ព័ត៌មានអន្ដរជាតិ

សភាពាណិជ្ជកម្មថៃ ទទូចឱ្យរដ្ឋាភិបាលខ្លួនចរចាជាមួយកម្ពុជាជុំវិញការបិទព្រំដែន

បានផុស

១ year មុន

នៅ

ថ្ងៃចន្ទ ៧ កក្កដា ២០២៥

ដោយ

សភាពាណិជ្ជកម្មថៃបានទទូចជំរុញឱ្យរដ្ឋាភិបាលថៃ ចរចាជាមួយកម្ពុជាដើម្បីបើកព្រំដែនឡើងវិញ ដោយព្រមានថា ការបិទច្រកចេញ-ចូលដែលបង្កឡើងមុខជាឯកតោភាគីរបស់យោធាថៃ កំពុងធ្វើឱ្យប៉ះពាល់ដល់ប្រជាជនទាំងសងខាងនៃព្រំដែន ជាពិសេសការនាំចេញរបស់ថៃដែលពឹងផ្អែកលើទីផ្សារកម្ពុជា។ នេះបើតាមការចុះផ្សាយរបស់សារព័ត៌មាន Prachachat Business កាលពីថ្ងៃអាទិត្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការជំរុញទាមទារនេះ ធ្វើឡើងក្រោយជំនួបរវាងសភាពាណិជ្ជកម្មថៃប្រចាំបណ្ដាខេត្តព្រំដែនជាប់កម្ពុជាទាំង ៧ ដោយលើកឡើងពីបញ្ហាផ្សេងៗ និងតម្រូវការរបស់សហគ្រិន។ នេះបើតាមអនុប្រធានសភាពាណិជ្ជកម្មថៃ និងប្រធានគណៈកម្មាធិការពាណិជ្ជកម្មព្រំដែន និងពាណិជ្ជកម្មឆ្លងព្រំដែននៃសភាពាណិជ្ជកម្មថៃ លោក Jirapan Asvatanakul។

មួយក្នុងចំណោមផលប៉ះពាល់សម្រាប់ថៃ សភាពាណិជ្ជកម្មថៃបាននិយាយថា ការបិទព្រំដែនកំពុងបង្កបញ្ហាយ៉ាងធ្ងន់ធ្ងរសម្រាប់រោងចក្រដំឡើងរថយន្តពហុជាតិនៅថៃ។ ដំណើរការផលិតក្រុមហ៊ុនទាំងនោះ ត្រូវបានអាក់ខាន ដោយសារខ្សែច្រវ៉ាក់ផ្គត់ផ្គង់ពីកម្ពុជា។

ជាទូទៅ សហគ្រិនថៃបញ្ជូនវត្ថុធាតុដើមមករោងចក្រនៅកម្ពុជាសម្រាប់ផលិត ដោយសារតែផលប្រយោជន៍ផ្នែកពន្ធ និងតម្លៃពលកម្មទាបនៅកម្ពុជា។ បន្ទាប់មក គ្រឿងទាំងនេះត្រូវបញ្ជូនត្រឡប់ទៅថៃវិញ ដើម្បីដំឡើងរថយន្ត។ សភាពាណិជ្ជកម្មថា រោងចក្រនៅកម្ពុជាត្រូវបានចាត់ទុកថាជាផ្នែកមួយដ៏សំខាន់នៃខ្សែសង្វាក់ផ្គត់ផ្គង់នៃឧស្សាហកម្មរថយន្តថៃ ដោយរួមចំណែកប្រមាណ ៣-៤ ប៊ីលានបាត។

លើសពីនេះ «ទំនិញឆ្លងកាត់» ដែលដឹកពីប្រទេសផ្សេងៗមកកាន់កម្ពុជាតាមរយៈថៃ កំពុងហូរហៀរពេញឃ្លាំងនៅកំពង់ផែថៃ Laem Chabang ដែលបណ្ដាលឱ្យមានកំណើនការចំណាយប្រតិបត្តិការប្រចាំថ្ងៃ។

សម្រាប់កម្ពុជា សភាពាណិជ្ជកម្មថៃបានអះអាងថា ផ្សារទំនើបរបស់កម្ពុជាកំពុងជួបប្រទះនឹងកង្វះខាតទំនិញប្រើប្រាស់ ដោយប្រជាជនមានការភ័យស្លន់ស្លោទិញទំនិញ និងស្តុកទុក ដែលធ្វើឱ្យជីវភាពរស់នៅប្រចាំថ្ងៃរបស់ប្រជាជនកម្ពុជាមានការលំបាក។

គួរគូសបញ្ជាក់ថា ក្នុងចំណាត់ការជាឯកតោភាគីកាលពីខែមិថុនា យោធាថៃបានកំណត់ម៉ោងបិទ-បើក និងក្រោយមកបិទទាំងស្រុងនូវច្រកព្រំដែនគោកជាមួយកម្ពុជា ដែលជំរុញឱ្យកម្ពុជាឆ្លើយតបជាមួយនឹងវិធានការដូចគ្នា។ កន្លងមក កម្ពុជាបានបញ្ជាក់ជំហររបស់ខ្លួនថា ខ្លួននឹងបើកព្រំដែនវិញ លុះត្រាតែយោធាថៃបញ្ចប់វិធានការឯកតោភាគីជាមុន ដោយបើកព្រំដែនឱ្យដំណើការដូចមុនថ្ងៃ ៧ មិថុនា ដែលថៃចាប់ផ្ដើមកម្រិតម៉ោងចេញ-ចូល។

គេមើលឃើញថា ភាពតានតឹងព្រំដែនកម្ពុជា-ថៃ បានក្លាយជាបន្ទុកពាណិជ្ជកម្មធ្ងន់ធ្ងររវាងប្រទេសទាំង២ ដែលមានទំហំជាទឹកប្រាក់រាប់ពាន់លានដុល្លារ/ឆ្នាំៗ។ ឆ្លើយតបនឹងការគំរាមកំហែង និងគំនាបសេដ្ឋកិច្ចផ្សេងៗរបស់ថៃ កម្ពុជាបានបិទការនាំចូលអគ្គិសនី និងអ៊ិនធឺណេតប្រើប្រាស់ បន្លែផ្លែឈើ និងផ្អាកការនាំចូលទាំងស្រុងនូវប្រេង និងឧស្ម័នឥន្ធនៈថៃ។ អ្នកជំនាញថៃបានព្រមានថា ការបិទព្រំដែន និងវិធានការទាំងនេះ នឹងប៉ះពាល់ខ្លាំងដល់ភាគីថៃ ដែលមានអតិរេកពាណិជ្ជកម្មពាន់លានដុល្លារជាមួយកម្ពុជា ជាពិសេសប្រជាជនថៃរស់នៅតាមព្រំដែន និងអាជីវកម្មថៃ ដែលមានកម្ពុជាជាទីផ្សារ៕