តម្លៃទីផ្សារអំបិលបានកើនឡើងវិញ ក្រោយកសិករផ្អាកការផលិត

សមាគមផលិតអំបិលកម្ពុជាបានឱ្យដឹងថា តម្លៃអំបិល បានកើនឡើងបន្តិចវិញ​ចាប់តាំងពី​ការធ្លាក់​ភ្លៀង​ច្រើនថ្ងៃជាប់ៗគ្នា ខណៈតម្រូវការមានការកើនឡើង​។ ប៉ុន្តែលោករំពឹងថា ទិន្នផលសម្រាប់ឆ្នាំនេះនឹងមានការធ្លាក់ចុះជាងឆ្នាំមុន។​

លោក ប៊ុន ណារិន ប្រធាន​សមាគម​ផលិត​អំបិល​កម្ពុជា ប្រាប់កម្ពុជាថ្មី នៅថ្ងៃទី ០៥ ខែមិថុនា ឆ្នាំ ២០២៥ ថា ដោយ​សារ​អាកាសធាតុធ្លាក់ភ្លៀង អំបិលលេខ១ តម្លៃចន្លោះពី ១២០០០-១៣០០០ រៀល ក្នុងមួយបាវ ៥០ គីឡូក្រាម លេខ ២ តម្លៃជាង ១ ម៉ឺនរៀល ដោយលោកធ្លាក់ចុះជាងឆ្នាំមុន។ ប៉ុន្តែលោកថា៖« ដោយសារយើងនៅសល់អំបិលពីឆ្នាំមុនអាចយកមកបំពេញតម្រូវការនៅឆ្នាំនេះ មិនខ្វះការផ្គត់ផ្គង់នោះទេ»។

យោងតាម ក្រសួងឧស្សាហកម្ម ផលិតកម្មអំបិលកម្ពុជាសម្រេចបានជាង ១៦ ម៉ឺនតោន (១៦៨ ៨៨២) នៅក្នុងឆ្នាំ ២០២៤ លើ​ផ្ទៃ​ដីស្រែអំបិលជិត ៤ ពាន់ហិកតា (៣ ៩៨៧) (កំពត ៣ ៤៨៩ហិកតា កែប ៤៩៧​ហិក​តា)។

ក្នុង​មួយ​ឆ្នាំៗ​ កម្ពុជា​ត្រូវការ​អំបិល​ចន្លោះ​ពី​ ៧-១០​ ម៉ឺន​តោន ​ដើម្បី​បំពេញតម្រូវការ​​ក្នុងស្រុក​។ ក្រៅពី​ផល​អំបិល​ក្នុងស្រុក បណ្តា​ខេត្ត​នៅជាប់​ព្រំដែន​ថៃ និង​វៀតណាម ក៏​តែង​នាំចូល​អំបិល​មក​ដាក់លក់​ផងដែរ​ ប៉ុន្តែនៅឆ្នាំ ២០២៤ ពុំមាន​ការ​នាំអំបិលចូលពីបរទេសនោះទេ៕

អត្ថបទ៖ ឡេង ដេត