ព័ត៌មានអន្ដរជាតិ

តម្លៃប្រេង និងមាសអន្តរជាតិ មិនប្រែប្រួលខ្លាំង ក្រោយ ត្រាំ ប្រកាសពន្ធខ្ពស់ ១៤ ប្រទេសទេ

បានផុស

១០ ខែ មុន

នៅ

ថ្ងៃពុធ ៩ កក្កដា ២០២៥

ដោយ

តម្លៃប្រេង និងមាសអន្តរជាតិ មិនមានការប្រែប្រួលខ្លាំងទេសម្រាប់ការជួញដូរនៅថ្ងៃពុធនេះ ក្រោយប្រធានាធិបតីអាមេរិក ដូណាល់ ត្រាំ ប្រកាសពន្ធខ្ពស់លើប្រទេសចំនួន ១៤ ដោយគ្រោងចូលជាធរមាននៅថ្ងៃ ១ សីហា។

ពេលប្រកាសពន្ធខ្ពស់ ដែលលោក ត្រាំ ហៅថៃពន្ធគយបដិការ នៅដើមខែមេសា តម្លៃប្រេងអន្តរជាតិធ្លាក់ចុះគំហុក ខណៈតម្លៃមាសហក់ឡើងបំបែកកំណត់ត្រា ដោយសារតែកង្វល់នៃការធ្លាក់ចុះសេដ្ឋកិច្ច និងពាណិជ្ជកម្មសកល។ តម្លៃទំនិញអន្តរជាតិទាំង២ប្រែប្រួលខ្លាំង នៅពេលសង្រ្គាមពាណិជ្ជកម្មពន្ធគយអាមេរិក-ចិន ពុះកញ្រ្ជោលឡើង មុនពេលគូវិវាទទាំង២ ព្រមព្រៀងគ្នាបន្ធូរបន្ថយភាពតានតឹង។

តម្លៃមាសជួញដូរដោយផ្ទាល់ បានធ្លាក់ចុះ ០,១២ ភាគរយ ដោយជួញដូរនៅប្រមាណ ៣ ៣០៣ ដុល្លារ/អោន លើទីផ្សារអាស៊ី គិតត្រឹមម៉ោងជាង ១០ ព្រឹក ថ្ងៃពុធ នៅទីក្រុងហុងកុង។

តម្លៃប្រេងនាពេលអនាគត ម៉ាក Brent ឯណោះវិញ បានធ្លាក់ចុះ ០,២០ ភាគរយ ដោយជួញដូរនៅតម្លៃ ៧០,០១ ដុល្លារ/បារ៉ែល ខណៈតម្លៃប្រេងអាមេរិក WTI ជួញដូរតិចជាងនោះប្រហែល ២ ដុល្លារ ដោយធ្លាក់ចុះក្នុងអត្រាប្រហាក់ប្រហែលគ្នា។

អ្នកជំនាញលើកឡើងថា ការធ្លាក់ចុះនៃតម្លៃប្រេង និងមាសអន្តរជាតិនាពេលនេះ បណ្ដាលមកពីឥទ្ធិពលនៃការប្រកាសពន្ធរបស់អាមេរិកលើប្រទេសចំនួន ១៤ រួមទាំងដៃគូពាណិជ្ជកម្មសំខាន់ៗដូចជាជប៉ុន និងកូរ៉េខាងត្បូង។ យ៉ាងណាមិញ ការប្រែប្រួលមានទំហំតិចតួច ដោយសារតែសុទិដ្ឋិនិយមដែលថា លោក ត្រាំ បានលើកថ្ងៃចាប់ផ្ដើមអនុវត្តពន្ធគយបដិការពីថ្ងៃទី ៩ កក្កដា ទៅថ្ងៃទី ១ សីហា វិញ ដែលទុកពេលឱ្យប្រទេសផ្សេងៗចរចាដើម្បីទម្លាក់អត្រាពន្ធខ្ពស់។

សម្រាប់ប្រេង បញ្ហាពន្ធអាចរារាំងសកម្មភាពសេដ្ឋកិច្ច ដែលអាចធ្វើឱ្យតម្រូវការប្រេងខ្សោយ។ ហេតុនេះហើយ ទើបសុទិដ្ឋិនិយមស្ដីពីការចរចាពន្ធ ធ្វើឱ្យប្រេងធ្លាក់ចុះ ប៉ុន្តែក្នុងអត្រាតិចតួច។ យ៉ាងណាមិញ តម្រូវការប្រេងនៅសហរដ្ឋអាមេរិក ជុំវិញថ្ងៃឈប់សម្រាក ៤ កក្កដា ក៏ជួយកម្រិតការធ្លាក់ចុះនៃតម្លៃប្រេងឥឡូវនេះផងដែរ។

លើសពីនេះ សម្រាប់ផ្នែកផ្គត់ផ្គង់ រដ្ឋបាលព័ត៌មានថាមពលអាមេរិកបានព្យាករកាលពីថ្ងៃអង្គារថា សហរដ្ឋអាមេរិកនឹងផលិតប្រេងតិចជាងមុននៅឆ្នាំ ២០២៥ ដោយសារតែការធ្លាក់ចុះតម្លៃប្រេងនាពេលកន្លងមក ដែលបានជំរុញឱ្យក្រុមហ៊ុនផលិតអាមេរិក បន្ថយសកម្មភាពផលិតកម្ម។ បែបនេះហើយ ធ្វើឱ្យតម្លៃប្រេងនៅបន្តខ្ពស់ ៧០ ដុល្លារ/បារ៉ែល ចំពេលដែលហានិភ័យនៃជម្លោះនៅមជ្ឈិមបូព៌ា នៅតែបន្ត។

ទោះយ៉ាងណាមិញ វិនិយោគិនប្រេងនៅតែប្រុងប្រយ័ត្ន ជុំវិញការសម្រេចចិត្តបង្កើនផលិតកម្មប្រេងរបស់អង្គការនៃប្រទេសនាំចេញប្រេង និងសម្ព័ន្ធមិត្ត (OPEC +) កាលពីចុងសប្ដាហ៍កន្លងទៅ៕