សេដ្ឋកិច្ច

សហគមន៍កសិកម្មទំនើប អាចទិញជី និងថ្នាំកសិកម្ម តម្លៃទាបជាងសមាជិកទិញរៀងខ្លួនពី ១៥%-២០%

បានផុស

១១ ខែ មុន

នៅ

ថ្ងៃព្រហស្បតិ៍ ៣ កក្កដា ២០២៥

ដោយ

អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ឃឹម ហ្វីណង់ បានគូសបញ្ជាក់ឱ្យដឹងថា សហគមន៍ទាំងអស់ មានលទ្ធភាពអាចទិញជី និងថ្នាំកសិកម្មសម្រាប់ផលិតកម្ម ក្នុងតម្លៃទាបជាង សមាជិកនីមួយៗទិញរៀងៗខ្លួន ក្នុងរង្វង់ពី ១៥% ទៅ ២០%។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឃឹម ហ្វីណង់ បានលើកឡើងថា ដើម្បីបង្កើនសមត្ថភាពប្រកួតប្រជែងនៃសហគមន៍កសិកម្មទំនើប ជាពិសេសការធ្វើឱ្យថ្លៃដើមផលិតកម្មថយចុះ ក្រសួងកសិកម្ម បានដឹកនាំការសម្របសម្រួលជាមួយសហគមន៍ និងចរចាថ្លៃដោយ ផ្ទាល់ជាមួយក្រុមហ៊ុនផ្គត់ផ្គង់ធាតុចូលកសិកម្ម។

ជាលទ្ធផល សហគមន៍ទាំងអស់ដែលបានចាប់ផ្តើម ប្រតិបត្តិការរបស់ខ្លួនអាចមានលទ្ធភាពអាចទិញជី និងថ្នាំកសិកម្មសម្រាប់ផលិតកម្ម ក្នុងតម្លៃទាបជាងតម្លៃដែលសមាជិកនីមួយៗ ទិញរៀងៗខ្លួន ក្នុងរង្វង់ពី ១៥% ទៅ ២០%។

លោក ឃឹម ហ្វីណង់ បានបន្ថែមថា ក្រោយពីការអនុវត្តនូវកម្មវិធីគោលនយោបាយអាទិភាពទី៦ ស្តីពីការអភិវឌ្ឍន៍សហគមន៍កសិកម្មទំនើប ក្នុងរយៈពេលជាង១ ឆ្នាំ ទទួលលទ្ឋផលជោគជ័យគួរឱ្យកត់សម្គាល់។

ក្នុងនោះ ក្រោយពេលបង្កើតឡើង ប្រជាកសិករកាន់តែច្រើនឡើងៗនៅទូទាំងប្រទេសមានចំណាប់អារម្មណ៍លើសហគមន៍កសិកម្មទំនើប និងបានស្នើសុំដល់ក្រសួងកសិកម្ម ដើម្បីឱ្យបង្កើតជាសហគមន៍កសិកម្មទំនើប នៅក្នុងតំបន់របស់ខ្លួន។

បន្ថែមពីនេះ កសិករលែងពិបាកស្វែងរកខ្ចីឥណទានពីអ្នករកស៊ីចងការប្រាក់ ឬស្ថាប័ន្តហិរញ្ញវត្ថុដោយខ្លួន ឯងទៀតហើយ គឺកសិករទទួលបានការគាំទ្រយ៉ាងពេញទំហឹងលើឥណទាន ធាតុចូល កសិកម្ម និងការលក់កសិកផលពីសហគមន៍កសិកម្មទំនើបរបស់ខ្លួនតែម្តង លែងមានការម្មណ៍ដូចមុនទៀត។

មិនតែប៉ុណ្ណោះកសិករទទួលបានការគាំទ្របច្ចេកទេសកសិកម្ម ការគាំទ្រដើមទុនជាឥណទាន និងការធ្វើកិច្ច សន្យាទីផ្សារច្បាស់លាស់មុនធ្វើការផលិត គឺមានទីផ្សារមុនជាស្រេមុនធ្វើការផលិត មិនដូច មុនចូលសហគមន៍កសិកម្មទំនើប មានន័យថា កសិករផលិតរួចទើបរកស៊ីតាមក្រោយ ដែលធ្វើឱ្យកសិករ តែងតែជួបបញ្ហាតម្លៃកសិផលនៅរដូវប្រមូលផលពីឈ្មួញកណ្តាល។

ក្រុមការងារត្រីវិស័យដែលមានក្រសួងកសិកម្ម ក្រសួងធនធានទឹក និងឧត្តុនិយម និងក្រសួងអភិវឌ្ឍន៍ជនបទ បាននឹងកំពុងជួយគាំទ្រយ៉ាងពេញទំហឹងដល់សហគមន៍កសិកម្មទំនើបនៅក្នុងតំបន់គោលដៅ។

គិតមកត្រឹមឆ្នាំ២០២៥ នេះ ក្រុមការងារត្រីវិស័យ បាននឹងកំពុងគាំទ្រសហគមន៍កសិកម្មទំនើបចំនួន ៦ ដែលមាននៅក្នុងខេត្តតាកែវ ខេត្តកំពង់ចាម ខេត្តត្បូងឃ្មុំ ខេត្តសៀមរាប និងខេត្តពោធិ៍សាត់ជាដើម៕