អ្នកលក់សម្លៀកបំពាក់ ​មុនចូលឆ្នាំខ្មែរ អតិថិជនមានតម្រូវការច្រើនគួរសម

អាជីវករដែលជាអ្នកលក់សម្លៀកបំពាក់ និងស្បែកជើងក្នុងផ្សារធំថ្មី និងផ្សារបឹងកេងកង បានប្រាប់ឱ្យដឹងថា មុនឱកាសបុណ្យចូលឆ្នាំប្រពៃណីខ្មែរ ការលក់ដូររបស់ពួកគាត់ហាក់សម្បូរភ្ញៀវ និងអតិថិជនច្រើនគួរសមជាងថ្ងៃធម្មតា។

អ្នកស្រី ណាសា ម្ចាស់តូបលក់សម្លៀកបំពាក់ ក្នុងផ្សារធំថ្មី បានប្រាប់ កម្ពុជាថ្មី នៅថ្ងៃទី០៣ ខែមេសា នេះថា មួយរយៈពេលចុងក្រោយ ពិសេសនៅដើមខែមេសានេះ អាជីវកម្មលក់សម្លៀកបំពាក់របស់អ្នកស្រី សង្កេតឃើញមានភ្ញៀវទេសចរ និងអតិថិនខ្មែរ ជាច្រើនគួរសម បានមកអញ្ជើញទិញសម្លៀកបំពាក់ទៅចូលរួមកម្មវិធីផ្សេងៗ និងខ្លះទៀតទិញសម្លៀកបំពាក់ ដើម្បីទៅស្រុកកំណើតក្នុងឱកាសបុណ្យចូលឆ្នាំប្រពៃណីខ្មែរ នាពេលខាងមុខនេះ។

អ្នកស្រី បន្តថា ជាទូទៅ អតិថិជន មកទស្សនាកម្សាន្តផ្សារធំថ្មី និងដើរទិញអីវ៉ាន់ផ្សេងៗ នៅចន្លោះម៉ោង១០ព្រឹក រហូតដល់ម៉ោង ៥កន្លះល្ងាច។ វត្តមានរបស់ភ្ញៀវទេសចរ និងអតិថិជនទាំងនេះ នាំឱ្យការលក់របស់អាជីវករទំាងអស់ក្នុងផ្សារធំថ្មីទាំងមូល  មានស្ថានភាពល្អប្រសើរបានមួយកម្រិត នេះបើធៀបនឹងថ្ងៃធម្មតា។

ជាមួយគ្នានោះ អាជីវករជាអ្នកលក់កាបូប ក្នុងផ្សារធំថ្មីដូចគ្នា សុំមិនបញ្ចេញឈ្មោះ ក៏បានប្រាប់ កម្ពុជាថ្មី ថា តូបលក់កាបូបរបស់អ្នកស្រី បច្ចុប្បន្នមិនសូវសម្បូរភ្ញៀវ ឬអតិថិជន ដូចកាលពីមុនជំនាន់ឆ្នាំ២០១៩ នោះឡើយ។ អ្នកស្រី បញ្ជាក់ថា៖ «កាលមុនកូវីដ-១៩ ស្ថានភាពការលក់ដូរហាក់ប្រសើរ ដល់ក្រោយកូវីដ ដូចរៀងយ៉ាប់បន្ដិច»។

ទោះជាយ៉ាងណាក៏ដោយ អាជីវ​ករលក់រូបនេះ ​នៅតែញញឹម ដោយដាក់ក្ដីសង្ឃឹមខ្ពស់ថា​ «ការរកស៊ីមានតែប៉ុណ្ណឹង! ជួនលក់ដាច់ ជួនក៏ស្ងាត់ជ្រាបដូចឃើញជាក់ស្ដែងស្រាប់!»។

យ៉ាងណាមិញ ​អ្នកនាង ស្រីទូច អាជីវករលក់ស្បែកជើង ក្នុងផ្សារបឹងកេងកង ក៏បានប្រាប់ឱ្យដឹងដូចគ្នាដែរថា ចូលមកដល់ដើមខែមេសានេះ ការលក់ដូរហាក់មានភាពប្រសើរបន្តិច នេះក៏ដោយសារតែអតិថិជនកំពុងមានតម្រូវការទិញសម្លៀកបំពាក់ និងស្បែកជើង ដើម្បីទៅលេងស្រុកកំណើត ក្នុងឱកាសបុណ្យចូលឆ្នាំខាងមុខនេះ។

អ្នកនាង បានឱ្យដឹងទៀតថា ថ្ងៃធម្មតាការលក់ស្បែកជើងរបស់អ្នកនាង លក់បានត្រឹមចន្លោះពី ៨គូ ទៅ១០គូ តែប៉ុណ្ណោះ ប៉ុន្តែចូលមកដល់ដើមខែមេសានេះ​ ការលក់ដូរស្បែកជើងនៅតូបអ្នកនាង បានកើនឡើងបន្ដិច ជាក់ស្ដែង ក្នុងមួយថ្ងៃ អ្នកនាង អាចលក់ស្បែកជើងបុរសនារី បានចន្លោះពី ១៥គូ ទៅ២០គូ ផងដែរ៕

អត្ថបទ ៖ សួស សិត