ព័ត៌មានអន្ដរជាតិ

ទំនុកចិត្តអ្នកប្រើប្រាស់ថៃធ្លាក់ចុះ ជុំវិញភាពមិនប្រាកដប្រជាសេដ្ឋកិច្ច

បានផុស

១ year មុន

នៅ

ថ្ងៃព្រហស្បតិ៍ ១៣ មីនា ២០២៥

ដោយ

សន្ទស្សន៍ទំនុកចិត្តអ្នកប្រើប្រាស់ថៃប្រចាំខែកុម្ភៈ បានធ្លាក់ចុះជាលើកដំបូងក្នុងរយៈពេល ៥ ខែ ដោយសារតែភាពមិនប្រាកដប្រជាសេដ្ឋកិច្ច ជុំវិញគោលនយោបាយពន្ធរបស់ប្រធានាធិបតីអាមេរិក ដូណាល់ ត្រាំ ការចំណាយខ្ពស់សម្រាប់ការរស់នៅប្រចាំថ្ងៃ និងភាពយឺតយ៉ាវនៃការស្ទុះងើបឡើងវិញរបស់សេដ្ឋកិច្ចថៃជាដើម។ នេះបើតាមការចុះផ្សាយរបស់កាសែតបាងកកប៉ុស្តិ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍ស្ទង់មតិស្ដីអំពីសន្ទស្សន៍អ្នកប្រើប្រាស់របស់សកលវិទ្យាល័យសភាពាណិជ្ជកម្មថៃ ដែលចេញផ្សាយនៅថ្ងៃព្រហស្បតិ៍នេះ បានបង្ហាញថា ទំនុកចិត្តអ្នកប្រើប្រាស់បានធ្លាក់ចុះដល់ ៥៧,៨ ពិន្ទុ នៅខែកុម្ភៈ ធៀបនឹង ៥៩,០ ពិន្ទុ នៅខែមករា ដែលជាកំណើនរយៈពេល ៤ ខែជាប់ៗគ្នា។

ប្រធានសាកលវិទ្យាល័យ លោក Thanavath Phonvichai បាននិយាយថា៖ «នេះគឺជាសញ្ញាគួរឱ្យព្រួយបារម្ភ។ សេដ្ឋកិច្ចមានភាពស្ងប់ស្ងាត់ ទោះបីជាមានវិធានការផ្សេងៗរបស់រដ្ឋាភិបាលក៏ដោយ»។ លោកបន្ថែមថា ភាពមិនច្បាស់លាស់លើពាណិជ្ជកម្មសកល បានដាក់សម្ពាធលើទំនុកចិត្តអ្នកប្រើប្រាស់ផងដែរ ខណៈថៃអាចក្លាយជាគោលដៅពន្ធរបស់ ត្រាំ ដោយសារប្រទេសនេះនាំចេញទៅអាមេរិកច្រើន។

គួរគូសបញ្ជាក់ថា ក្នុងការជំរុញសេដ្ឋកិច្ចដែលដើរអូសជើងរបស់ខ្លួន ថៃបានដាក់ចេញនូវវិធានការជាបន្តបន្ទាប់ រួមទាំងកម្មវិធី «កាបូបឌីជីថល» ដំណាក់កាលទី៣ ដែលចែកប្រាក់ឱ្យប្រជាជនថៃ ២,៧ លាននាក់ អាយុចន្លោះពី ១៦-២០ ឆ្នាំ និងការកាត់ពន្ធសម្រាប់ការវិនិយោគទីផ្សារមូលធន ក្នុងគោលបំណងលើកកម្ពស់កំណើនសេដ្ឋកិច្ចឱ្យលើសពី ៣ ភាគរយ ជាដើម ។

សេដ្ឋកិច្ចរបស់ប្រទេសថៃ បានកើនឡើង ២,៥ ភាគរយ កាលពីឆ្នាំមុន ទាបជាងការរំពឹងទុក និងយឺតជាងបណ្ដាប្រទេសក្នុងតំបន់ផ្សេងៗ។ កាលពីខែមុន ធនាគារកណ្តាលថៃ បានកាត់បន្ថយអត្រាការប្រាក់គោលមកនៅត្រឹម ២ ភាគរយ ដោយលើកឡើងពីទស្សនវិស័យកំណើនសេដ្ឋកិច្ចខ្សោយ និងហានិភ័យគោលនយោបាយពាណិជ្ជកម្មសកល។ ធនាគារបានកត់បន្ថយការព្យាករកំណើនសេដ្ឋកិច្ចរបស់ខ្លួនពី ២,៩ ភាគរយ មកខ្ពស់ជាង ២,៥ ភាគរយ តិចតួច៕