ព័ត៌មានអន្ដរជាតិ

ឥណ្ឌូណេស៊ី បារាំងចុះ MoU ១១ ប៊ីលានដុល្លារ អំឡុងទស្សនកិច្ចរបស់ ម៉ាក្រុង

បានផុស

១៣ វិនាទី មុន

នៅ

ថ្ងៃសុក្រ ៣០ ឧសភា ២០២៥

ដោយ

ទីភ្នាក់ងារសារព័ត៌មានរដ្ឋឥណ្ឌូណេស៊ី Antara បានរាយការណ៍កាលពីថ្ងៃព្រហស្បតិ៍ថា ប្រទេសឥណ្ឌូណេស៊ី និងបារាំង បានចុះហត្ថលេខាលើអនុស្សរណៈនៃការយោគយល់គ្នា (MoU) ចំនួន ២៧ ក្នុងទំហំសរុប ១១ ប៊ីលានដុល្លារ អំឡុងដំណើរទស្សនកិច្ចទៅក្រុងហ្សាកាតារបស់ប្រធានាធិបតីបារាំង លោក អេម៉ានុយអែល ម៉ាក្រុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីសម្របសម្រួលកិច្ចការសេដ្ឋកិច្ចឥណ្ឌូណេស៊ី លោក Airlangga Hartarto បាននិយាយថា MoU ចំនួន ១៦ ត្រូវបានចុះហត្ថលេខានៅចំពោះមុខលោក ម៉ាក្រុង និងប្រធានាធិបតីឥណ្ឌូណេស៊ី លោក ប្រាបូវូ ស៊ូប៊ីយ៉ានតូ នៅព្រឹកថ្ងៃពុធ និង ១១ ផ្សេងទៀតធ្វើឡើងក្នុងវេទិកាធុរកិច្ចឥណ្ឌូណេស៊ី-បារាំង ដែលមានការចូលរួមពីប្រតិភូចំនួន ៣៦៨ មកពីប្រទេសទាំង២ ក្នុងថ្ងៃទាំងដដែល។

អនុស្សរណៈទាំងអស់ គ្របដណ្តប់លើផ្នែកផ្សេងៗនៃកិច្ចសហប្រតិបត្តិការទ្វេភាគី រួមមាន ភាពជាដៃគូរដ្ឋាភិបាលទៅរដ្ឋាភិបាល (G2G) អាជីវកម្មទៅអាជីវកម្ម (B2B) និងប្រជាជន និងប្រជាជន។

លោក Hartarto បាននិយាយថា៖ «នេះនឹងពង្រឹងបន្ថែមទៀតនូវទំនាក់ទំនងដ៏យូរអង្វែងរវាងប្រទេសឥណ្ឌូណេស៊ី និងបារាំង ដែលមានរយៈពេល ៧៥ ឆ្នាំ»។

គួរគូសបញ្ជាក់ថា ដំណើរទស្សនកិច្ចរបស់លោក ម៉ាក្រុង ទៅឥណ្ឌូណេស៊ីធ្វើឡើងចន្លោះពីថ្ងៃអង្គារ ដល់ថ្ងៃព្រហស្បតិ៍ បន្ទាប់ពីលោកបញ្ចប់ទស្សនកិច្ចនៅវៀតណាម ដែលជាផ្នែកមួយនៃដំណើរទស្សនកិច្ចនៅអាស៊ីអាគ្នេយ៍។ លោកកំពុងស្ថិតនៅក្នុងប្រទេសសិង្ហបុរី គិតត្រឹមថ្ងៃសុក្រនេះ៕