កម្ពុជានាំចូលគ្រឿងសំណង់មានទំហំទឹកប្រាក់ជាង ១ ពាន់លានដុល្លារ កើនឡើងខ្ពស់

គិតចាប់ពីខែមករា ដល់ខែឧសភា​ ឆ្នាំ ២០២៥ កម្ពុជានាំចូលសម្ភារសំណង់​មានទំហំទឹកប្រាក់​ជាង​ ១,០១ ពាន់លានដុល្លារ កើនឡើង ៣៥% ធៀបនឹងរយៈពេលដូចគ្នាកាលពីឆ្នាំមុន មាន​ទឹក​ប្រាក់ ៧៥២ លានដុល្លារ។ នេះបើយោងតាមរបាយការណ៍របស់ក្រសួងពាណិជ្ជកម្ម។

របាយការណ៍ដដែលបង្ហាញថា ការនាំចូល ដែក និងដែកថែប ក្នុងរយៈពេលដូចគ្នានេះ មានប្រ​មាណ​ជា ៤៧៧លានដុល្លារ កើនឡើង ៥៣% ខណៈ​ការនាំចូលស៊ីម៉ងត៍ មានការធ្លាក់ចុះបន្តិច ដែលមានចំនួនត្រឹមតែជិត ៨លានដុល្លារប៉ុណ្ណោះ ធ្លាក់ចុះ ០,២៣%។

លោក សាយ សំអាល់ ឧបនាយករដ្ឋមន្ត្រី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់​មានប្រសាសន៍ថា ក្រសួងកំពុងយកចិត្តទុកដាក់ក្នុងការជំរុញ​ទីផ្សារអចល​នទ្រព្យឱ្យងើបឡើងវិញ ខណៈវិស័យសំណង់នៅកម្ពុជានៅតែមានកំណើនជាប្រចាំជា​ពិសេសគម្រោងថ្មីៗ ដែលបាន​ស្នើសុំ។

លោករដ្ឋមន្ត្រីរំពឹងថា វិស័យសំណង់ នឹងក្លាយជា​ឧស្សាហកម្ម ដែលនឹងចូលរួមបង្កើត​ចំណូល​ថ​វិ​កា​ជាតិ និងកំណើនសេដ្ឋកិច្ចជាតិ។

យោងតាមក្រុមប្រឹក្សាអភិវឌ្ឍន៍កម្ពុជា គិតចាប់ពីខែមករា ដល់ខែឧសភា ឆ្នាំ ២០២៥ ​កម្ពុជាអនុម័តគម្រោងវិនិយោគគិតជា​ទឹក​ប្រាក់​ជាង ៤,២ ពាន់​លាន​ដុល្លារ មានការកើនឡើង ៥២% ​បើធៀបនឹងរយៈពេលដូចគ្នា​នៅក្នុងឆ្នាំ ២០២៤ ក្នុងនោះទុនវិនិយោគនៅក្នុងវិស័យ​ឧស្សាហកម្មមានជាង ៣,៦ ពាន់លានដុល្លារ, ហេដ្ឋារចនាសម្ព័ន្ធចំនួន ៥៥៨ លានដុល្លារ និងទេសចរណ៍ចំនួន ២០ លានដុល្លារ៕

អត្ថបទ៖ ឡេង ដេត