ព័ត៌មានជាតិ

មន្រ្តីអាកាសចរណ៍ស៊ីវិល៖ មកដល់បច្ចុប្បន្ន ជើងហោះហើរតាមផ្លូវអាកាសរវាងកម្ពុជា-ថៃនៅមិនទាន់មានផលប៉ះពាល់ឡើយ

បានផុស

២៣ វិនាទី មុន

នៅ

ថ្ងៃអង្គារ ២៤ មិថុនា ២០២៥

ដោយ

លោក ស៊ីន ចាន់សិរីវុត្ថា អ្នកនាំពាក្យ និងជារដ្ឋលេខាធិការដ្ឋានអាកាសចរណ៍ស៊ីវិលកម្ពុជា បានឱ្យ«កម្ពុជាថ្មី»ដឹងថា ជុំវិញបញ្ហាជម្លោះព្រំដែនកម្ពុជា-ថៃ អាកាសចរណ៍ស៊ីវិលគឺបានតាមដានសភាពការយ៉ាងយកចិត្តទុកដាក់ ក្នុងនោះចំពោះបញ្ហានៅតាមផ្លូវអាកាសរហូតមកដល់ពេលបច្ចុប្បន្ន គឺនៅមិនទាន់មានបញ្ហា ឬមានការផ្លាស់ប្តូរអ្វីជាធំដុំនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅរសៀលថ្ងៃទី២៤ ខែមិថុនា នេះ លោក ស៊ីន ចាន់សិរីវុត្ថា បានលើកឡើងថា ពាក់ព័ន្ធទៅនឹងជើងហោះហើរទៅមករវាងប្រទេសទាំងពីរកម្ពុជា-ថៃ ចំនួនជើងហោះហើរមិនមានការលុបចោល ឬប្តូរទិសដៅនោះទេ ប៉ុន្តែដូចយើងបានដឹងស្រាប់ហើយថា នេះជារដូវកាលបៃតង (Green Season) ផង ដូច្នេះសកម្មភាពភ្ញៀវទេសចរអាចមានការថយចុះតិចតួចផងដែរ។

«ជាក់ស្តែង ក៏មានកត្តាមួយចំនួនប៉ះពាល់តិចតួចដូចគ្នាដែរពីតាំងពីការប្រឈមមុខដាក់គ្នារវាងប្រទេសទាំងពីរ ដោយបានធ្វើឱ្យចំនួនភ្ញៀវមានការថយចុះតិចតួច ប៉ុន្តែយើងមិនអាចវាយតម្លៃបានថា វាប៉ះពាល់ទាំងស្រុងនោះទេ ព្រោះនេះជារដូវកាលបៃតង ប៉ុន្តែតាមការមើលឃើញមកដល់ពេលនេះ គឺមិនមានការផ្លាស់ប្តូរជើងហោះហើរនោះទេ»។ នេះបើតាមការបញ្ជាក់របស់លោក ស៊ីន ចាន់សិរីវុត្ថា ។

ជាមួយគ្នានេះដែរ អ្នកនាំពាក្យអាកាសចរណ៍ស៊ីវិល រូបនេះ ក៏បានបន្តដែរថា ចំពោះជើងហោះហើរនៅចន្លោះថ្ងៃទី១ រហូតមកដល់ថ្ងៃទី២៤ ខែមិថុនា នេះ ចំនួនជើងហោះហើរដូចជាមិនមានការថមថយនោះទេ ប៉ុន្តែចំនួនភ្ញៀវអាចថយចុះមួយចំនួនតូច ដោយសារតែទី១ បញ្ហាវិបត្តិព្រំដែនរវាងប្រទេសទាំងពីរ ទី២ ដោយសារនេះជារដូវកាលបៃតងនេះផង ដូច្នេះជាហេតុដែលធ្វើឱ្យពិបាកនៅក្នុងការសន្និដ្ឋានបានថា មូលហេតុអ្វីបានជាធ្វើឱ្យភ្ញៀវមានការថមថយ។

