ព័ត៌មានជាតិ

Energy China គ្រោងពង្រីកការវិនិយោគលើកវិស័យទឹកស្អាតនៅកម្ពុជា

បានផុស

៣២ វិនាទី មុន

នៅ

ថ្ងៃចន្ទ ៩ មិថុនា ២០២៥

ដោយ

តំណាងក្រុមហ៊ុន Energy China បានបង្ហាញអំពីផែនការនៃការពង្រីកការវិនិយោគរបស់ខ្លួនក្នុងវិស័យទឹកស្អាត បន្ទាប់ពីខ្លួនមានវត្តមាននៅកម្ពុជាអស់រយៈពេលជាងទសវត្សរ៍កន្លងមកនេះ ដើម្បីចូលរួមចំណែកដល់ការអភិវឌ្ឍវិស័យនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផែនការនេះត្រូវលើកឡើងក្នុងជំនួបរវាងលោក Zhang Deliang អគ្គនាយករងក្រុមហ៊ុន China Energy International Group ជាមួយលោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) នៅទីស្តីការក្រសួងកាលពីថ្ងៃទី៦ខែមិថុនាកន្លងទៅនេះ។

លោក Zhang Deliang អគ្គនាយករងក្រុមហ៊ុន China Energy International Group បានលើកឡើងថា បច្ចុប្បន្នក្រុមហ៊ុនរបស់លោកបានពង្រីកនូវការវិនិយោគលើរោងចក្រប្រព្រឹត្តិកម្មទឹកស្អាតជាង ៧០ ទីតាំងនៅក្នុងប្រទេសចិន ជាមួយសមត្ថភាពផលិតជាង ៤,៥ លានម៉ែត្រគូបក្នុងមួយថ្ងៃ។ ក្រុមហ៊ុនក៏មានគម្រោងក្នុងការបោះទុនពង្រីកការវិនិយោគទៅកាន់បណ្តាប្រទេសនានារួមទាំងកម្ពុជាផងដែរ។

លោកបានថ្លែងថា៖ «យើងមានបំណងវិនិយោគរយៈពេលវែងនៅកម្ពុជា មិនត្រឹមតែជាក្រុមហ៊ុនម៉ៅការប៉ុណ្ណោះទេ។ យើងមានរោងចក្រប្រព្រឹត្តិកម្មទឹកស្អាតជាង ៧០ ទីតាំងនៅក្នុងប្រទេសចិន ជាមួយសមត្ថភាពផលិតជាង ៤,៥ លានម៉ែត្រគូបក្នុងមួយថ្ងៃ ព្រមទាំងគម្រោងអន្តរជាតិសំខាន់ៗនានា ដូចជានៅប្រទេសប្រេស៊ីល និងអារ៉ាប់រួម។ ដូច្នេះ យើងជឿជាក់ខ្លាំងថា ជំនាញបច្ចេកទេស និងធនធានរបស់យើង អាចគាំទ្រគោលដៅអភិវឌ្ឍន៍វិស័យទឹកស្អាតរបស់កម្ពុជា»។

លោក ហែម វណ្ណឌី បានលើកឡើងអំពីស្ថានភាពនៃវិស័យទឹកស្អាតនៅកម្ពុជា ដែលរួមមានរដ្ឋាករទឹកចំនួន១១ និងប្រតិបត្តិករទឹកស្អាតឯកជនជាង ៤០០ នៅទូទាំងប្រទេស។ លោកថា កម្ពុជាមានប្រតិបត្តិករទឹកស្អាតច្រើនដែលមានសមត្ថភាពបច្ចេកទេស និងធនធានផ្សេងៗគ្នា។ ស្ថានភាពនេះខុសប្លែកពីស្ថានភាពនៅប្រទេសផ្សេងទៀត ប៉ុន្តែវាក៏ជាឱកាសសម្រាប់ការវិនិយោគខ្នាតធំផងដែរ។

លោករដ្ឋមន្រ្តីថ្លែងថា៖«យើងស្វាគមន៍ដៃគូវិនិយោគនានា រួមទាំង Energy China ដែលអាចនាំមកទាំងជំនាញបច្ចេកទេស និងហិរញ្ញវត្ថុរយៈពេលវែង ខណៈដែលតម្រូវការទឹកស្អាតនឹងបន្តកើនឡើងជាមួយកំណើននៃការអភិវឌ្ឍឧស្សាហកម្ម និងសេដ្ឋកិច្ចរបស់យើង»។

Energy China គឺជាក្រុមហ៊ុនរដ្ឋចិនដ៏ធំមួយ ដែលផ្តោតការវិនិយោគលើវិស័យថាមពល ទឹកស្អាត និងហេដ្ឋារចនាសម្ព័ន្ធ។ ក្រុមហ៊ុននេះមានបទពិសោធន៍ជាងពីរទស្សវត្សរ៍នៅកម្ពុជា និងមានបំណងពង្រីកការវិនិយោគរបស់ខ្លួនក្នុងវិស័យទឹកស្អាត។

លោក ហែម វណ្ណឌី បានបន្ថែមថា៖ ក្រសួងលើកទឹកចិត្តការអនុវត្តគំរូវិនិយោគដែលដៃគូ ដូចជា Energy China វិនិយោគលើរោងចក្រប្រព្រឹត្តិកម្ម និងបណ្តាញបំពង់មេចែកចាយទឹក ហើយប្រតិបត្តិករខ្នាតតូចអាចផ្តោតលើការលក់ទឹករាយ ក្រោមប្រព័ន្ធគ្រប់គ្រងគុណភាពទឹកស្អាតរួមមួយ។ លោកក៏បានលើកទឹកចិត្តឱ្យក្រុមហ៊ុន Energy China រៀបចំស្នើជាជម្រើសវិនិយោគផ្សេងៗ ដែលមានភាពបត់បែន ផ្តោតលើការអភិវឌ្ឍហេដ្ឋារចនាសម្ព័ន្ធផង និងនិរន្តរភាពផង ពិសេសទាក់ទងនឹងប្រភពទឹក៕