សេដ្ឋកិច្ច

ជម្លោះជាថ្មីនៅសមុទ្រក្រហម អាចបន្តបង្កើនតម្លៃដឹកជញ្ជូនសកល

បានផុស

៣ ខែ មុន

នៅ

ថ្ងៃអង្គារ ១៨ មីនា ២០២៥

ដោយ

អ្នកវិភាគអន្តរជាតិបានសម្ដែងការព្រួយបារម្ភថា ភាពតានតឹងជាថ្មីនៅសមុទ្រក្រហមក្រោមការផ្ដោះផ្ដងវាយប្រហាររវាងក្រុមឧទ្ទាមហ៊ូធីយ៉េមែន និងសហរដ្ឋអាមេរិក អាចនឹងបន្តបង្កើនតម្លៃ ឬធ្វើឱ្យតម្លៃនៅខ្ពស់ សម្រាប់ការដឹកជញ្ជូនទំនិញអន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រួយបារម្ភនេះ កើតឡើងនៅពេលក្រុមហ៊ូធីដែលគាំទ្រដោយអ៊ីរ៉ង់ បើកការវាយប្រហារលើនាវារបស់សហរដ្ឋអាមេរិកកាលពីចុងសប្ដាហ៍កន្លងទៅ។ ជាការឆ្លើយតប សហរដ្ឋអាមេរិកបានកំណត់គោលដៅទម្លាក់គ្រាប់បែកនៅយ៉េមែន ដោយសម្លាប់មនុស្សរាប់សិបនាក់ រួមទាំងជនស៊ីវិល។

មែនទែនទៅ ក្រុមហ៊ូធីបានចាប់ផ្ដើមវាយប្រហារលើនាវាពាណិជ្ជកម្ម «ពាក់ព័ន្ធនឹងអ៊ីស្រាអែល» តាំងពីចុងខែតុលា ឆ្នាំ ២០២៣ ដើម្បីបង្ហាញការគាំទ្រដល់ប៉ាឡេស្ទីន ក្រោយជម្លោះអ៊ីស្រាអែល-ហាម៉ាស់ចុងក្រោយបានផ្ទុះឡើងនៅដើមខែតុលា ឆ្នាំនោះ។ យ៉ាងណាមិញ ហ៊ូធីបានផ្អាកការវាយប្រហាររបស់ខ្លួនកាលពីប៉ុន្មានសប្ដាហ៍មុន ក្រោយបទឈប់បាញ់អ៊ីស្រាអែលនៅហ្គាហ្សាចូលជាធរមាន។ ប៉ុន្តែក្រុមប្រដាប់អាវុធដដែល បានប្ដេជ្ញាថានឹងបើកការវាយប្រហារជាថ្មី ប្រសិនបើភាគីអ៊ីស្រាអែលរំលោភបំពានលើបទឈប់បាញ់ ហើយក៏បានធ្វើដូច្នោះមែនកាលពីចុងសប្ដាហ៍មុន ក្រោយពេលអ៊ីស្រាអែលបិទជំនួយមនុស្សធម៌ទៅតំបន់ហ្គាហ្សាពីគ្រប់ច្រក។

គិតត្រឹមថ្ងៃអង្គារ (១៨ មីនា) នេះ អាមេរិក និងក្រុមហ៊ូធី បានអះអាងពីការបន្តការវាយប្រហាររៀងៗខ្លួន ដែលធ្វើឱ្យហានិភ័យដឹកជញ្ជូនតាមសមុទ្រក្រហមផ្ទុះឡើងកាន់តែខ្លាំងម្ដងទៀត។

ជាធម្មតា ការរំខាននៅសមុទ្រក្រហម តែងរំខានដល់ពាណិជ្ជកម្មពិភពលោក ដោយសារតែវាជាផ្លូវដឹកជញ្ជូនទំនិញតាមទឹកដ៏សំខាន់របស់សកល តភ្ជាប់ពីអាស៊ីខាងកើត ទៅអឺរ៉ុបខាងលិច តាមរយៈច្រកព្រែកជីកហ្ស៊ុយអេរបស់ប្រទេសអេហ្ស៊ីប។

រាប់តាំងពីខែតុលាឆ្នាំ ២០២៣ មក ហ៊ូធីបានវាយប្រហារលើនាវាពាណិជ្ជកម្មប្រមាណជាង ១០០ រួចទៅហើយ។ ការវាយប្រហារបានបង្កជាក្ដីបារម្ភសុវត្ថិភាព ដែលធ្វើឱ្យមានការពន្យារពេលដឹកជញ្ជូន និងបង្ខំឱ្យក្រុមហ៊ុនដឹកជញ្ជូនអន្តរជាតិ ផ្លាស់ប្ដូរផ្លូវដឹកកាត់តាម Cape of Good Hope ភាគខាងត្បូងនៃប្រទេសអាហ្វ្រិកខាងត្បូងវិញ ទោះបីជាវាមានចម្ងាយឆ្ងាយខុសគ្នាខ្លាំង រាប់ពាន់គីឡូម៉ែត្រក៏ដោយ។

ការផ្លាស់ប្ដូរនេះ បានធ្វើឱ្យតម្លៃដឹកជញ្ជូនហក់ឡើងកប់ពពក។ ធនាគារពិភពលោក បាននិយាយក្នុងរបាយការណ៍ «ភាពកាន់តែអាក្រក់នៃវិបត្តិដឹកជញ្ជូនតាមសមុទ្រក្រហម៖ ផលប៉ះពាល់ និងទស្សនវិស័យ» ដែលចេញផ្សាយកាលពីដើមខែកុម្ភៈកន្លងទៅ ថា គិតត្រឹមចុងឆ្នាំ ២០២៤ តម្លៃដឹកជញ្ជូនរបស់សកលបានកើនឡើង ១៤១ ភាគរយ ធៀបនឹងកម្រិតតម្លៃមុនវិបត្តិនៅសមុទ្រក្រហមផ្ទុះឡើង។ តម្លៃនៃការដឹកជញ្ជូនពីក្រុងសៀងហៃទៅក្រុងរ៉ូទែដាម ជាមធ្យម បានកើនឡើង ២៣០ ភាគរយ ធៀបនឹងតម្លៃត្រឹមចុងឆ្នាំ ២០២៣។

របាយការណ៍របស់ធនាគារពិភពលោកដដែល បាននិយាយថា៖ «ការំខាន(នៅសមុទ្រក្រហម) បានបង្កើនជាផលប៉ះពាល់លើខ្សែច្រវ៉ាក់របស់សកលទាំងមូល ដោយធ្វើឱ្យត្រូវចំណាយពេលយូរលើការដឹកជញ្ជូន ជាពិសេសនៅអឺរ៉ុប»។ របាយការណ៍បន្តថា ការដឹកជញ្ជូនតាមផ្លូវទឹកសមុទ្រក្រហម ដែលរួមចំណែកលើផ្លូវនាវាដឹកកុងតឺន័រ ៣០ ភាគរយ របស់សកល បានធ្លាក់ចុះរហូតដល់ ៧០ ភាគរយ ខណៈការដឹកជញ្ជូនតាម Cape of Good Hope បានកើនឡើង ៥០ ភាគរយ៕