រដ្ឋមន្ត្រីកសិកម្មអះអាងជាថ្មី ចូលរួមសហគមន៍កសិកម្មទំនើប ជួយកាត់បន្ថយថ្លៃដើមផលិត និងធានាលំនឹងទីផ្សារ

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើងពីអត្ថប្រ​យោជន៍​នៃការចូលរួមក្នុង​សហគមន៍កសិកម្មទំនើប ដូចជាការកាត់បន្ថយថ្លៃដើមផលិត ការទទួល​បានការគាំទ្រផ្នែកដើមទុន និងបច្ចេកទេស និងជាពិសេស ការតភ្ជាប់ទៅកាន់ទីផ្សារដែលមានការធានាថ្លៃទុកជាមុនច្បាស់លាស់។

លោករដ្ឋមន្ត្រីបានលើកឡើងក្នុងពេលជួបសំណេះសំណាលជាមួយប្រជាកសិករជាង២០០គ្រួសារ នៅថ្ងៃទី ០៦ ខែមីនាឆ្នាំ ២០២៥ នៅស្រុកកណ្តៀង ខេត្តពោធិ៍សាត់​ ដែលមានបំណងចងក្រងជាសហគមន៍កសិកម្ម​ទំនើបសម្រាប់​ដំណាំស្រូវ។

លោកស្រី សុខ ជា តំណាងប្រជាកសិករដាំស្រូវនៅឃុំកញ្ចរ បានលើកឡើងថា ការដាំស្រូវពូជ​អូអឹម៥៤៥១ ក្នុងឆ្នាំនេះមិនដល់ថ្នាក់ខាតដើមទេ ប៉ុន្តែទទួលបានប្រាក់ចំណេញតិចជាងឆ្នាំមុន ហេតុនេះហើយទើបកសិករនៅទីនេះមានបំណង​ចងក្រងជាសហគមន៍កសិកម្មទំនើបវិញម្តង។

ជាមតិផ្តាំផ្ញើ លោក​រដ្ឋមន្រ្តីបានណែនាំឱ្យមន្ត្រីជំនាញ​ចុះសិក្សាវាយតម្លៃពីគុណ​ភាពដីឱ្យបានត្រឹមត្រូវ ដើម្បីកំណត់ពីប្រភេទពូជស្រូវដែលសមស្របនឹងលក្ខខណ្ឌ​ក្សេត្របរិស្ថាន​ក្នុងតំបន់នេះ ព្រមទាំងប្រមូលផ្តុំផ្ទៃដីស្រែប្រាំងឱ្យបានប្រមាណ​១០០០ហិកតា មុននឹងឈាន​ទៅរៀបចំសហគមន៍កសិកម្មទំនើប ដើម្បីធានាឱ្យបាននូវអត្ថប្រយោជន៍ពី​សេដ្ឋកិច្ចមាត្រដ្ឋាន។

​គិតមកដល់ពេលនេះ មានសហគមន៍កសិកម្មទំនើបចំនួន ១១ ដែលមានការគាំទ្រ និងចាប់​អារម្មណ៍​ពីប្រជាពលរដ្ឋច្រើន ខណៈសហគមន៍កសិកម្មទំនើបផ្ដោតលើ​គុណភាព​ជាងបរិមាណ ដោយ​ពង្រីកវិសាភាពនៃទំហំសហគមន៍នីមួយៗឱ្យធំជាជាងបង្កើត សហគមន៍​ច្រើន៕