ព័ត៌មានអន្ដរជាតិ

ប៊ីល ហ្គេត៖ មានតែការងារ ៣ មុខ ប៉ុណ្ណោះ ដែលនឹងបន្តឈរជើងក្នុងបដិវត្តន៍ AI

បានផុស

១ year មុន

នៅ

ថ្ងៃពុធ ២៦ មីនា ២០២៥

ដោយ

មហាសេដ្ឋីពិភពលោក និងសហស្ថានិកក្រុមហ៊ុនបច្ចេកវិទ្យា Microsoft លោក ប៊ីល ហ្គេត បាននិយាយកាលពីពេលថ្មីៗនេះថា លោកជឿថា មានតែការងារ ៣ មុខ ប៉ុណ្ណោះ ដែលអាចនឹងបន្តឈរជើង នៅពេលវិស័យបញ្ញាសិប្បនិម្មិត (AI) កាន់តែរីកចម្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការងារទាំង ៣ នោះ រួមមានអ្នកសរសេរកូដ ជីវវិទូ និងអ្នកជំនាញផ្នែកថាមពល។ មហាសេដ្ឋីបច្ចេកវិទ្យាដដែល បានព្យាករថា AI នឹងជំនួសកម្លាំងមនុស្សភាគច្រើន ប៉ុន្តែវាមិនធ្វើឱ្យមនុស្សអស់ថាមពលនោះទេ ព្រោះវាអាស្រ័យលើមនុស្សក្នុងការសម្រេចចិត្តប្រើប្រាស់ AI ហើយអាស្រ័យលើខ្លួនឯង ថាតើផ្នែកណានៃការងារដែលយើងអាចធ្វើដោយខ្លួនឯង។

ចំពោះការសរសេរកូដ លោក ហ្គេត បកស្រាយថា ខណៈបច្ចុប្បន្ន AI អាចបង្កើតកូដ និងសូម្បីតែជាប់ស្តង់ដារបច្ចេកទេស អ្នកសរសេរកូដជាមនុស្ស នៅតែមានសារៈសំខាន់សម្រាប់ដំណើរការនេះ។ នេះបើតាមការចុះផ្សាយរបស់សារព័ត៌មាន Axios ។ លោក ហ្គេត បានពណ៌នាថា អ្នកជំនាញផ្នែកមនុស្ស នឹងត្រូវការជាចាំបាច់ដើម្បីកំណត់ និងកែកំហុស កែលម្អក្បួនដោះស្រាយ និងគាំទ្រការអភិវឌ្ឍរបស់ AI។

បន្ថែមពីលើនេះ មហាសេដ្ឋីវ័យ ៦៩ ឆ្នាំដដែល បានអះអាងថា ការងាររបស់ជីវវិទូនឹងមានសុវត្ថិភាពក្នុងពិភព AI នាពេលអនាគត។ លោកលើកឡើងថា AI ពូកែក្នុងការធ្វើរោគវិនិច្ឆ័យជំងឺ និងវិភាគ DNA ប៉ុន្តែបច្ចេកវិទ្យានេះខ្វះការច្នៃប្រឌិតដែលត្រូវការសម្រាប់ការស្រាវជ្រាវជីវសាស្រ្ត និងការរកឃើញបែបវិទ្យាសាស្ត្រ។

ជាមួយគ្នានោះដែរ លោក ហ្គេត បានព្យាករថា AI នឹងក្លាយជាជំនួយសម្រាប់មនុស្សនៅពេលគេនិយាយអំពីការសម្រេចបាននូវគោលដៅអាកាសធាតុសកល។ ប៉ុន្តែក្នុងពេលជាមួយគ្នានេះ វានឹងមិនអាចជំនួសការងាររបស់អ្នកជំនាញថាមពលទេ ពីព្រោះវិស័យនេះមានភាពស្មុគស្មាញក្នុងការធ្វើស្វ័យប្រវត្តិកម្មឱ្យពេញលេញ។

ជំនឿរបស់លោក ហ្គេត ហាក់ផ្ទុយពីមហាសេដ្ឋីបច្ចេកវិទ្យាដទៃទៀត។ ថ្មីៗនេះ នាយកប្រតិបត្តិក្រុមហ៊ុនផលិតបន្ទះឈីប Nvidia លោក Jensen Huang បានប្រាប់យុវជនឱ្យគិតទ្វេរដង មុននឹងប្រឡូកក្នុងវិស័យអភិវឌ្ឍន៍សុសវ៉ែរ ដោយសារការវិវត្តនៃ AI នាពេលបច្ចុប្បន្ន ខណៈនាយកប្រតិបត្តិរបស់ក្រុមហ៊ុនសុសវ៉ែរ Salesforce លោក Marc Benioff វិញ បាននិយាយថា ក្រុមហ៊ុនរបស់លោកកំពុងពិភាក្សាដេញដោលគ្នាលើការជួលវិស្វករសុសវ៉ែរឱ្យធ្វើការនៅឆ្នាំ ២០២៥ ។

លើសពីនេះ នាយកប្រតិបត្តិក្រុមហ៊ុនបញ្ញាសិប្បនិម្មិត OpenAI លោក Sam Altman បានប្រកាសថា AI នឹងជំនួសវិស្វករសុសវ៉ែរ ដូច្នេះហើយ លោកណែនាំថា សិស្សនិស្សិតគួរតែមានជំនាញ AI ឱ្យស្ទាត់ ដូចជំនាន់របស់លោក ដែលស្ទាត់លើការសរសេរកូដ។

គួរគូសបញ្ជាក់ថា បច្ចុប្បន្ន កំពុងមានកំណើននៃការព្រួយបារម្ភអំពីការណ៍ដែលថា AI នឹងជំនួសការងាររបស់មនុស្ស ដែលអាចធ្វើឱ្យអត្រាអត់ការងារធ្វើកើនឡើង។ របាយការណ៍មួយបានបង្ហាញថា ក្នុង «សេណារីយ៉ូដ៏អាក្រក់បំផុត» ការងារចំនួន ៨ លានកន្លែង នៅចក្រភពអង់គ្លេស អាចនឹងត្រូវបាត់បង់ដោយសារ AI។

លើសពីនេះ ការសិក្សាមួយផ្សេងទៀតបានរកឃើញថា ៥៤ ភាគរយ នៃការងារធនាគារអាចដំណើរការដោយស្វ័យប្រវត្តិដោយប្រើ AI ។ ជាក់ស្តែង កាលពីខែមុន ធនាគារធំរបស់សិង្ហបុរី DBS បានប្រកាសថា ខ្លួនអាចនឹងកាត់បន្ថយតួនាទីការងារប្រហែល ៤ ០០០ កន្លែង ក្នុងរយៈពេល ៣ ឆ្នាំខាងមុខ ដោយជំនួសមកវិញនូវការប្រើប្រាស់ AI៕

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា