សេដ្ឋកិច្ច

សហគមន៍កសិកម្មទំនើបនឹងកើនឡើងដល់ចំនួន ១៨ នៅត្រឹមដំណាច់ឆ្នាំ ២០២៥

បានផុស

៣១ វិនាទី មុន

នៅ

ថ្ងៃសុក្រ ២៧ មិថុនា ២០២៥

ដោយ

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខា ប្រមាញ់ និងនេសាទប្រាប់ «កម្ពុជាថ្មី» នៅថ្ងៃទី ២៧ ខែមិថុនា ឆ្នាំ ២០២៥ថា គិតត្រឹមដំណាច់ឆ្នាំ២០២៥ នឹងមានសហគមន៍កសិកម្មទំនើបសរុបប្រមាណ ១៨ សហគមន៍ នៅកម្ពុជា ដែលត្រូវបានបង្កើត និងចុះបញ្ជីដោយក្រសួងកសិកម្មកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោក ឃឹម ហ្វីណង់ រហូតមកដល់ពេលនេះ ក្រុមការងារនៃក្រសួងកសិកម្ម រុក្ខាប្រមាញ់ និងនេសាទ បានចុះពន្យល់ ផ្សព្វផ្សាយដោយផ្ទាល់ពីទស្សនទាននៃសហគមន៍កសិកម្មទំនើប ដល់ប្រជាកសិករជាច្រើនម៉ឺននាក់ នៅក្នុងខេត្តចំនួន ១៥ នៅទូទាំងប្រទេស។

ជាក់ស្តែង គិតត្រឹមខែឧសភា ឆ្នាំ២០២៥ នេះ មានសហគមន៍កសិកម្មទំនើបចំនួន ១៣ ត្រូវបានរៀបចំបង្កើត ឡើងនៅក្នុងខេត្តចំនួន ៧ លើមុខដំណាំយុទ្ឋសាស្ត្រចំនួន៤ មុខគឺ ដំណាំស្រូវ ដំណាំបន្លែ ដំណាំស្វាយចន្ទី និងដំណាំម្រេច ជាដើម។

ជាការរំពឹងទុក សហគមន៍កសិកម្មទំនើបចំនួនប្រមាណ ៥ ថ្មីបន្ថែមទៀត នឹងត្រូវបង្កើត និងចុះបញ្ជី ទទួលស្គាល់ផ្លូវការដោយក្រសួងកសិកម្ម រុក្ខាប្រមាញ់ និងនេសាទ នៅត្រឹមខែឆ្នាំ ២០២៥ នេះ។

លោក ឃឹម ហ្វីណង់ បានបន្តថា សហគមន៍កសិកម្មទំនើបចំនួន ៥ ថ្មី ដែលត្រូវបង្កើតឡើងនៅត្រឹមចុងឆ្នាំ២០២៥ នេះ រួមមាន សហគមន៍កសិកម្មស្វាយចន្ទី (១)នៅខេត្តឧត្តមានជ័យ, សហគមន៍កសិកម្មទំនើបស្វាយចន្ទី(១) នៅខេត្តសៀមរាប, សហគមន៍កសិកម្មទំនើបដំណាំបន្លែ (១)នៅខេត្តកំពង់ចាម, សហគមន៍កសិកម្មទំនើបដំណាំ បន្លែ(១) នៅខេត្តតាកែវ និង សហគមន៍កសិកម្មទំនើបដំណាំស្រូវ (១) នៅខេត្តបន្ទាយមានជ័យ។

អាស្រ័យ ហេតុនេះ នៅត្រឹមដំណាច់ឆ្នាំ២០២៥ នេះ សហគមន៍កសិកម្មទំនើបសរុបប្រមាណ ១៨សហគមន៍នឹង មាននៅក្នុងព្រះរាជាណាចក្រកម្ពុជា។

ជាមួយគ្នានេះដែរ សហគមន៍កសិកម្ម និងសហគមន៍កសិកម្មទំនើបទាំងអស់នៅប្រទេសកម្ពុជា គិតត្រីខែមិថុនា ឆ្នាំ២០២៥ នេះ មានចំនួនសរុបប្រមាណ ១ ៤៣០ សហគមន៍ ដែលមានកសិករសមាជិកសរុបចំនួន ១៩៣ ៨៨៩ នាក់ ដែលក្នុងនោះមានសមាជិកជានារីចំនួន ១១៤ ០៣០ នាក់ និងមានដើមទុនសរុបចំនួនប្រមាណ ១០៦ ៨៦៩ ០៤៤ ៨៩៥ រៀល៕