ព័ត៌មានអន្ដរជាតិ

PTT គ្រោងវិនិយោគ ២២០ លានដុល្លារ ដើម្បីពង្រីកកាហ្វេអាម៉ាហ្សូន

បានផុស

១ year មុន

នៅ

ថ្ងៃសុក្រ ៧ មីនា ២០២៥

ដោយ

ក្រុមហ៊ុន PTT Oil and Retail Business (PTT OR) ដែលជាបុត្រសម្ព័ន្ធមួយរបស់ក្រុមហ៊ុនថាមពលយក្សរដ្ឋថៃ PTT Plc បានឱ្យដឹងថា ខ្លួនគ្រោងនឹងវិនិយោគប្រមាណ ៧,៤ ប៊ីលានបាត (២២០ លានដុល្លារ) ដើម្បីពង្រីកប្រតិបត្តិការហាងកាហ្វេអាម៉ាហ្វូននៅក្នុងប្រទេសថៃ។ នេះបើតាមការចុះផ្សាយរបស់វេទិកាព័ត៌មាន World Coffee Portal។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងព្រឹត្តិការណ៍ «Opportunity Day» ដែលរៀបចំឡើងដោយផ្សារហ៊ុនថៃកាលពីដើមសប្ដាហ៍នេះ លោក Pitirat Rattanachote ប្រធានផ្នែកទំនាក់ទំនងវិនិយោគិនរបស់ PTT OR បាននិយាយថា ប្រហែល ៤០ ភាគរយ នៃថវិកាវិនិយោគសរុបរបស់ក្រុមហ៊ុនយក្សប្រេងចំនួន ១៩ ប៊ីលានបាត (៥៦០ លានដុល្លារ) នៅឆ្នាំនេះ នឹងផ្តោតលើការពង្រីកអាជីវកម្មហាងកាហ្វេក្នុងស្រុករបស់ខ្លួន។

បច្ចុប្បន្ន PTT OR មានហាងកាហ្វេអាម៉ាហ្សូន ចំនួន ៤ ៤៣០ កន្លែងនៅទូទាំងប្រទេសថៃ ដោយ ៥៣ ភាគរយ ក្នុងនោះស្ថិតនៅស្ថានីយ៍ចាក់សាំងរបស់ PTT។ លោក Rattanachote បានបន្ថែមថា ថវិកានេះក៏នឹងជួយសម្រួលដល់ការជួសជុលហាង និងសកម្មភាពនៃការរួមបញ្ចូលគ្នា និងការទិញយក (M&A) ដែលអាចមាន ផងដែរ។

កាហ្វេអាម៉ាហ្វូនជាក្រុមហ៊ុនកាហ្វេដ៏ធំបំផុតរបស់ប្រទេសថៃ ក៏ដំណើរការហាងចំនួន ៤២០ កន្លែង នៅទូទាំងទីផ្សារអន្តរជាតិចំនួន ១០ នៅអាស៊ីបូព៌ា និងមជ្ឈិមបូព៌ាផងដែរ។ ថវិកាវិនិយោគសរុបរបស់ PTT OR ប្រមាណ ២,៨ ប៊ីលានបាត (៨៤,៥ លានដុល្លារ) ត្រូវបានបម្រុងទុកសម្រាប់ការពង្រីកបណ្តាញស្ថានីយ៍ប្រេងឥន្ធនៈរបស់ខ្លួន និងហាងកាហ្វេអាម៉ាហ្សូននៅខាងក្រៅប្រទេសថៃ ដោយផ្តោតជាពិសេសលើកម្ពុជា ដោយសារ «សក្តានុពលកំណើនខ្ពស់» របស់ប្រទេសជិតខាងមួយនេះ។

បច្ចុប្បន្ន ហាងកាហ្វេអាម៉ាហ្សូនមានប្រមាណជាង ២៣០ កន្លែងទូទាំងប្រទេសកម្ពុជា ដែលជាទីផ្សារអន្តរជាតិដ៏៏ធំបំផុតរបស់ម៉ាកយីយោកាហ្វេមួយនេះ៕