ធនាគារកណ្ដាលអាមេរិករក្សាអត្រាការប្រាក់​ ខុសពីការទាមទារឱ្យទម្លាក់ចុះរបស់ ត្រាំ

ធនាគារកណ្តាលសហព័ន្ធអាមេរិក (Fed) បានរក្សាអត្រាការប្រាក់ឱ្យនៅដដែលក្រោយកិច្ចប្រជុំកាលពីថ្ងៃពុធ ដោយ​ជំទាស់ទៅនឹងការទាមទាររបស់ប្រធានាធិបតី ដូណាល់ ត្រាំ ដែលទទូចឱ្យទម្លាក់វាចុះទោះបីជាមានភាពមិនប្រាកដប្រជាសេដ្ឋកិច្ចដោយសារគោលនយោបាយពន្ធគយរបស់លោកក្ដី។ នេះបើតាមការចុះផ្សាយរបស់សារព័ត៌មាន Yahoo Finance។ ​

ប្រធាន Fed លោក Jerome Powell ​ថ្លែងក្នុងសន្និសិទកាសែត​កាលពីថ្ងៃពុធថា ​Fed មិនចាំបាច់ ​ប្រញាប់ប្រញាល់បន្ធូរបន្ថយគោលនយោបាយហិរញ្ញវត្ថុរបស់ខ្លួនទេ ដោយវា​អាស្រ័យ​លើការវាយតម្លៃ​ស្ថានភាពសេដ្ឋកិច្ច ដែលពន្ធគយរបស់លោក​ ត្រាំ ​នឹង​ប៉ះពាល់ដល់វិស័យការងារ និងអតិផរណាអាមេរិក ​ក៏ដូចជា​លទ្ធភាពដែលការចរចាជាមួយដៃគូពាណិជ្ជកម្មអាមេរិក នឹងផ្លាស់ប្ដូរទស្សនវិស័យសេដ្ឋកិច្ចបច្ចុប្បន្ន។ ​​

ទោះជាយ៉ាងណាក៏ដោយ លោក Powell បានបញ្ជាក់យ៉ាងច្បាស់ថា លោក​មានការព្រួយបារម្ភអំពីឥទ្ធិពលពន្ធរបស់ ត្រាំ ​ដោយថា៖ «ខ្ញុំមានអារម្មណ៍ថា ភាពមិនច្បាស់លាស់​សម្រាប់គន្លងនៃសេដ្ឋកិច្ច កើនឡើងយ៉ាងខ្លាំង»។

គួរគូសបញ្ជាក់ថា ក្រុមអ្នកបង្កើតគោលនយោបាយរបស់ Fed បានយល់ព្រមជាឯកច្ឆ័ន្ទដើម្បីរក្សាអត្រាការប្រាក់សំខាន់របស់ខ្លួន ចន្លោះពី ៤,២៥-៤,៥០ ភាគរយ ដែលកំណត់ឡើងតាំងពីចុងឆ្នាំ ២០២៤ ក្រោយ​ទម្លាក់វាចុះ ១ ភាគរយ នៅឆ្នាំមុនដដែល។

ការរក្សាអត្រាដដែលនេះ សម្រេចឡើងក្រោយរបាយការណ៍រដ្ឋាភិបាលអាមេរិក​បាន​បង្ហាញថា សេដ្ឋកិច្ចរបស់ប្រទេសបាន​ធ្លាក់ចុះ ០,៣ ភាគរយ នៅត្រីមាសទី ១ ដើមឆ្ណាំ ដែលជាការធ្លាក់ចុះជាលើកដំបូងក្នុងរយៈពេល ៣ ឆ្នាំ ដោយសារតែការនាំចូលច្រើនបណ្ដាលមកពីក្ដីបារម្ភពាក់ព័ន្ធពន្ធ។ ​

មន្ត្រីរបស់ Fed កាលពីថ្ងៃពុធ ក៏បានសម្តែងការព្រួយបារម្ភផងដែរ ថា «ហានិភ័យនៃភាពអត់ការងារធ្វើ និងអតិផរណាខ្ពស់ បានកើនឡើង» ប៉ុន្តែថានៅពេលនេះ អ្នកបង្កើតគោលនយោបាយចាត់ទុកទីផ្សារការងារថា «រឹងមាំ»​ ​ព្រោះអត្រាគ្មានការងារធ្វើ ​ស្ថិតក្នុងកម្រិតទាប​នៅឡើយ៕