តម្លៃប្រេងកើនជាង ១ ដុល្លារ ក្រោយតុលាការអាមេរិកហាមឃាត់ពន្ធ ត្រាំ

តម្លៃប្រេងអន្តរជាតិ បាន​កើនឡើងជាង ១​ ដុល្លារ សម្រាប់ការជួញដូរនាថ្ងៃព្រហស្បតិ៍ ក្រោយតុលាការសហរដ្ឋអាមេរិកសម្រាប់ពាណិជ្ជកម្មអន្តរជាតិ បាន​ប្រកាសសម្រេចហាមឃាត់ការអនុវត្តពន្ធគយរបស់ប្រធានាធិបតី ដូណាល់ ត្រាំ ខណៈទីផ្សារនៅតែសម្លឹងមើលលើលទ្ធភាពនៃទណ្ឌកម្មអាមេរិកលើប្រេងឆៅរុស្ស៊ី និងការបង្កើនផលិតកម្មរបស់ OPEC+។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃប្រេងនាពេលអនាគត ម៉ាក Brent បាន​កើនឡើង ១,១៣ ដុល្លារ ឬ ១,៧៤ ភាគរយ ដោយជួញដូរនៅតម្លៃ ៦៦,០៣ ដុល្លារ/បារ៉ែល គិតត្រឹមម៉ោងជិត ៣ រសៀល (ម៉ោងនៅក្រុងហុងកុង)។ ចំណែកឯប្រេងអាមេរិក WTI បានកើនឡើង ១,១២ ដុល្លារ ឬ ១,៨១ ភាគរយ ដោយជួញដូរនៅតម្លៃ ៦២,៩៦ ​ដុល្លារ/បារ៉ែល។

កំណើននេះ កើតឡើងក្រោយតុលាការសហរដ្ឋអាមេរិកសម្រាប់ពាណិជ្ជកម្មអន្តរជាតិកាលពីថ្ងៃពុធ បាន​សម្រេចហាមឃាត់ការដំឡើងពន្ធគយលើប្រទេសដទៃរបស់លោក ត្រាំ ដោយលើកឡើងថា ប្រធានាធិបតីរូបនេះ​ធ្វើហួសអំណាចរបស់ខ្លួន។ យ៉ាងណាមិញ សេចក្ដីសម្រេចដដែល មិនរាប់បញ្ចូលលើពន្ធលើទំនិញជាក់លាក់ ដែលលោក ត្រាំ ដាក់លើរថយន្ត ដែកថែប​ និងអាលុយមីញ៉ូម នោះទេ។

ការសម្រេចបែបនេះ អាចកាត់បន្ថយហានិភ័យសម្រាប់សេដ្ឋកិច្ចសកល ប៉ុន្តែវាអាចបណ្ដោះអាសន្ន ដោយសារតែរដ្ឋបាល ត្រាំ ប្ដឹងទៅឧទ្ធរណ៍ដើម្បីជំទាស់។

ពាក់ព័ន្ធនឹង​ការផ្គត់ផ្គង់ វិនិយោគិនក៏កំពុងរងចាំមើលពីលទ្ធភាពដែលសហរដ្ឋអាមេរិក​​ដាក់ទណ្ឌកម្មថ្មីលើប្រេងឆៅរុស្ស៊ី ជុំវិញសង្រ្គាមនៅអ៊ុយក្រែន ដែលអាចធ្វើឱ្យ​តម្លៃប្រេងកើនឡើង។ ប៉ុន្តែការណ៍នេះ ប្រទាញប្រទង់គ្នា ជុំវិញ​លទ្ធភាពដែលថា អង្គការនៃប្រទេសនាំចេញប្រេងកាត និងសម្ព័ន្ធមិត្ត (OPEC+) អាចបង្កើនផលិតកម្ម ដែលអាចធ្វើឱ្យតម្លៃប្រេងធ្លាក់ចុះមកវិញ៕