ព័ត៌មានអន្ដរជាតិ

ពន្ធ ត្រាំ លើវៀតណាម អាចបង្កើនបញ្ហាសម្រាប់ Nike និង Adidas

បានផុស

១ year មុន

នៅ

ថ្ងៃព្រហស្បតិ៍ ៣ មេសា ២០២៥

ដោយ

ក្រុមហ៊ុនផលិតស្បែកជើងអន្តរជាតិធំៗរួមមាន Nike និង Adidas នឹងប្រឈមមុខនឹងបញ្ហាធំថ្មីឆាប់ៗនេះ នោះគឺវិធានការពន្ធចុងក្រោយរបស់សហរដ្ឋអាមេរិកលើប្រទេសជុំវិញពិភពលោក ជាពិសេសវៀតណាម ដែលជាប្រទេសផលិតកម្មសំខាន់របស់ខ្លួន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោមវិធានការពន្ធឆ្លើយតបឱ្យស្មើគ្នារបស់ប្រធានាធិបតី ដូណាល់ ត្រាំ ដែលប្រកាសឡើងនាព្រឹកថ្ងៃព្រហស្បតិ៍នេះ (៣ មេសា ម៉ោងនៅកម្ពុជា) វៀតណាមបានទទួលរងនូវអត្រាពន្ធ ៤៦ ភាគរយ លើគ្រប់មុខទំនិញនាំចូលទៅសហរដ្ឋអាមេរិក ដោយនឹងចូលជាធរមាននៅថ្ងៃទី ៩ មេសា តទៅដូចប្រទេសផ្សេងទៀតដែរ។ វាគឺជាអត្រាបន្ថែមលើពន្ធដែលមានស្រាប់។

Nike គឺជាក្រុមហ៊ុនសម្លៀកបំពាក់/ស្បែកជើងកីឡាមួយ ក្នុងចំណោមក្រុមហ៊ុនជាច្រើនដែលពឹងផ្អែកខ្លាំងលើផលិតកម្មក្នុងប្រទេសវៀតណាម។ អត្រាពន្ធខ្ពស់លើវៀតណាម នឹងបង្ខំឱ្យក្រុមហ៊ុនត្រូវចំណាយថ្លៃដើមខ្ពស់ ឬដំឡើងតម្លៃទំនិញរបស់ខ្លួន ខណៈពេលនេះក្រុមហ៊ុនកំពុងបញ្ចុះតម្លៃទំនិញមួយចំនួនរួចហើយដើម្បីសម្អាតស្តុក។

បើតាមរបាយការណ៍របស់ក្រុមហ៊ុន Nike ស្បែកជើង ៥០ ភាគរយ និងសម្លៀកបំពាក់ ២៨ ភាគរយ ត្រូវបានផលិតក្នុងប្រទេសវៀតណាមកាលពីឆ្នាំមុន។ Adidas ជាគូប្រជែងឯណោះវិញ មានតិចជាងនេះ ដោយស្បែកជើង ៣៩ ភាគរយ និងសម្លៀកបំពាក់ ១៨ ភាគរយ របសក្រុមហ៊ុនផលិតនៅវៀតណាម។

អត្រាពន្ធជាមធ្យមរបស់សហរដ្ឋអាមេរិកលើស្បែកជើងនាំចូលពីប្រទេសវៀតណាមគឺ ១៣,៦ ភាគរយ ខណៈដែលអត្រាលើសម្លៀកបំពាក់គឺ ១៨,៨ ភាគរយ។ បើយោងតាមការគណនាដោយផ្អែកលើទិន្នន័យពាណិជ្ជកម្មខែមករា របស់លោក Sheng Lu សាស្ត្រាចារ្យផ្នែកម៉ូដ និងសិក្សាសម្លៀកបំពាក់ នៅសាកលវិទ្យាល័យ Delaware ។

អ្នកវិភាគនៅក្រុមហ៊ុនសេវាកម្មហិរញ្ញវត្ថុ Morningstar លោក David Swartz បាននិយាយថា៖ «ប្រសិនបើពន្ធគយត្រូវបានបង្កើន នោះ Nike នឹងមានបញ្ហា»។ លោកបន្តថា Nike និង Adidas មិនរងគ្រោះតែម្នាក់ឯងនោះទេ។

វៀតណាមបានក្លាយជាមជ្ឈមណ្ឌលផលិតកម្មសម្រាប់ស្បែកជើងរត់ប្រណាំង សម្លៀកបំពាក់កីឡា និងសម្លៀកបំពាក់ដើរក្រៅផ្សេងៗទៀត ខណៈម៉ាកក្រុមហ៊ុននានាព្យាយាមកាត់បន្ថយផលិតកម្មនៅចិន ដោយសារតែជម្លោះពាណិជ្ជកម្មចិន-អាមេរិក។

ការណ៍គួរឱ្យកត់សម្គាល់នោះគឺថា ការប្រកាសពន្ធលើប្រទេសទូទាំងពិភពលោក រួមទាំងវៀតណាម របស់លោក ត្រាំ ធ្វើឡើងក្រុមហ៊ុន Nike បាត់បង់ចំណែកទីផ្សារដល់ដៃគូប្រកួតប្រជែងផ្សេងៗ ដូចជាក្រុមហ៊ុនផលិតស្បែកជើង On និងក្រុមហ៊ុន Hoka ជាដើម ដែលជាដើមហេតុនៃការធ្លាក់ចុះនៃប្រាក់ចំណូល។

រ៉យទ័របានចុះផ្សាយដោយស្រង់សម្ដីអ្នកវិភាគផ្សេងទៀតដែលអះអាងថា ការផ្លាស់ប្តូរផលិតកម្មចេញពីប្រទេសវៀតណាម ក៏មិនមែនជារឿងសាមញ្ញដែរ ខណៈប្រទេសអាស៊ីអាគ្នេយ៍ផ្សេងទៀត ដូចជាកម្ពុជា និងឥណ្ឌូណេស៊ី ក៏ទទួលរងនូវការយកពន្ធរបស់ ត្រាំ ផងដែរ ស្របពេលដែលតម្លៃផលិតកម្មក្នុងប្រទេសទាំងនេះ ក៏កំពុងកើនឡើង៕