ធនាគារកណ្ដាលអឺរ៉ុប ព្រមាន​ផលប៉ះពាល់ធ្ងន់​ធ្ងរ​​នៃសង្រ្គាមពាណិជ្ជកម្ម ​

ប្រធានធនាគារកណ្តាលអ៊ឺរ៉ុប (ECB) លោកស្រី Christine Lagarde បាននិយាយ​ក្នុងបទសម្ភាសន៍ចេញ​ផ្សាយ​កាលពីពេល​ថ្មីៗនេះជាមួយបណ្ដាញទូរទស្សន៍ BBC ថា សង្រ្គាមពាណិជ្ជកម្ម​ពេញទីដែលបង្កឡើងដោយ​គោលនយោបាយពន្ធគយ​របស់​ប្រធានាធិបតីអាមេរិក ​ដូណាល់ ត្រាំ នឹងផ្តល់ផលប៉ះពាល់យ៉ាងធ្ងន់ធ្ងរដល់កំណើនសេដ្ឋកិច្ច និងអតិផរណាពិភពលោក។

លោកស្រី Lagarde បានព្រមានថា ការកើនឡើងនៃ​ភាពតានតឹងរវាងសហរដ្ឋអាមេរិក និងអឺរ៉ុប អាចមាន «ផលវិបាកធ្ងន់ធ្ងរ» ជាពិសេសចំពោះតម្លៃទំនិញ និងស្ថិរភាពសេដ្ឋកិច្ច។

ថ្មីៗនេះ​ លោក ត្រាំ ​បាន​គំរាមយកពន្ធ ២ ០០ ភាគរយ​ លើស្រាបារាំង និងការនាំចេញផ្សេងៗទៀតរបស់ EU ​ក្រោមវិធានការ «ពន្ធឆ្លើយតប​ឱ្យស្មើគ្នា» ​ដែលគ្រោងនឹងចាប់ផ្តើមនៅដើមខែ​មេសា។ លោក Lagarde បានបញ្ជាក់យ៉ាងច្បាស់ថា វិធានការការពារនិយមនេះ នឹងធ្វើឱ្យប៉ះពាល់ដល់ភាគីពាក់ព័ន្ធទាំងអស់។

សហរដ្ឋអាមេរិក គឺជាទីផ្សារដ៏សំខាន់មួយសម្រាប់​ក្រុមហ៊ុន​ផលិតគ្រឿងស្រវឹងនៅអឺរ៉ុប ​ដោយ​រួមចំណែក​លើ ១/៥​ នៃផលិតផលភេសជ្ជៈ ស្រា ​និងគ្រឿងស្រវឹងផ្សេងៗ ដែល​សហភាពអឺរ៉ុបនាំចេញទាំងអស់​ក្នុងឆ្នាំ ២០២៤។ នេះបើយោងតាមទិន្នន័យរបស់មជ្ឈមណ្ឌលពាណិជ្ជកម្មអន្តរជាតិ។

លោកស្រី Lagarde បាននិយាយថា៖ «ប្រសិនបើយើងធ្វើ​សង្រ្គាមពាណិជ្ជកម្ម ដែលអាច​ធ្វើឱ្យ​ពាណិជ្ជកម្ម​ធ្លាក់ចុះយ៉ាងខ្លាំងពិតប្រាកដមែននោះ នោះ​នឹងមានផលវិបាកធ្ងន់ធ្ងរ ទាំង​សម្រាប់កំណើនសេដ្ឋកិច្ច​​និង​តម្លៃ(ទំនិញ​)នៅជុំវិញពិភពលោក ​ជាពិសេសនៅសហរដ្ឋអាមេរិក»។

គួរគូស​បញ្ជាក់ថា​ ចាប់តាំងពី​ឡើង​ចូលកាន់តំណែងក្នុងខែមករា លោក ត្រាំ បាន​ជំរុញឡើងវិញនូវ​របៀបវារៈពន្ធដ៏គឃ្លើនរបស់លោក ដោយធ្វើឱ្យភាពតានតឹងពាណិជ្ជកម្មពិភពលោកកើនឡើងបន្តិចម្តងៗ។ លោកស្រី Lagarde ថា​ ​វិធានការបែបនេះ កំពុងធ្វើឱ្យសកម្មភាពអាជីវកម្មកាន់តែយ៉ាប់យ៉ឺន តាមរយៈការបង្កើនភាពមិនច្បាស់លាស់សម្រាប់ក្រុមហ៊ុន អ្នកប្រើប្រាស់ និងអ្នកវិនិយោគ៕