ព័ត៌មានជាតិ

ក្រុមហ៊ុនបច្ចេកវិទ្យាយក្សរបស់ចិននឹងជួយកម្ពុជាលើការរស្រាវជ្រាវ និងអភិវឌ្ឍន៍ AI

បានផុស

២៤ វិនាទី មុន

នៅ

ថ្ងៃពុធ ១៦ កក្កដា ២០២៥

ដោយ

Huawei Technology ដែលជាក្រុមហ៊ុនបច្ចេកយក្ស និងឈានមុខគេរបស់ប្រទេសចិនបានប្តេជ្ញាក្នុងការចូលរួមសហការលើការស្រាវជ្រាវនិងអភិវឌ្ឍន៍បញ្ញាសិប្បនិម្មិត (AI) និងបណ្តុះធនធានមនុស្សផ្នែកបច្ចេកវិទ្យាសម្រាប់អនាគតរបស់កម្ពុជា ដើម្បីឱ្យស្របតាមយុទ្ធសាសបច្ចកោណរបស់រាជរដ្ឋាភិបាលអាណត្តិទី៧នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងជំនួបជាមួយលោក ហែម វណ្ណឌីរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) នៅទីស្តីការក្រសួងកាលពីថ្ងៃទី១៥ម្សិលមិញនេះ តំណាងក្រុមហ៊ុន Huawei បានលើកអំពីបរិវត្តកម្មឧស្សាហកម្មនៅក្នុងប្រទេសចិន តាមរយៈការប្រើប្រាស់បច្ចេកវិទ្យា AI ដោយលើកយកឧទាហរណ៍ពីការប្រើប្រាស់បច្ចេកវិទ្យានេះសម្រាប់ត្រួតពិនិត្យគុណភាពក្នុងខ្សែច្រវាក់ផលិតកម្មរថយន្ត ការបង្កើនប្រសិទ្ធភាពចំណាយនិងកាត់បន្ថយពេលវេលាសម្រាប់សេវាដឹកជញ្ជូន និងការផ្តល់លទ្ធភាពឱ្យអតិថិជនរចនាសម្លៀកបំពាក់តាមតម្រូវការជាដើម។

លោកថា៖«ក្រុមហ៊ុន Huawei បានបង្ហាញការប្តេជ្ញាចិត្តខ្ពស់ ក្នុងការគាំទ្របរិវត្តកម្មឆ្ពោះទៅរកសេដ្ឋកិច្ចឌីជីថល និងសេដ្ឋកិច្ចដែលជំរុញដោយនវានុវត្តន៍នៅកម្ពុជា ដោយស្នើចុះអនុស្សរណៈនៃការយោគយល់ជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ផ្តោតលើការបង្កើតថ្នាលស្រាវជ្រាវនិងអភិវឌ្ឍន៍បញ្ញាសិប្បនិម្មិត និងការបណ្តុះទេពកោសល្យផ្នែកបច្ចេកវិទ្យា»។

លោកក៏បានលើកឡើងអំពីបទពិសោធជោគជ័យរបស់ខេត្ត Quizhou ដែលធ្លាប់ជាខេត្តក្រីក្រមួយ ប៉ុន្តែត្រូវបានវិវត្តរីកចម្រើន ដោយការវិនិយោគជាយុទ្ធសាស្រ្តលើមជ្ឈមណ្ឌលទិន្នន័យ និងហេដ្ឋារចនាសម្ព័ន្ធឌីជីថល។

លោក ហែម វណ្ណឌី បានស្វាគមន៍ចំពោះគំនិតផ្តួចផ្តើមនេះ និងបានជម្រាបជូនភាគីក្រុមហ៊ុនថា រាជរដ្ឋាភិបាលបានបង្កើតគណៈកម្មការស្រាវជ្រាវ និងអភិវឌ្ឍន៍ជាតិ និងកំពុងរៀបចំបង្កើតមូលនិធិស្រាវជ្រាវជាតិ ដើម្បីជំរុញនវានុវត្តន៍ សម្រាប់ការអភិវឌ្ឍសង្គម-សេដ្ឋកិច្ច។

លោកថា៖ “ក្រសួងស្វាគមន៍កិច្ចសហប្រតិបត្តិការលើការស្រាវជ្រាវ និងអភិវឌ្ឍន៍បញ្ញាសិប្បនិម្មិត ដែលក្រុមហ៊ុន Huawei បានស្នើឡើង។ យើងក៏ត្រូវការអភិវឌ្ឍបុគ្គលមានទេពកោសល្យផ្នែកបច្ចេកវិទ្យាបន្ថែមទៀត ជាពិសេសក្នុងវិស័យ AI ។ យើងសង្ឃឹមថា Huawei អាចនាំយកនូវជំនាញ និងកម្មវិធីសិក្សាទំនើបៗ មកសហការជាមួយស្ថាប័នអប់រំបណ្តុះបណ្តាលនៅកម្ពុជា ដើម្បីអភិវឌ្ឍបុគ្គលមានទេពកោសល្យទាំងនេះ ព្រោះអ្នកទាំងនេះហើយដែលនឹងក្លាយជាធនធានសំខាន់នាពេលអនាគតសម្រាប់ក្រុមហ៊ុនបច្ចេកវិទ្យា ដូចជា Huawei ជាដើម»៕