លោកថា៖«ប្រសិនបើយើងគិតទៅដល់ដែនអាកាស យើងដឹងហើយថា ដែនអាកាស គឺជាអធិបតេយ្យភាពរបស់ប្រទេសនីមួយៗ ដូច្នេះរាល់ការហោះហើរគឺត្រូវតែគោរព និងអនុវត្តនូវរាល់លក្ខខណ្ឌតម្រូវរបស់អន្តរជាតិ ហើយប្រសិនបើតំបន់នោះមានការប្រយុទ្ធគ្នាតាមផ្លូវអាកាស ឬក៏បាញ់បោះដាក់គ្នានោះ យើងត្រូវតែប្តូរទិសការហោះហើរពីតំបន់នោះទៅកន្លែងផ្សេង។ ដូច្នេះប្រសិនមានបញ្ហាអ្វីកើតឡើង យើងអាចប្តូរជើងហោះហើរទៅផ្លូវផ្សេងវិញបាន គ្រាន់តែត្រូវចំណាយពេលវេលាយូរជាង ប៉ុន្តែរហូតមកដល់ពេលនេះអ្វីៗនៅមិនទាន់មានការប្រែប្រួល គឺនៅរក្សាស្ថានភាពដើមទាំងអស់»។

ជាមួយគ្នានេះ លោកក៏បានបញ្ជាក់ដែរថា «អាជ្ញាធររបស់យើង ក៏ដូចជាអាកាសចរណ៍ស៊ីវិល ក៏បានធ្វើការតាមដាន គិតគូរ និងពិភាក្សាយ៉ាងហ្មត់ចត់ចំពោះស្ថានភាពព្រំដែននេះ ដូច្នេះប្រសិនមានអ្វីកើត យើងនិងមានផែនការរួចជាស្រេចដើម្បីដោះស្រាយលើបញ្ហាដែលកើតឡើង ព្រោះជាទូទៅ គឺយើងត្រូវតែគោរពតាមវិធានរបស់អន្តរជាតិ ដោយគេមានរបៀបណែនាំស្តីពីទំនាស់ព្រំដែន ឬនៅតំបន់ដែលមានទំនាស់ជាមួយគ្នា»។

លោកបានបញ្ជាក់ថា ជាបទពិសោធន៍ដូចជាជម្លោះព្រំដែនរវាងអ៊ុយក្រែន និងរុស្ស៊ី អង្គការអាកាសចរណ៍ស៊ីវិលអន្តរជាតិ និងសមាគមអាកាសចរអន្តរជាតិក៏បានសម្រេចគ្នាផ្លាស់ប្តូរផ្លូវហោះហើរកាត់តាមប្រទេសទាំងពីរកាត់មកប្រទេសតួកគី និងអាស៊ីកណ្តាល គ្រាន់តែត្រូវចំណាយពេលវេលាយូរជាងតែប៉ុណ្ណោះ។

មួយវិញទៀត ជុំវិញជម្លោះអ៊ីរ៉ង និងអ៊ីស្រាអែល ក៏មានបិទដែនអាកាសទាំងអស់នោះដែរ គឺកម្រិតយកផ្លូវហោះហើរវាងដែនអាកាសទាំងអស់នោះ មកកាត់តាមប្រទេសតួកគីវិញ គ្រាន់តែត្រូវចំណាយពេលយូរជាង និងចំណាយថវិកាច្រើនជាង ដោយបញ្ហាប្រឈមអាចមានផលប៉ះពាល់ទី១ ដល់តម្លៃ អាចនឹងមានការឡើងថ្លៃ ទី២ អាចប៉ះពាល់ដល់ការហោះហើរយូរជាង ឬអាចមានការយ៉ើតយ៉ាវ ឬក៏អាចមានការលុបចោលជើងហោះហើរដោយសារប្រការផ្សេងៗ។

យោងតាមកាសែត Bangkok Post បានឱ្យដឹងថា នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត់ បាននិយាយកាលពីថ្ងៃចន្ទ ទី២៣ ខែមិថុនា ថា ប្រទេសថៃនឹងជំរុញការត្រួតពិនិត្យនៅតាមព្រំដែនគោក និងរារាំងភ្ញៀវទេសចរដែលចាកចេញ ដោយក្នុងនោះមានតែនិស្សិត អ្នកជំងឺពេទ្យ និងអ្នកផ្សេងទៀតដែលត្រូវការទិញទំនិញសំខាន់ៗប៉ុណ្ណោះ ត្រូវបានអនុញ្ញាតឱ្យចូល ឬចាកចេញពីប្រទេសថៃ៕

ដោយ៖ ឌិន ថារី