មហាអំណាចអឺរ៉ុប ២ប្រទេស ព្រមានអំពីការធ្វើសង្គ្រាមរបស់រុស្ស៊ី ក្នុងប្លុកនេះ ប៉ុន្មានឆ្នាំទៀត

មហាអំណាចអឺរ៉ុប២ប្រទេសគឺអង់គ្លេសនិងអាល្លឺម៉ង់ សុទ្ធតែចេញការព្រមានអំពីសង្គ្រាមរបស់រុស្ស៊ីក្នុងប្លុកនេះ នារយៈពេលប៉ុន្មានឆ្នាំខាងមុខ ដោយអំពាវនាវឲ្យមានការត្រៀមខ្លួនឲ្យបានល្អ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីដើមសប្តាហ៍នេះ ក្នុងសុន្ទរកថាដ៏សំខាន់មួយ នាយករដ្ឋមន្ត្រីអង់គ្លេស Keir Starmer បានសំដៅទៅរុស្ស៊ីដោយនិយាយថា ទីក្រុងឡុងដ៍ត្រូវតែត្រៀមលក្ខណៈសម្រាប់សង្គ្រាមព្រោះតែការគំរាមកំហែងឥតឈប់ពីសំណាក់ប្រទេសរុស្ស៊ី។

យោងតាមលោក Starmer, តាមរយៈគោលនយោបាយការពារជាតិអង់គ្លេស កំណែ​ទម្រង់របស់ខ្លួន ​នឹង​ធ្វើ​ឲ្យ​យោធា​អង់គ្លេសកាន់តែខ្លាំងជាងនេះ​១០​ដង ​នៅត្រឹម​ឆ្នាំ​២០៣៥។ អង់គ្លេសក៏មានគោលបំណងបង្កើនការចំណាយលើវិស័យការពារជាតិ៣%នៃ GDP របស់ខ្លួនផងដែរ ដើម្បីពង្រឹងកងកម្លាំងប្រដាប់អាវុធរបស់ខ្លួន។

លោក Starmer ក៏ស្តីបន្ទោសទីក្រុងមូស្គូផងដែរ ចំពោះអ្វីដែលលោកហៅថា ជាការបង្កហេតុឥតឈប់ ហើយចោទរុស្ស៊ីថា គំរាមកំហែងចក្រភពអង់គ្លេសនិងឈ្លានពានក្នុងដែនទឹករបស់អង់គ្លេសថែមទៀតផង។

ស្របពេលជាមួយគ្នានោះ នៅប្រទេសអាល្លឺម៉ង់ឯណោះ មេទ័ពមួយរូបព្រមានថា រុស្ស៊ី អាចវាយប្រហារអង្គការណាតូ ក្នុងរយៈពេលត្រឹម៤ឆ្នាំទៀតប៉ុណ្ណោះ។

ការព្រមាននេះគឺចេញពីមាត់មេទ័ព Carsten Breuer ដែលអះអាងថា រុស្ស៊ីកំពុងខិតខំផលិតរថក្រោះខ្លាំងណាស់ ដោយមួយឆ្នាំៗផលិតបានរាប់ពាន់គ្រឿង ហើយអាចប្រើក្នុងការវាយប្រហារលើរដ្ឋណាតូនៅតំបន់បាល់ទិក ត្រឹមឆ្នាំ២០២៩ឬអាចមុននេះក៏ថាបាន។ ដូច្នេះសមាជិកនៃសម្ព័ន្ធភាពដឹកនាំដោយអាមេរិកនេះទាំងអស់ ត្រូវតែត្រៀមខ្លួនឲ្យមែនទែន សម្រាប់ការវាយប្រហារគ្រប់ទម្រង់។

លោកបន្ថែមថា រុស្ស៊ីក៏ផលិតបានគ្រាប់កាំភ្លើងធំ១៥២មិល្លីម៉ែត្រចំនួន៤លានគ្រាប់ក្នុងឆ្នាំ២០២៤ផងដែរ ហើយមិនមែនគ្រាប់ទាំងអស់ ត្រូវយកទៅប្រើនៅប្រទេសអ៊ុយក្រែននោះទេ។

ទោះបីជាយ៉ាងណា រុស្ស៊ីធ្លាប់បញ្ជាក់ហើយថា ការដែលប្រទេសលោកខាងលិច តែងយកឈ្មោះរុស្ស៊ីទៅនិយាយហានិភ័យផ្ទុះសង្គ្រាមក្នុងទ្វីបអឺរ៉ុប គឺគ្រាន់តែជាលេសដើម្បីបង្កើនកញ្ចប់ថវិកាក្នុងវិស័យយោធារបស់ពួកគេតែប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ មេទ័ពអាល្លឺម៉ង់ ព្រមានថា រុស្ស៊ី អាចវាយ «ណាតូ» ៤ឆ្នាំទៀត