាហិរញ្ញវត្ថុកូរ៉េ និងសាជីវកម្មធានាប្រាក់បញ្ញើកូរ៉េ អំពីការពង្រឹងកិច្ចសហប្រតិបត្តិការរវាងធនាគារជាតិនៃកម្ពុជា និងស្ថាប័នទាំងពីរ ជាពិសេសលើការគាំទ្រការរៀបចំយន្តការកិច្ចការពារប្រាក់បញ្ញើនៅកម្ពុជា និងការកសាងសមត្ថភាពមន្ត្រី-បុគ្គលិកផងដែរ៕