ព័ត៌មានអន្ដរជាតិ

ត្រឡប់ត្រឡិន! អនុរដ្ឋមន្ត្រីការពារជាតិថៃនិយាយផ្សេង មេភូមិភាគ២ និយាយផ្សិង រឿងសង់របង

បានផុស

២ ថ្ងៃ មុន

នៅ

ថ្ងៃអង្គារ ១៥ កក្កដា ២០២៥

ដោយ

កាលពីសប្តាហ៍មុន អ្នកនាំពាក្យកងទ័ពជើងគោកថៃ លោកឧត្តមសេនីយ៍ទោ Winthai Suvaree បាននិយាយថា ការសម្រេចចិត្តថាតើត្រូវសាងសង់របងព័ទ្ធប្រាសាទតាមាន់ធំឬក៏អត់នោះ គឺ អាស្រ័យលើរដ្ឋាភិបាល ប៉ុន្តែយ៉ាងណា ពេលនេះស្រាប់តែអនុរដ្ឋមន្ត្រីក្រសួងការពារជាតិ Natthapol Nakphanit ចេញមុខបញ្ជាក់ថា រឿងសង់របងនោះគ្រាន់តែនិយាយចោលប៉ុណ្ណោះ ហើយគ្មានការចេញឯកសារផ្លូវការអ្វីទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Natthapol លើកឡើងថា នោះគឺជាសង្គ្រាមព័ត៌មានសូមកុំជឿ ថៃមិនពិចារណាសាងសង់របងទាល់តែសោះ ហើយអំពាវនាវឲ្យប្រជាជនថៃ ស្តាប់ព័ត៌មានពីរដ្ឋាភិបាលក្រុងបាងកក។

ផ្ទុយទៅវិញ មេភូមិភាគ២ថៃ Boonsin Padklang ប្រកាសថា របងនឹងសង់ បើរដ្ឋាភិបាលបញ្ជា ដែលមើលទៅឃើញថា រឿងថៃដូចជាត្រឡប់ត្រឡិននិយាយមិនចូលគ្នា។ មេទ័ពថៃរូបនេះទទួលស្គាល់ថា ទង្វើនេះនឹងបង្កភាពតានតឹងឈានដល់ផ្ទុះជម្លោះធំ ប៉ុន្តែនឹងធ្វើតាមបញ្ជាថ្នាក់លើ។

យ៉ាងណា ប្រធានព្រឹទ្ធសភា នាយឧត្តមសេនីយ៍ផ្កាយមាស៥ផុតលេខ សម្ដេចតេជោ ហ៊ុន សែន ថ្លែងថា កម្ពុជាត្រៀមខ្លួនជាស្រេចសម្រាប់សង្គ្រាមមួយដែលថៃជាអ្នករុញច្រាន។ សម្ដេចលើកឡើងថានៅប៉ុន្មានថ្ងៃនេះថៃចង់ធ្វើរបងព័ទ្ធប្រាសាទតាមាន់ធំដែលសម្ដេចព្រមានថានឹងមានបញ្ហាកើតឡើងប្រសិនជាថៃហ៊ានធ្វើមែន។

ថ្លែងក្នុងសម័យប្រជុំលើកទី៣ ព្រឹទ្ធសភានីតិកាលទី៥ កាលពីព្រឹកថ្ងៃទី១៤ខែកក្កដា សម្ដេចតេជោ ហ៊ុន សែន លើកឡើងថា៖ «ប៉ុន្មានថ្ងៃនេះចង់ធ្វើរបងព័ទ្ធតាមាន់ធំ! សាកល៎មើលទៅ! គំរាមវ៉ៃសុទ្ធតែយកបាត់ដំបង សៀមរាប វ៉ៃចូលដល់ភ្នំពេញ។ សូមសាកល៎មើល!។ ខ្ញុំមិនព្រមានធ្វើសង្គ្រាមទេតែយើងរៀបចំនឹងសង្គ្រាមមួយដែលវានឹងមកដល់»។

ដោយឡែក សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏គូសបន្ទាត់ក្រហមព្រមានទ័ពថៃផងដែរកាលពីថ្ងៃទី១ ខែកក្កដា ឆ្នាំ២០២៥ ក្នុងទិវាមច្ឆជាតិ ក្នុងខេត្តតាកែវ ដោយថា ប្រសិនបើថៃហ៊ានបិទប្រាសាទតាមាន់ធំមែន ច្បាស់ជានឹងមានរឿងជាមួយកងទ័ពកម្ពុជាហើយ៕

អត្ថបទ៖ សុខ សុវណ្ណ

ចុចអាន៖ មេភូមិភាគ២ថៃ ថា ជនកំសាកដែលលួចវាយទាហានកម្ពុជា ប្រហែលដោយសារទប់អារម្មណ៍មិនជាប់