ក្លិប Man City ចាយ ៨០ លានដុល្លារ រកបានអ្នកជំនួស De Bruyne ជាផ្លូវការ

ទីបំផុតក្លិប Manchester City រកបានអ្នកជំនួស Kevin de Bruyne ហើយ បន្ទាប់ពីពួកគេទើបតែសម្រេចកិច្ចព្រមព្រៀងចុះកុងត្រាយកខ្សែបម្រើរបស់ AC Milan កីឡាករ Tijjani Reijnders។

នៅរដូវកាលនេះ Man City បានបាត់បង់អ្នកនាំលេងដ៏សំខាន់របស់ក្រុមម្នាក់ គឺ De Bruyne បន្ទាប់ពីខ្សែបម្រើសញ្ជាតុ ប៊ែលហ្ស៊ិក វ័យ ៣៣ ឆ្នាំរូបនេះសម្រេចចិត្តចាកចេញ ក្រោយអស់សុពលភាពកិច្ចសន្យារយៈពេល ១០ ឆ្នាំ។

ទោះបីជាយ៉ាងណា Man City ពេលនេះ រកបានអ្នកជំនួស De Bruyne ហើយ ក្រោយអ្នកកាសែត អ៉ីតាលី លោក Fabrizio Romano បានចុះផ្សាយថា Man City បានព្រមព្រៀងលក្ខខណ្ឌជាផ្លូវការជាមួយសមីកីឡាករ Tijjani Reijnders។ ជាមួយគ្នា Man City និង AC Milan បានព្រមព្រៀងលក្ខខណ្ឌផ្ទាល់មាត់អំពីតម្លៃផ្ទេរជាមួយគ្នារួចរាល់ហើយ គឺក្នុងតម្លៃ ៨០ លានដុល្លារអាមេរិក។

ចំពោះការចុះកិច្ចសន្យាយកបាន Tijjani Reijnders បានធ្វើឱ្យអ្នកគាំទ្រភាគច្រើនយល់ថា នេះគឺជាការយកបានអ្នកមកជំនួស De Bruyne យ៉ាងត្រឹមត្រូវ ដោយសារខ្សែបម្រើសញ្ជាតិ ហូល្លង់ វ័យ ២៦ ឆ្នាំរូបនេះ គឺបានបង្ហាញសមត្ថភាពយ៉ាងលេចធ្លោរជាមួយ AC Milan កាលពីរដូវកាលមុន ក្នុងនោះរូបគេបង្ហាញខ្លួនបាន ៤៩ ប្រកួត រកបាន ១៣ គ្រាប់ និង assist ចំនួន ៤ គ្រាប់៕

ប្រែសម្រួល៖ សេម កុសល
ប្រភព៖ Fabrizio Romano