ហានិភ័យពន្ធអាមេរិក លើ​វិស័យវាយនភណ្ឌ​វៀតណាម​​

ឧស្សាហកម្មវាយនភណ្ឌ និងកាត់ដេរវៀតណាម គឺជាសសរស្តម្ភនៃសេដ្ឋកិច្ចនាំចេញរបស់​ប្រទេសនេះតាំងពីយូរយារណាស់មកហើយ ដោយវាជំរុញកំណើនសេដ្ឋកិច្ច បង្កើតការងារ និង​ធ្វើឱ្យវៀតណាមក្លាយ​ជាមជ្ឈមណ្ឌលផលិតកម្មពិភពលោកដ៏សំខាន់មួយ។ យ៉ាងណាមិញ វិស័យនេះ កំពុងប្រឈមនឹង​ហានិភ័យ​ជាច្រើន នៅចំពោះមុខនៃពន្ធគយរបស់សហរដ្ឋអាមេរិក។ នេះបើតាមការចុះផ្សាយរបស់ទស្សនាវដ្តី Vietnam Briefing។

ក្នុងឆ្នាំ ២០២៤ វិស័យវាយនភណ្ឌ និងកាត់ដេរវៀតណាម រកចំណូលបានជាង ៤៤ ប៊ីលានដុល្លារអាមេរិក ពីការ​នាំចេញ ដោយ​ទីផ្សារអាមេរិករួមចំណែក ៤០ ភាគរយ នៃតួលេខនោះ។ ​​នេះក៏ដោយ​សារតែតម្លៃ​ពលកម្ម​ប្រកួតប្រជែងរបស់វៀតណាម ការកែលម្អហេដ្ឋារចនាសម្ព័ន្ធ និងការចូលទៅ​កាន់ទីផ្សារផ្សេងៗតាមរយៈកិច្ចព្រមព្រៀងពាណិជ្ជកម្មសេរី (FTAs)។

​ប៉ុន្តែបច្ចុប្បន្ន ការពឹងផ្អែករបស់​វៀតណាមទៅលើទីផ្សារខាងក្រៅ ជាពិសេសសហរដ្ឋអាមេរិក បានធ្វើឱ្យ​វៀតណាមងាយរងគ្រោះកាន់តែខ្លាំងឡើងចំពោះការផ្លាស់ប្តូរភូមិសាស្ត្រនយោបាយ និងជម្លោះពាណិជ្ជកម្ម។ ​សហរដ្ឋអាមេរិកបាន​ដាក់ពន្ធគយបដិការ ៤៦ ភាគរយ លើទំនិញនាំចូលពីប្រទេសវៀណាម ដែល​នាំចេញទៅអាមេរិក​ក្នុងទំហំទឹកប្រាក់សរុប ១៣៦,៦ ប៊ីលាន​ដុល្លារ កាលពីឆ្នាំមុន។

ប្រសិនបើអនុវត្តចាប់ពីខែកក្កដាទៅ ​ក្រោយ​ការពន្យារពេល ៩០ ថ្ងៃផុតកំណត់នោះ ពន្ធជាមធ្យមលើផលិតផលវាយនភណ្ឌវៀតណាម អាចកើនឡើងដល់ចន្លោះពី ៦១-៦២ ភាគរយ ពីអត្រាត្រឹម ១៥-១៦ ភាគរយ នាពេល​បច្ចុប្បន្ន។​ កំណើនអត្រាពន្ធ​ថ្មី នឹងជះឥទ្ធិពលយ៉ាងខ្លាំងដល់ក្រុមហ៊ុនផលិតរបស់វៀតណាម ដែលភាគច្រើនរកប្រាក់ចំណេញបានត្រឹម ៥ ភាគរយ ក៏ដូចជាអ្នកប្រើប្រាស់នៅសហរដ្ឋអាមេរិក តាមរយៈការឡើងថ្លៃទំនិញ។ ​

ពន្ធ​ដ៏ខ្ពស់ដដែល ​បង្ក​ហានិភ័យ​ច្រើន​ស្រទាប់​សម្រាប់​វិស័យ​វាយនភណ្ឌ​​វៀតណាម។ ក្នុងរយៈពេលខ្លី ក្រុមហ៊ុនផលិតវាយនភណ្ឌវៀតណាមជាច្រើនបានពន្លឿនការផលិត និងដឹកជញ្ជូន ដើម្បីបំពេញតាមការបញ្ជាទិញនៅអាមេរិកមុន​ដើមខែកក្កដា។ ​ប៉ុន្តែ​ភាពស្រពិចស្រពិលនៃគោលនយោបាយពន្ធអាមេរិកបច្ចុប្បន្ន នៅតែបង្កការលុបចោលការបញ្ជាទិញ ការ​ផ្អាកការងារ និងការកាត់បន្ថយកម្លាំងការងារ ដែលជាសញ្ញាបង្ហាញថា អតិថិជននៅអាមេរិកកំពុងរកចាំមើលស្ថានភាពយ៉ាងណាសិន។

នាយកផ្នែកសេដ្ឋកិច្ចនៅក្រុមហ៊ុនទីផ្សារមូលធន S&P Global Market Intelligence លោក​ Andrew Harker បាន​និយាយថា ​ពន្ធរបស់សហរដ្ឋអាមេរិកបានរុញច្រានឧស្សាហកម្មផលិតកម្មរបស់វៀតណាមឱ្យធ្លាក់ចុះ ជាមួយនឹងការថយចុះគួរឱ្យកត់សម្គាល់នៃការបញ្ជាទិញ ការនាំចេញ និងផលិតកម្មថ្មីៗ។

​គេមើលឃើញថា ក្រោយ​ប្រធានាធិបតីអាមេរិក លោក ដូណាល់ ត្រាំ ​ប្រកាសពីពន្ធគយបដិការ​ ​សន្ទស្សន៍អ្នកគ្រប់គ្រងការបញ្ជាទិញ​ (PMI) របស់វៀតណាម បានធ្លាក់ចុះត្រឹម ៤៥,៦ ពិន្ទុ នៅខែមេសា ពី ៥០,៦ នៅខែមីនា ដែលនេះ​ជាអត្រានៃការធ្លាក់ចុះគឺលឿន​ និងធ្ងន់ធ្ងរបំផុត ក្នុងរយៈពេលជិត ២ ឆ្នាំ៕