ព័ត៌មានអន្ដរជាតិ

ការនាំចេញអង្កររបស់ថៃ ធ្លាក់ចុះខ្លាំងនៅត្រីមាសដើមឆ្នាំ

បានផុស

៦ ម៉ោង មុន

នៅ

ថ្ងៃអង្គារ ២២ មេសា ២០២៥

ដោយ

សមាគមអ្នកនាំចេញអង្ករថៃ បានឱ្យដឹងកាលពីថ្ងៃចន្ទថា ការនាំចេញអង្កររបស់ប្រទេសថៃ បានធ្លាក់ចុះ ៣០ ភាគរយ នៅក្នុងត្រីមាសទី ១ ដើមឆ្នាំ ២០២៥ នេះ ធៀបនឹងរយៈពេលដូចគ្នាកាលពីឆ្នាំមុន មកនៅត្រឹម ២,១ លានតោន។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានកិត្តិយសរបស់សមាគម លោក Chookiat Ophaswongse បាននិយាយថា ការធ្លាក់ចុះនេះគឺដោយសារតែប្រទេសនានា ពន្យារពេលការសម្រេចចិត្តទិញអង្ករ ខណៈឥណ្ឌាបន្តការនាំចេញអង្ករឡើងវិញដែលធ្វើឱ្យការផ្គត់ផ្គង់មានកាន់តែច្រើន បង្កការធ្លាក់ថ្លៃ។

មន្រ្តីជំនាញដដែលបានបន្តថា ការនាំចេញពេញមួយឆ្នាំ អាចធ្លាក់ចុះក្រោមការព្យាករ ៧,៥ លានតោន ប៉ុន្តែក្រុមហ៊ុននាំចេញកំពុងឃើញពីកំណើននៃការបញ្ជាទិញពីសហរដ្ឋអាមេរិក ចំពេលដែលពន្ធគយបដិការផ្អាកបណ្ដោះអាសន្នរយៈពេល ៩០ ថ្ងៃ រហូតដល់ដើមខែកក្កដា។ លោកបន្ថែមថា ការនាំចេញនៅត្រីមាសទី ២ នឹងមានលក្ខណៈស្រដៀងគ្នានឹងរយៈពេល ៣ ខែដំបូងនៃឆ្នាំនេះ។

បើតាមលោក Chookiat ថៃជាប្រទេសនាំចេញអង្ករធំជាងគេទី ២ របស់ពិភពលោក ប៉ុន្តែអាចនឹងបាត់បង់ដំណែងនេះ ប្រសិនបើប្រឈមមុខនឹងការដំឡើងពន្ធខ្ពស់ជាង ១០ ភាគរយ។ លោក ត្រាំ ដាក់ពន្ធគយបដិការ ៣៦ ភាគរយ លើទំនិញថៃ។

កាលពីឆ្នាំមុន ថៃបាននាំចេញអង្ករចំនួន ៩,៩៤ លានតោន ដែលមានតម្លៃ ២២៥,៦៥ ប៊ីលានបាត ដោយសហរដ្ឋអាមេរិក គឺជាទីផ្សារធំទី ៣ របស់ខ្លួន គិតជាបរិមាណ៕