សេដ្ឋកិច្ច

កម្ពុជា កំពុងសិក្សាលើគម្រោងសាងសង់រោងចក្រផលិតអំបិល

បានផុស

១ ខែ មុន

នៅ

ថ្ងៃពុធ ២៧ ឧសភា ២០២៦

ដោយ

លោក ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មការលើកទឹកចិត្ត និងជំរុញផលិតកម្មអំបិលនៅថ្ងៃទី ២៧ ឧសភា ២០២៦ បានដឹកនាំកិច្ចប្រជុំពិភាក្សាលើការស្នើគម្រោងបង្កើតរោងចក្រផលិតអំបិល និងការសិក្សាសក្តានុពលផលិត និងប្រើប្រាស់អំបិលនៅកម្ពុជារបស់ក្រុមហ៊ុន ចេនឡា ហ្វូដ អិចប្រេស ឯ.ក (CHENLA FOOD EXPRESS CO., LTD.)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំនេះ ត្រូវបានរៀបចំឡើងក្នុងគោលបំណងសិក្សាស្វែងយល់ អំពីទស្សនៈគម្រោង, សក្តានុពលផលិតកម្ម, ការកែច្នៃ និងការប្រើប្រាស់អំបិលក្នុងស្រុក, ក៏ដូចជាការពិនិត្យលទ្ធភាពនៃការចូលរួមរបស់វិស័យឯកជន ក្នុងការគាំទ្រការអភិវឌ្ឍវិស័យអំបិលកម្ពុជា។

អង្គប្រជុំបានផ្លាស់ប្តូរយោបល់លើទិដ្ឋភាពគោលនយោបាយ, បច្ចេកទេស, ហិរញ្ញវត្ថុ និងការសម្របសម្រួលពាក់ព័ន្ធ ដើម្បីធានាថា គម្រោងនេះអាចអនុវត្តទៅមុខបាន និងស្របតាមនីតិវិធីជាធរមាន ដោយឆ្លើយតបទៅនឹងផលប្រយោជន៍សង្គម-សេដ្ឋកិច្ចជាតិ។

អង្គប្រជុំបានពិភាក្សាអំពីស្ថានភាពទូទៅនៃវិស័យអំបិលកម្ពុជា ដែលជាវិស័យមានសារៈសំខាន់ចំពោះជីវភាពប្រចាំថ្ងៃ កសិកម្ម ឧស្សាហកម្ម សន្តិសុខស្បៀង និងសុខភាពសាធារណៈ។

វិស័យនេះ ក៏នៅមានចំណុចដែលត្រូវបន្តពង្រឹងបន្ថែម ដូចជា ការធ្វើទំនើបកម្មបច្ចេកទេសផលិត, ការលើកកម្ពស់គុណភាព និងស្តង់ដារ, ការរៀបចំឃ្លាំងស្តុក, ការគាំទ្រផលិតករ និងសហគមន៍អំបិល, ជាពិសេស ការប្រើប្រាស់ដីស្រែអំបិល ឱ្យមានប្រសិទ្ធភាព និងការពង្រឹងសមត្ថភាពប្រកួតប្រជែងរបស់ផលិតកម្មអំបិលក្នុងស្រុក។

លោក ហ៊ាន សាហ៊ីប បានលើកឡើងថា ការចូលរួមរបស់វិស័យឯកជនក្នុងការអភិវឌ្ឍវិស័យអំបិល គួរត្រូវបានស្វាគមន៍ ប្រសិនបើគម្រោងមានភាពច្បាស់លាស់ អាចអនុវត្តបានជាក់ស្តែង និងចូលរួមដោះស្រាយតម្រូវការរបស់វិស័យមួយនេះ។

ការពិចារណាលើការស្នើសុំវិនិយោគ និងការលើកទឹកចិត្តណាមួយ ត្រូវផ្អែកលើក្របខណ្ឌច្បាប់ និងគោលនយោបាយជាធរមាន, ភាពច្បាស់លាស់នៃប្រភពទុន, សមត្ថភាពបច្ចេកទេស, ផលប៉ះពាល់បរិស្ថាន-សង្គម, ការចូលរួមជាមួយផលិតករអំបិលក្នុងស្រុក និងផលប្រយោជន៍សាធារណៈ។

អង្គប្រជុំបានផ្តល់ជាមតិយោបល់ និងធាតុចូលល្អៗ ដើម្បីឱ្យក្រុមហ៊ុនអាចបន្តសិក្សា និងរៀបចំការស្នើសុំឱ្យបានលម្អិតបន្ថែម រួមមាន ផែនការវិនិយោគ, គំរូអាជីវកម្ម, ប្រភពទុន, បច្ចេកវិទ្យាផលិត និងកែច្នៃ, ផែនការសហការជាមួយកសិករ និង សហគមន៍អំបិល, ការវាយតម្លៃផលប៉ះពាល់បរិស្ថាន-សង្គម និងចំណុចស្នើសុំការលើកទឹកចិត្តដែលក្រុមហ៊ុនចង់បាន ដើម្បីឱ្យក្រសួង-ស្ថាប័នពាក់ព័ន្ធ អាចពិនិត្យបន្តតាមនីតិវិធីជាធរមាន និងស្របតាមអភិក្រម “ជីវភាពនៃប្រព័ន្ធតួអង្គតែមួយ” ក្នុងការជំរុញការអភិវឌ្ឍវិស័យអំបិលឱ្យមានភាពប្រទាក់ក្រឡា និងមានចីរភាព។

លោក ប៊ុន ណារិន ប្រធានសមាគមផលិតអំបិលកម្ពុជា ប្រាប់កម្ពុជាថ្មីថា ផលិតកម្មអំបិលកម្ពុជា រំពឹងសម្រេចបាន ១០ ម៉ឺនតោន នៅក្នុងឆ្នាំ ២០២៦ ប្រសិនបើអាកាសធាតុអំណោយផល។

តម្លៃអំបិលនៅឆ្នាំ ២០២៦ នេះ បានកើនឡើង ក្នុងនោះប្រភេទលេខ១ អាចលក់បាន ១៨០០០ រៀល ក្នុងមួយបាវ ៥០ គីឡូក្រាម ចំណែកឯប្រភេទលេខ២ តម្លៃចន្លោះ ១៦០០០-១៧០០០ ក្នុងមួយបាវ ៥០ គីឡូក្រាម រីឯប្រភេទលេខ ៣ តម្លៃចន្លោះពី ១៣០០០-១៤០០០ រៀល មួយបាវ ៥០ គីឡូក្រាម។

យោងតាមក្រសួងឧស្សាហកម្មកម្ពុជា ផលិតកម្មអំបិលនៅកម្ពុជាសម្រេចបានជាង ៣ ម៉ឺនតោន( ៣៤៥១១) លើផ្ទៃដីប្រមូលផលជិត ៤ ពាន់កហិកតា នៅក្នុងឆ្នាំ ២០២៥ ធ្លាក់ចុះយ៉ាងគំហុកប្រៀបធៀបនឹងឆ្នាំ ២០២៤ ដែលសម្រេចបានជាង ១៦ ម៉ឺនតោន៕

អត្ថបទ៖ ឡេង ដេត

Related Topics:ផលិតកម្មអំបិល