ម្ចាស់ចម្ការទុរេនក្នុងស្រុកមើលឃើញប្រសិទ្ធភាពល្អ ជុំវិញចំណាត់ការរឹតត្បិតនាំចូលពីវៀតណាម និងថៃ

បណ្តាម្ចាស់ចំការទុរេនក្នុងស្រុក លើកឡើងថា ការរឹតត្បិតទុរេននាំចូលពីវៀតណាម និងថៃ​ របស់រាជរដ្ឋាភិបាលកម្ពុជា មានប្រសិទ្ធ​ភាពល្អ ខណៈការដឹកជញ្ជូនចូលមកហាក់មិនមានច្រើនដូចមុន ដែលបានចូលរួមដល់ការលើកកម្ពស់ទីផ្សារក្នុងស្រុក។

លោក ឃឹម ប៊ុនឡែន ស្ថាបនិក និងជានាយកប្រតិបត្តិ សហគមន៍ចម្ការស្តេច​ទុរេន  ប្រាប់កម្ពុជាថ្មីថា​ ទីផ្សារទុរេនក្នុងស្រុក ហាក់ដូចជាផ្អើលឈូរឆរ ប៉ុន្តែ​អោយ​មាន​អ្នកហូបច្រើន ដូចជាមិនមានច្រើនប៉ុន្មានទេ លោកយល់ឃើញថា ការច្របូកបល់ ពិតដូចមិនពិត អ្នកខ្លះ​នៅ​មានការព្រួយបារម្ភ ចំណុចហ្នឹងរដ្ឋា​ភិបាលគួរធ្វើអ្វីម្យ៉ាង។

ចំណែកឯម្ចាស់ចម្ការទុរេនបែកអន្លូង អ្នកស្រី ហេង សុខខេង ប្រាប់កម្ពុជាថ្មីថា ទីផ្សារទុរេន​ នៅឆ្នាំនេះ ហាក់មានភាពល្អប្រសើរដូចឆ្នាំមុនដែរ។

អ្នកស្រី ហេង សុខខេងប្រាប់ថា៖ «ការលក់ក្នុងស្រុក តម្លៃប្រហាក់ប្រហែល​លក់ឱ្យក្រុម​ហ៊ុន​នាំទៅចិនដែរ ដែលអាចលក់បាន ១៦ ០០០ ពាន់រៀល ក្នុងមួយគីឡូក្រាមសម្រាប់បោះ​ម៉ូយ​រាយ​​ក្នុងស្រុក បើម៉ូយកាត់តោនអាចក្រោមហ្នឹង»។

យោងតាមក្រសួងកសិកម្ម គិតត្រឹមឆ្នាំ ២០២៤ កម្ពុជាមានផ្ទៃដី​ដាំដុះ​ទុរេនជាង ៩ ពាន់ហិកតា ក្នុងនោះផ្ទៃដីអាចប្រមូល​ផល​បាន ៥ ពាន់ហិកតា ដែលផ្ដល់​ទិន្នផល​ប្រមាណ ៨ ម៉ឺន ២ ពាន់តោន៕